Natomboka omaly ny tetikasa vaovao miisa roa, tohanan’ny governemanta amerikanina, “Rano Maharitra” sy “Dio Sera” izay mitentina 45 tapitrisa dolara. Hanova fahazoana rano madio sy fanadiovana manerana an’i Mada­ga­si­kara amin’ny alalan’ny USAID ny tetikasa.
Ireo tokantrano ambanivohitra no tena kendrena hisitraka rano madio. Hitondra anjara biriky amin’ny vokatra ara-pahasalamana maharitra koa ny tetikasa eo anivon’ny faritra fito dia i Vatovavy, Fitovinany, Sofia, Betsiboka, Anosy, An­droy ary Atsimo Atsinanana.
Hitondra fanatsarana ny fahaiza-manaon’ny andrimpanjakana sy ny fandrindrana isan’ambaratonga ny tetikasa. Eo koa ny fahazoana loharanom-bola bebe kokoa hanohanana ny sehatry ny rano…, ny fampitomboana ny vokatra sy ny tolotra momba ny rano mba hamaliana ireo filana…
Olona maherin’ny 742 000 no hahazo tombontsoa amin’ny fisitrahana ezaka fanadiovana, ka ny 312 000 no mahazo rano fisotro.
Mikendry ny hampitombo hatrany ny fidiran’ny tokantrano amin’ny vokatra sy tolotra manara-penitra sy mora amin’ny lafin’ny fanadiovana eny an-tanàn-dehibe kosa ny tetikasa “Dio Sera” izay mitentina 10 tapitrisa dolara.
Hanatsarana ny paikady momba ny fanadiovana an-tanàn-dehibe, hamaha ny famatsiam-bola sy ny fampiasam-bola ho an’ny sehatry ny rano… Hiasa amin’ny tanàn-dehibe 3 dia i Mahajanga sy Toamasina ary Fianarantsoa ny tetikasa.

Tatiana A

Hita taratra hatrany ny tsiokan’ny alizay any amin’ny tapany atsimon’ny afovoantany ary tsy marin-toerana izany any amin’ny afovoany atsinanana sy avaratra atsinanan’ny Nosy. Entanina ny mpampiasa ranomasina any amin’ny morontsiraka atsimo sy atsimo atsinanana ary any amin’ny morontsiraka afovoany atsinanana hanaraka ny toromarika omen’ny manam-pahefana satria manonja be ny ranomasina nanomboka omaly ka hitohy anio.
Manomana dinika fihaonana natao hanamaivana ny fianakaviana mitaiza marary ny fikambanana Madagascar Alzheimer Masoandro Mody. Ao amin’ny foiben’ny fikambanana ao Fenomanana Mahazoarivo no hanaovana izany, rahampitso. Natsangana ny taona 2017 ny hetsika ka ezahina atao isam-bolana ahafahan’ireo fianakaviana mizara ny olana mavesatra mianjady aminy isan’andro sy ahitany namana vaovao misedra olana mitovy.
Nampahatsiahy ny birao nasionaly miady amin’ ny famarinana olona fa azo sokajiana ho anisan’izany ny fananganan-jaza tsy ara-dalàna mba hahazoana loharanom-bola. Ity endrika iray ity dia mahasarona ireo fomba tsy ara-dalàna rehetra, toy ny fakana an-keriny, ny fividianana zaza hatsangana, na ny fanaovana taratasy hosoka hahafahana manangana zaza.
Nanao voin-kava-mahatratra tamin’ireo fianakaviana traboina nandritra ny haintrano niseho tany amin’ny fokontany Evatraha, kaominina Mandro­mon­dromotra, distrika Taolagnaro, ny BNGRC. Nizara fanampiana ho an’ireo fianakaviana miisa 180, ahitana olona 688 ny ekipa. Trano miisa 224 no kilan’ny afo tanteraka.

Marolafy ny tolotra fiofanana avy amin’ny sampandraharahan’ny minisiteran’ny Fampianarana teknika sy ny fanofanana arakasa ho an’ny daholobe. Anisan’izany ny fiofanana maimaimpoana momba ny fiompiana akoho gasy notanterahina tao Vakinankaratra. Miisa 118 ireo tantsaha sy tanora avy ao amin’ny fokontany Ambohimiarivo sy Tsaramody, distrikan’ Antsirabe II, no nisitraka izany.
Notsinjaraina andiany telo ireo mpiofana. Nanomboka ny volana marsa lasa teo ny fiofanana ary nifarana tamin’ity volana ity. Sehatrasa fototra iompanan’ny fiveloman’ny mponina avy amin’ireo fokontany roa ireo ny fiompiana akoho gasy. Nizotra am-pilaminana ny fiofanana satria liana ireo mpiofana. Azo antoka ny hahazoan’izy ireo vokatra tsara noho ny teo aloha. Hitombo sy hivelatra kokoa ny sehatrasa sahanin’izy ireo, noho ny teknika fiompiana vaovao hampivoarana ny fidiram-bolan’ny isan-tokantrano, hoy ny mpampiofana.
Tsy mijanona amin’ny tantsaha ny fanofanana fa misy koa ny fandraisana tanora hiofana momba ny fanamboarana akora mampiasa simenitra amin’izao fotoana izao any Antsirabe.

Vonjy

Efa namokatra boky torolalana hialana amin’ny fiankinandoha amin’ny sigara ny Centre Aro Aina, miaraka amin’ny dokotera manam-pahaizana manokana momba izany. Hifantoka amin’ny mpianatra sy ny mpanabe ny fizarana eny Andohalo, anio maraina.

Velakevitra lehibe tontosaina eny amin’ny Lycée Andohalo, anio, ho an’ny daholobe, indrindra ny tanora sy ny ankizy mpianatra ary ny mpanabe no entin’ ny fikambanana Aro Aina hanamarihana ny Andro maneran-tany tsy hifohana sigara. “Nosafidiana manokana ny toeram-pianarana satria tsapan’ny tomponandraikitry ny Centre Aro Aina, manampy hiala amin’ny fiankinandoha amin’ny zava-mahadomelina samihafa (sigara, toaka, rongony…), fa lasa aloha loatra ary mivoatra isan-taona ny taonan’ny ankizy na lahy na vavy mandray sigara voalohany”, hoy ny dokotera Andriamiarinarivo Miarintsoa, manam-pahaizana momba ny fiankinandoha sady psychothérapeute. Amin’izao fotoana izao, manodidina ny 10 taona no mandray sigara voalohany ny ankizy. Izay indrindra no nahatonga ny lohahevitra nosafidiana ho an’ity taona ity mandritra ny fankalazana hoe: “Arovy ny ankizy amin’ny fisarihan’ny orinasa mpamokatra sigara”. Mandritra ny fizarana eny Andohalo, anio, homena torohevitra ahafahana miala amin’ny sigara ireo efa mifoka ary zaraina torolalana hisorohana tsy ho tafaroboka ireo mbola tsy tafiditra. Ny fiantraikan’ny fifohana sigara eo amin’ny tanora sy ny zatovo ary ny fiarahamonina iray manontolo no lohahevitra hifantohan’ny velakevitra.
Isan-kerinandro, olona 10 ka hatramin’ny 15 no tonga manatona ny Centre Aro Aina mila fanampiana hiala amin’ny fiankinandoha amin’ny sigara, 50% amin’izy ireo dia tanora avokoa ary efa mifoka sigara fa vonona hiala. Tokony ho fantatry ny ankizy na zatovo mifoka sigara fa varavarana iray mitondra amin’ny fandraisana toaka sy fidorohana zava-mahadomelina (rongony, rôrô) ny sigara. Eny anivon’ny fiarahamonina, heverina fa tsy miteraka zava-doza ny sigara ka tsinontsinoavina nefa loza mitatao ho an’ny taranaka izany.

Vonjy A.

Ceasar Grill Soanierana – Sehatra ho an’ireo mpivoy ny mozika an-tanàn-dehibe. Hifandimby hanafana ny fotoana anio, manomboka amin’ny 7 ora alina ry MBL, Eklyps, Money Row ary Lyrikal Jill. Hanaraka ireto mpihira ireto i Diojay, hanafana ny elanelam-potoana. Efa mahazatra ireo tanora mpankafy ny mozika amin’izao fotoana ny toerana.
Eusébia eny amin’ny La Teinturerie Ampasanimalo. Anjaran’ity zanak’i Jaojoby ity indray ny manafana ny sehatra, manomboka amin’ny 8 ora alina. Manana eo amin’ny ora iray mahery eo izy izarany ny mozikany amin’izao fandalovany ao izao. Toy ny mahazatra, hamonjy ny “After live – jam session” eny amin’ny Le Garage Antsahavola i Eusébia, amin’ny 10 ora alina.
Hizara ny traikefany ireo mpanao gazety mpaka sary. Eny amin’ny Craam, Oniversiten’Ankatso ny fotoana, anio, manomboka amin’ny 3 ora sy sasany. Hitarika ny fotoana amin’izany ireo mpaka sary, Henintsoa Rafalia sy Rado Rakotoseheno. Fiaraha-miasa amin’ny fikambanan’ireo mpaka sary matihanina na ny UPPM sy ny Craam izy ity.
Piment Café Behoririka. – Hiverina ry Jeneraly. Anisan’ny toerana nahavorian’ny tarika Jeneraly mpankafy maro hatramin’izay ny ao. Efa elaela kosa izy ireo no tsy niaka-tsehatra, ka manome fotoana indray anio, manomboka amin’ny 8 ora sy sasany alina. Hamerina sy hamelona indray ireo sanganasan’i Gaby ry Andy sy ny tariny.