Atao etsy amin’ny kianjan’i Mahamasina, ny alahady izao, ny «Concert de la paix». Fampisehoana ara-pilazantsara hafanain’ireo mpanakanto kalaza maro avy eto an-toerana. Anisan’izany ry Rija Rasolondraibe, Joseph d’AF… Tafiditra ao anatin’ny fanamafisana ny fety fankalazana ny faha-64 taona niverenan’ny Fahaleovantenan’i Madagasikara izany. “Fotoana hanehoana fiombonam-po sy fiombonan-tsaina izy io”, hoy ny komity mpikarakara nitafa tamin’ny mpanao gazety, omaly, tetsy Mahamasina. Fotoana hiarahana manandratra vavaka sy fiderana an’Andriamanitra, iarahana amin’ny vahoaka malagasy ihany koa. Hampiavaka ny fampisehoana ny fahatongavan’ny mpanakanto Maggie Blanchard sy Jean Jean avy any Canada. Haneho ny talentany sy hampiaram-peo amin’ireo mpanakanto malagasy izy ireo, mandritra io fotoana io. “Madagasikara mandroso, Malagasy miara-mientana amin’ny fitiavan-tanindrazana”, io ny lohahevitra entina mankalaza ny 26 jona.
Manomboka amin’ny 2 ora tolakandro ny fampisehoana. Hisokatra amin’ny 8 ora sy sasany maraina ny vavahady. Hisy ny fanentanana sy dihy eo anelanelan’ny fotoana. Tsy azo atao ny mitondra zava-maranitra sy zava-pisotro mahamamo eny an-toerana amin’io fotoana io. Marihina fa misy ny fisavana ireo olona tonga hanatrika ny seho eny an-toerana. Ankoatra izay, hitandro ny filaminana eny an-toerana ny avy amin’ny polisim-pirenena sy ny zandarimaria.
Mino
Mitohy hatrany ny fivelaran’ny zavakanto malagasy. Taratr’izany ny fandraisana anjaran’ireo Malagasy mpahay kanto amin’ny hetsika iraisam-pirenena maro.
Malagasy mandray anjara amin’ny «Forestival 2024», atao any Lahnstein Allemagne, Razafindrakoto Mamy Nirina (Tangalamamy) sy Rabearivelo Dina Mitia ary Aina Andriamahafaly. Fampirantiana sy sehon-javakanto maro samihafa atao anaty ala sy eny ankalamanjana izy ity, nanomboka ny 15 jona 2024 ary hifarana ny 23 jona 2024. Ahitana mozika, rantin-tsary sy hosodoko. Hetsika misy isan-taona ny “Forestival”, mpahay kanto manana ny maha izy azy maneran-tany no mandray anjara amin’izany.
Zavakanto maroloko no hita mandritra ny hetsika. Anisan’ny mitondra ny kantony amin’ity i Tangalamamy, Malagasy mpiangaly saripika. Maneho ny hakanton’ny tontolo iainana sy ny harena voajanaharin’i Madagasikara ary ny fiainana andavanandron’ny mponina ao aminy no harantin’i Tangalamamy, mandritra izany. Anisan’ny hita ao ny hakanton’ny zavaboahary ao amin’ny tanànan’i Morondava, hatrany Zazafotsy, nandalo an’i Antenina. Sahala amin’izay ihany koa ny an’i Aina Andriamahafaly, izay mandranty saripika maneho ny hakanton’ity Nosy ity. Ankoatra ireo mpaka saripika ireo, mandray anjara ao anatin’ity “Forestival” ity ihany
koa Rabearivelo Dina Mitia, mpanao hosodoko. Hanehoany varatava maromaro sy ny hakanton’ny tontolo.
Hetsika ara-javakanto anisan’ny maro mpankafy sy mpitsidika ny “Forestival”. Saika hita mitsidika ity fampirantiana ity avokoa ireo karazan’olona sy sokajin-taona isan-karazany. Anisan’ny hankafizan’ny olona azy ny fahafahana mikarenjy any anaty ala sady mahita ireo zavakanto isan-karazany.
Lin
0,01% ny tahan’ny fanondrana entana maneran-tany nataon’i Madagasikara tamin’ny taona 2022. Laharana faha-133 no misy ny firenena raha toa ka eo amin’ny faha-129 isika eo amin’ny raharaha ara-barotra. Mitazona ny laharana voalohany sy faharoa amin’ny fanondranana maneran-tany kosa i Sina sy Etazonia, amin’ny taha 14,42% sy 8,28%.
Matanjaka sady voalohany amin’ny famokarana cacao ny any amin’ny faritra Sava. Nahatratra 180 taonina ny vokatra azo tamin’ny taom-pambolena 2023-2024. Mavitrika koa any an-toerana amin’ny fambolen-kazo, ka niisa 5 000 isa ny zanakazo cacao novokarina. Tanjona ny hamokarana 10 000 zanakazo.
Tombanana ho 0,55% isan-taona ny fahasimban’ny rohivoahary eto Madagasikara. Misy ny tetikasa IREMA ataon’ny minisiteran’ny Tontolo iainana (Medd) hiarovana izany. Mirefy 4 tapitrisa ha ny tontolo voajanahary harenina hatramin’ny taona 2030, mahakasika faritra 5 (Alaotra Mangoro, Amoron’i Mania, Diana, Sofia, Vatovavy).
Hentitra ny minisitera amin’ny tsy hisian’ny fanararaotana amin’ny vidin’entana tsy ara-drariny na entana efa simba amin’izao ankatoky ny fety izao. Samy tomponandraikitra avokoa na ny mpivarotra, ny mpandraharaha ara-barotra na ny mpanjifa. Tokony hitandrina ny rehetra amin’izao vanim-potoanan’ny fety izao.
Mpampianatra mpikaroka amin’ny lafiny ara-bola amin’ny toekarena any amin’ny tapany atsimon’ny Nosy Andriamiharivola Zavamanitra. Nanome ny heviny izy manoloana ny tatitry ny Banky iraisam-pirenena (BM), ny volana febroary 2024 teo. Araka ny tatitra, faritra roa no mihoatra ny 90% ny tahan’ny fahantrana, ny taona 2021-2022, any Androy (95%) sy Vatovavy Fitovinany (92%). Manodidina ny 80% kosa ny any Amoron’i Mania, Bongolava, Betsiboka, Anosy, Atsimo Atsinanana, Matsiatra Ambony, Alaotra Mangoro, Ihorombe, Menabe ary Atsimo Andrefana.
« Raha aravona ireo, any amin’ny tapany atsimon’i Madagasikara avokoa ny faritra 10 amin’ireo. Izany hoe, miaina anaty fahantrana lalina ny olona 8 amin’ny 10 », hoy i Zavamanitra A. Ho azy, « azo vahana tsara ny olana amin’ny fanomezan-danja ny indostrian’ny harena an-kibon’ny tany any atsimo. Tsy hitako ny fomba hanavotana ny olona any an-toerana ankoatra izay. Satria fotoana efa fitazoman’aina ny zava-misy ankehitriny fa tsy fampandrosoana intsony ».
Nomarihiny fa ilaina ny fifampiresahan’ny orinasa nahazo ny fahazoan-dalana hitrandraka amin’ny mponina eny ifotony, mba ho samy mahazo tombontsoa. Manana adidy amin’izany koa ny tomponandraikitra eny an-toerana. Hampandroso ny eny ifotony, ny faritra ary ny firenena izany rehetra.
Njaka A.
Tontosaina etsy amin’ny gara Soarano, ny 21 hatramin’ny 23 jona, ny hetsika niomerika, “Zah@Geek 3.0”, karakarain’ ny Orange Madagascar. Maherin’ny 40 ny orinasa mandray anjara. Nanokatra ny fotoana ny minisitry ny Fampiroboroboana ny haitao ara-kajy mirindra, ny paositra ary ny fifandraisan-davitra, Razafindramalo Tahina. « Mamaly ny filan’ny tanora malagasy ny hetsika Zah@Geek 3.0. Satria mivondrona eto avokoa ireo orinasa mpisehatra eo amin’ny niomerika sy ny haitao ara-kajy mirindra ary manana tolotrasa ho an’ny tanora », hoy ny fanazavany. Araka izany, maherin’ny 5 000 ny tanora andrasana ho avy mandritra ny roa andro anaovana ny hetsika. Hisy ny « job datings » sy « speed recruiting » izay handraisana ny fangatahan’asa. . Ankoatra izay, hiompana manokana amin’ny fampiasana ny saina voatr’olombelona (intelligence artificielle) ity andiany fahatelo amin’ny “Zah@Geek” ity raha fanazavana hatrany. Izany hoe, hampahafantarina ny mpitsidika ny tontolon’ireo IA amin’ny fampivoarana ny fiainan’orinasa sy ny andavanandron’ny tsirairay.
Henintsoa H.