Ankalazaina ny 21 sy 22 jona izao, eto Antananarivo, ny Andro iraisam-pirenena ho an’ny mozika. Hiavaka ny fankalazana amin’ity taona ity satria mandritra ny roa andro sy amin’ny toerana roa samy hafa no hanaovana izany.

Hotanterahina etsy amin’ ny Alliance francaise d’Antananarivo (AFT) Andavamamba ny andro voalohan’ny hetsika. Hatao eny amin’ny kaominina Ivato kosa izany, amin’ny andro faharoa. Hetsika izay hiaraha-miasa sy tohanan’ny Telma Madagas­car. Lohahevitra entina mandritra izany ny hoe: “Mozika maroloko”. Ho an’ny etsy amin’ ny AFT, hisy ny fampisehoana hiarahana amin’ireo mpanakanto maro, mivoy ny gadona isan-karazany. Ho hita eny an-toerana ihany koa ny atrikasa fampianarana dihy sy mozika ho an’ny rehetra liana momba izany. Tanjona ny hanomezan-danja ny fahasamihafana sy ny maha kanto ny kolontsaina eto amin’ny firenena. “Ezaka atao ny manome sehatra ny mpanakanto, indrindra ireo vao misondrotra mandritra ny hetsika”, hoy Andriamihanta Andrian­tsoa, chef de departement culturel ao amin’ny AFT.

Hatomboka amin’ny diabe

Ho an’ny fankalazana eny Ivato, hatomboka amin’ny diabe manerana ny tanàna izany, ny tapakandro maraina. Hiainga eny amin’ny Horizon Ivato ary hihazo ny seranam-piaramanidina ny diabe. Hana­fana ny fankalazana ireo mpanakanto maro samihafa sy mpandihy nentim-paharazana. Anisan’ny haneho ny talentany ry Mirado sy Stephanie ary Johane manomboka amin’ny 3 ora tolakandro. Nosafidiana manokana ny eny amin’ity kaominina ity satria be mpo­nina sy varavarana iray hidi­ran’ny avy any ivelany, tonga mitsidika an’i Madagasikara ihany koa, raha ny fanazavana voaray hatrany. Maimaim­poana avokoa ny fanatrehana ny hetsika.

Mino

Namoaka hafatra tamin’ny fanamarihana ny Andro maneran-tany faha-58 momba ny fifandraisan’ny mpiara-belona ny eo anivon’ny Fivondrona­mben’ny eveka (Fem). Na­maky ny hafatra tamin’izany ny filohan’ny vaomieran’ny fifandraisana, Mgr Rabema­hafaly Fulgence. “Tokony ham­piasaina ho amin’ny tombontsoan’ny fianakaviana sy ny rehetra ny fitaovan-tserasera”, hoy izy. Notanterahina tetsy Analakely, teo amin’ny fivarotam-boky Md Paoly, ny sabotsy teo sy ny alahady, tetsy amin’ny Ekar St Vincent de Paul Ambatonilita, ny hetsika nankalazana izany, tamin’ny alalan’ny Sorona Masina sy ny fampitan-kafatra. Teo koa ny famelabelarana lohahevitra mifandraika amin’izany, miainga amin’ny hafatry ny Papa Fransoa. Nikarakara ny hetsika rehetra koa ny eo anivon’ny diosezin’Antananarivo. No­tsi­a­hiviny ny teny manentana avy amin’ny Papa Fransoa momba izany. Nanteriny fa hosokafana amin’ny fiarahamonina manontolo, hanomezana tsiro ny fiainantsika tsy hahalefy ny fihavanana amin’Andriamanitra, izany.

Synèse R.

Mitohy ny fampahafantarana ny lalàna tanterahin’ny minisiteran’ny Fitsarana. Tafiditra amin’ny fanatsarana ny fomba fiasa eo anivon’ny tontolon’ny fitsarana izany.

Notanterahina, ny herinandro teo, tao amin’ny FJKM Ziona Vaovao Mahajanga, ny fanapariahana ny lalàna. Nitarika izany tany an-toerana sady niara-niombom-bavaka tamin’ireo kristianina ny minisitry ny Fitsarana, Randriamanantenasoa Landy Mbolatiana. “Natao izao fampahafantarana sy fanaparitahana ny lalàna izao hanampiana ny kristianina sy ahafahan’izy ireo mandray andraikitra amin’ny tranga mety hiseho manoloana ireo lalàna manan-kery”, hoy ny minisitra. Navoitrany tamin’ny fanentanana fa zava-dehibe izany, indrindra amin’izao “Iray volana ho an’ny ankizy” izao.

Fanolanana sy ny famosirana
Nampahafantarina tamin’izany ny lalàna mifehy ny fianakaviana. Notsongaina ma­no­kana ny momba ny tolotra na ilay antsoina hoe “donation” sy ny fandovàna na ny “succession”.
Teo koa ny momba ny lalàna vaovao laharana faha-2024-001 tamin’ny 26 febroary 2024, manova sy manitsy ny andininy ao amin’ny fehezan-dalàna famaizana momba ny fanolanana. “Natao indrindra izany mba hiarovana ny ankizy ary lalàna mametraka ny sazy ho amin’ny famosirana na ny Castration chirurgicale” , hoy izy.
Nozarain’ny mpiara-miasa amin’ny minisitra tamin’ireo mpino kristianina ao an-toerana tamin’izany ny bokikely mirakitra ireo lalàna momba ny tolotra sy ny fandovana ireo.

Synèse R.

Tafiditra ao anatin’ny politikam-panjakana ny fampiroboroboana ny tahan’ny famokarana sy fisitrahana herinaratra eto Madagasikara izay ho tonga hatrany amin’ny 800 MW ka avy amin’ny angovo azo havaozina ny 70% amin’izany. Nampahafantarina tamin’ny fomba ofisialy ny alakamisy teo, teny amin’ny «Birdy» Galaxy Andraharo, ireo mpisehatra matihanina sy mpamokatra angovo azo havaozina na ny «Mada­gascar Renewable Energy Association » (Marea). Tonga nanome voninahitra izany ny minisitry ny Angovo sy ny akoranafo (MEH), Jean-Baptiste Olivier. Mariky ny fiaraha-miasan’ny fanjakana sy ny sehatra tsy miankina (3P) ny tetikasa angovo ho an’ny daholobe izay mifandraika amin’ny ODD fahafito, miompana amin’ny fampiroboroboana ny angovo maharitra sy madio amin’ny vidiny takatry ny rehetra. Anisan’ireo mpikambana handrafitra ny tetikasa ny orinasa Compagnie générale d’hydroéléctricité de Volobe (CGHV), ny vondrona Anka, First Energy, New Ener­gy Africa (NEA), Sun­farming Madagascar, Tozzi Green, Welight, izay tarihin’ny filohany, Remy HUBER .

Vina
Maherin’ny 200 MW ny angovo vokarin’ireo mpikambana ao amin’ny Marea, hahatratra hatrany amin’ny 380 GWh isan-taona izany, izany hoe, 20% ny famokarana herinaratra eto amin’ny firenena. Tombanana hatrany amin’ny 1,5 tapitrisa ireo hisitraka ny tetikasa, izay hampiroborobo ny indostria sy ny famoronana asa ary ny fahaiza-manao samihafa.

Henintsoa H.