Tanterahina ny 21 sy 22 jona 2024, eny amin’ny Alliance Fran­çaise d’Antananarivo (AFT) Andavamamba sy eny amin’ny kaominina Ivato Seranana, ny « Fête de la Musique 2024 ». Hetsika lehibe eo amin’ny tontolon’ny mozika izy ity, karakarain’ny avy eo anivon’ny Alliance Française, miaraka amin’ireo mpiara-miombon’antoka aminy. Raha ho an’ny isan-taona , mozika maroloko sy mpiangaly mozika maro samihafa no mandray anjara amin’ ny hetsika. Ho an’ity andiany ity kosa, hiavaka sy hafinaritra kokoa ny hetsika, araka ny nambaran’ny tomponandraikitra.
Anisan’ny ahafantarana ny volana jona ihany koa ny mozika. Manamarika izany isan-taona ny eny anivon’ny Alliance Fran­çaise. Hetsika maro no handravaka izany, mandritra ny roa andro. Anisan’izany ny seho ara-javakanto isan-karazany, atrikasa mahakasika ny mozika sy momba ny dihy nentin-drazana. Misy ihany koa ny sehatra misokatra ho an’ny rehetra natao hanomezana sehatra ireo mpanakanto vao misondrotra. Diabe eny amin’ ny kaominina Ivato Seranana kosa no hanokafana ny andron’ny 22 jona 2024. Manodidina ny 300 isa ireo handray anjara amin’ izany. Fampisehoana iarahana amin’i Mirado sy Stephanie ary Johane no entina hamaranana izany.

Lin

« Tous les garçons et les filles », hira nanana ny lazany naneran-tany, nanomboka ny taona 1962. Nisongadina ny talentan’i Françoise Hardy, mpihira teratany frantsay… Omaly, fantatra fa nodimandry izy !

Araka ny vaovao nambaran’i Thomas Dutroncs, zanany lahy. Nodiman­dry ny alin’ny talata 11 jona 2024, teo amin’ny faha-80 taonany, i Françoise Hardy. «Mphiran’ny taona 1960 », nanana ny la­zany, tsy tao Frantsa ihany fa naneran-tany mihitsy. Raha ny nambaran’ny zanany hatrany, aretina homamiadan’ny tenda (faritra mampitohy ny orona sy ny vava) no nitarika izao fahafatesany izao.
Tany amin’ny fahazazany sy ny taonan’ny adolantsento, voasariky ny « rock’n’roll » ity mpanakanto ity… Taona 1960, nahazo ny zavamaneno gitara izy ka nampiana-tena. Nan­dray anjara tamina fandaharana maro hoenti-mampahafantatra ny talenta, any amin’ny Radio. Taona 1962, niseho Televi­ziona sy nihira voalohany ny « Tous les garçons et les filles ». Teo no ho eo, rakotra ny lazany izao tontolo izao. Faran’ny taona 1962, nahatratra 500 000 ny isan’ny kapila « 45 tours » lafony. Herintaona taorian’io, nandritra ny 11 herinandro, nitana ny laharana voalohany hatrany ny varotra natao ta­min’ny « Tous les garçons et les filles ». Tsy nijanona tamin’ ny teny frantsay intsony ity hira ity fa navadika tamin’ny fiteny italianina ihany koa.
Nivelatra naneran-tany (Espainina, Etazonia, Pays-Bas…), ny lazan’i Françoise Hardy. Nanakoako ny “Le temps de l’amour”, “Le premier bonheur du jour”, “L’amour d’un garçon”, sns. Niara-niasa tamin’ireo andrarezin’ny hira sy ny famokarana kapila toa an’i Michel Berger ihany koa ity mpanakanto ity.

Nanagona : HaRy Razafindrakoto