Mitana anjara toerana lehibe eo amin’ny fivoaran’ny olombelona, eo amin’ny tontolon’ny asa, ny siansa momba ny ita sy ny serasera (Scie­nce de l’information et de la communication, Sic). Antony nitondrana fanazavana bebe kokoa mahakasika izany teny amin’ny Oniversiten’Anta­na­narivo, ny herinandro lasa teo. Nifarimbona ny Agence Peak sy ny fikambanana Arisera nikarakara ny hetsika «Wel’ Com», niarahana tamin’ireo manam-pahaizana momba ny Sic, ny Dr Fabrice Lollia sy Dr Razafindranavo Hervé. Tan­jona ny hitondra fanavaozana sy hizarana fahalalalana lalina kokoa momba ny siansa momba ny ita sy ny serasera. Nasongadin’i Dr Fabrice Lollia fa « anisan’ny namolavola ny fahombiazana sy nahamatihanina azy teo amin’ny sehatry ny asa ny Sic ». Nivoitra, nandritra izany, fa fahalalana ara-tsaina (théorie) mifanaraka tsara amin’ny teknolojia samihafa sy mamaly ny filan’ny tontolon’ny asa ny SIC. Sakana ho an’ny fifehezana ny serasera sy ny asa fanaovan-gazety kosa izany raha toa ka mifamahofaho ny fahalalana entiny. Etsy ankilany, nilaza ny Dr Razafindranaivo Hervé fa tanjona ny hahaizan’ny mpianatra mampifandray ny fahalalana ara-tsaina sy ny fampiharana izany eo amin’ny sehatry ny asa sy haha matihanina azy amin’ny ho avy.

Fampifandraisana
Sehatra natao hampiharana ny Sic eo amin’ny sehatrasa isan-karazany ny hetsika nataon’ny “Wel’com”. Nason­gadina manokana ny maha zava-dehibe ny fahaiza-ma­nao momba izany eo amin’ny tontolon’ny asa.

Henintsoa Hani

Vonona hampihodina ny toekarena hiadiana amin’ny fahantrana ny mponina manohana ny hanokafana ny orinasa Base Toliara. Nanao filaharambe izy ireo nandritra ny fankalazana ny faha-64 taona niverenan’ny Fahaleovantena tany an-toerana.

Anisan’ny nampiavaka ny fankalazana ny fetim-pirenena, ny 26 jona teo, tany Toliara I, ny filaharambe nataon’ny olona manohana ny Base Toliara, manodidina ny 4 000 avy amin’ny fikambanana miisa 55, sady nitondra sora-baventy.
Tsy very fanantenana izy ireo, toa an’i Aurélie. «Tsa­pako fa tena sahirana ny vahoakan’i Toliara. Manga­taka amin’ny filoham-pirenena izahay, ny hanokafana ny Base Toliara. Manana diplaoma ny zanakay nefa tsy ma­nana asa », hoy izy. Manam­py izany i Manjosoa, « Tsy afaka mamelona ny ankohonana izahay rehefa tsy misy asa. Tsy manan-katao izahay nefa manana diplaoma. Tsy hijaly intsony izahay raha misokatra ity orinasa ity ».
Tsy tongatonga ho azy ny datin’ny 26 jona, satria tsapan’ireo fikambanana miisa 55 ireo fa lalana mankany amin’ny fahaleovantena ara-toekarena, ny fisian’ny orinasa indostrialy vaventy, sady hitondra fampandrosoana any an-toerana.

Hiteraka asa maro
Notsorin’ i Maria , filohan’ ny fikambanana Ampela Miavotse, fa «hiteraka asa mivantana sy tsy mivantana ny fisian’ity orinasa ity. Hiroborobo ny varotra eto an-toerana, ny fitaterana, ny fisakafoana sy ny fiantranoana, ny fambolena, ny fiompiana, ny jono, sns ».
Toa an’i Nomenjanahary Crépin Espérant, solontenan’ ny mpanjono, nilaza fa « tohananay tanteraka ny Base, satria inoanay fa hanampy anay ara-pitaovana izy ». Ho an’i Martial, « marobe ny tanora tsy an’asa ka lasa mitarika posy bisikileta sisa. Hamaha izany ny fisian’ny Base Toliara ».
Nohamafisin’izy ireo fa « mamafy lainga ny mpanohitra ny Base, milaza fa miteraka aretina ity tetikasa ity. Efa an-taonany maro ny fitrandrahana harena an-kibon’ny tany vaventy any Taolagnaro sy Toamasina, fa tsy mitombina izany na kely aza ».

Njaka Andriantefiarinesy

Krutambull eny amin’ny La Tetinturerie Ampasanimalo. Manomboka amin’ny 8 ora ny sehon-dry zalahy ireto, hitondrany indray ny ragga muffin nahafantarana azy. Manana hira vaovao maro koa ny tarika tao anatin’izay fotoana tsy nahitana firy azy izay. Toa ny mahazatra, hikisaka eny amin’ny Le Garage Antsahavola izy ireo amin’ny 10 ora alina.

“After work”, eny amin’ny Gassy Country House Ivato. Anio, manomboka amin’ny 6 ora hariva ny kalokalo an-gitara, iarahan’i Fanilo Poppin’s eo amin’ny gitara sy i Misaina eo amin’ny feo. Hitety karazan-kira maro izy ireo, mialoha ny hidirana amin’ny tapany faharoa, izay hivadika ho fandihizana.

Tanterahina eny amin’ny AFT Andavamamba, manomboka ny 1 jolay 2024 hatramin’ny 31 jolay 2024, ny “Tantara fohy” fampirantiana, “Art plastique”, iarahana amin’ny mpikambana ao amin’ny “Plum’art”. Ny sanganasan’ireo mpikambana sokajina ho vao misandratra no ho hita mandritra izany. Natao izany ho fanandratana sy fanomezana sehatra azy ireo.

Hisy ny velakevitra iarahana amin-dRanjatohery Harilala, eny amin’ny Lapan’ny Akademia Malagasy Tsimbazaza, anio. Hiresahana mahakasika ireo andrarezin’ny teny malagasy sahala amin-dRabary, Randzavola Henri, Ravelojaona no horesahina amin’izany. Tafiditra ao anatin’ny famaranana ny “Iray volan’ny teny malagasy” ihany koa ny hetsika.

Fotoana manaraka ho an’ireo mpankafy ny mozika mavesatra. “Metal scène 2024”, hotontosaina ny 30 jona ho avy izao, manomboka amin’ny 3 ora tolakandro, ny eny amin’ny Kianja Maitso Analamahitsy. Tarika telo efa manana ny lanjany eo amin’ny mozika metal no hifampizara sehatra mandritra izany: ny tarika Apost, Iniah ary Manïa.
Nosafidiana manokana ireto tarika ireto, araka ny filan’ny mpankafy. Efa elaela no tsy tazana an-tsehatra ankalamanjana ny tarika Apost, na dia nanohy ny mozika teo ihany aza. Manana hira vaovao hozaraina amin’ny mpankafy ry Abass sy ny tariny
amin’io. Tarika iray manana sanganasa maha te hihaino foana kosa ny Iniah. Hain’izy ireo ny nanafangaro ny mavesatra sy ny maivana, hanome mozika mora raisin’ny sofina. Vao namoaka rakitsary medley izy ireo, hanomezana fofony ny mozikan’ny Iniah. Seho manaraka taorian’ny tetsy amin’ny Ivokolo Analakely kosa ity ho an’ny Manïa. Manan-kozaraina amin’ireo mpankafy izy ireo, toy ny “Lasanao”, hira vaovao hivoaka rakitsary tsy ho ela.
Ny Giant no hikarakara ny hetsika. Efa fantatra eo amin’ny sehatry ny fikarakarana seho rock rahateo, satria izy ireo no niketrika ny “Rage of Rock”, ny Tselatra sy Kiaka, sns. Nosafidian’ny mpikarakara manokana ny Kianja Maitso Analamahitsy, noho izy toerana kelikely afaka hilalaovana feo tsara, ka mampiaina kokoa ny fampisehoana.

Zo ny Aina

Hetsika lehibe ho an’ny tontolon’ny gadona metal sy Rock maneran-tany , atao isan-taona, ny « Hellfest Open Air Festival ». Miditra amin’ny andiany faha-17 izany amin’ity taona ity.

Tanterahina ao Clisson Frantsa, ny 27 hatramin’ny 30 jona 2024, ny «Hellfest Open Air Festival». Hetsika lehibe eo amin’ny tontolon’ny mozika mavesatra, andraisan’ny tarika avy amin’ny firenena maro anjara. Anisany sy misolo tena ny fianakaviamben’ny mozika metal eto Madagasikara, ny tarika LohArano. Ankoatra ny fampivondronana ny mpiangaly ity gadona ity, manerana izao tontolo izao, tanjona ny hisian’ny fifampizarana eo amin’ny samy mpanakanto mpihira mivoy ny mavesatra.
Efa any an-toerana ny tarika LohArano miatrika ny “Hellfest Open Air Festival”, amin’izao. Tsiahivina fa anisan’ny mandray anjara amin’ity hetsika lehibe ity ihany koa ireo tarika malaza eo amin’ny gadona metal sy rock. Anisan’izany ny Metallica, Avenged Seven Fold, Simple Plan, Baby Metal, Mr Bungle…. An-jatony ny tarika mivoy ireto gadona ireto mandray anjara amin’ny seho. Ho an’ny tarika LohaArano manokana, ao amin’ny sokajy “HellStage” no misy azy ireo, ary efa nisy ny fiakarana an-tsehatra, omaly. Anisan’ny nifampizara sehatra ta­min’izy ireo, tamin’izany, ny tarika Anenged Seven Fold, izay anisan’ny manana ny maha izy azy eo amin’ny tontolon’ny gadona metal sy rock.
Reharehan’izy ireo ny fandraisana anjara amin’ity fampisehoana ity sy ny fihaonana amin’ny tarika mivoy ny gadona mavesatra, avy amin’ny lafivalon’ny tany. Ankoatra izay, mifanindry an-dalana amin’izay hatrany, manatanteraka fitetezam-paritra any Frantsa ihany koa ny tarika, nanomboka ny fiando­han’ity volana ity.

Lin

Efa manomana sy eo am-pikarakarana ny «Festival de la Parole 2024», ny tomponandraikitra. Anisan’izany ny «Club d’art oratoire et Débat» (CAOD), avy ao amin’ny sampam-piofanana Lalàna sy siansa politika eny Ankatso, miaraka amin’ny mpanohana maro. Lohahevitra hovoizina mandritra izany ny hoe «Fetsival de la Parole : Une plateforme pour le changement». Fampiroboroboana ny fampandraisana anjara ny vahoaka, indrindra ny tanora, no tanjona amin’ny hetsika.
Taorian’ny fandraisana anjara tamina fifaninanana iraisam-pirenena maro. Hisy ihany koa ny hetsika mahakasika izany eto an-toerana. Ao anatin’izany ny ahitana fifaninanana kabary, fandresena lahatra ary fanentanana ny olona mahakasika ny fikajiana sy fanavotana ny tontolo iainana. Raha tsiahivina, vao avy nandrombaka ny «Tournoi inter-universitaire de debats de la Hayes» ny mpianatra avy eo amin’ny Université Ca­tholique de Madagascar (UCM).

Lin

«Hetsika ara-javakanto sy concert de jazz». Lohateny sady lohahevitry ny hetsika iray karakarain’ny Jazz Club CGM/GZ Antananarivo sy ny ankizy ary ny tanora tezaina ao amin’ny centre Alabri Mia­rinarivo Itasy. Amin’ny ankapobeny, hanana endrika fanabeazana feno, hatrany, ity hotanterahina amin’ny sabotsy 29 jona, manomboka amin’ny 3 ora sy sasany tolakandro, eo amin’ny Place B Miarinarivo, ity. Marihina fa fanohizana ny efa nataon’ny Jazz Club CGM/GZ Antana­narivo, tany an-toerana io seho omban-javakanto (zavatra kanto) amin’ny faran’ny herinandro io.
Fantatra fa anisan’ny mandray anjara lehibe amin’ny fanabeazana ireo ankizy sy tanora ao amin’ny centre Alabri Miarinarivo Itasy ny tontolon’ny mozika sy ny hira, indrindra fa ny jazz. Mitondra fisokafan’ny saina sy fo hikaroka ny tsara kokoa hatrany rahateo ny filalaovana sy ny fahenoana ny jazz. Misy rahateo ny fiaraha-misalahy ho fampitiavana ny jazz eo amin’ny Jazz Club CGM/GZ Anta­nanarivo sy ny centre Alabri Miarinarivo Itasy.

HaRy Razafindrakoto

Lasibatry ny vaky trano ny kandidà solombavambahoaka iray monina ao amin’ny fokontany Andamasiny, kaominina ambanivohitra Mitsinjo, Toliara, afakomaly alina. Novakian’ireo olon-dratsy ny fitaratra. Niditra an-keriny tao an-trano izy ireo ary nandroba ny entana sarobidy, tamin’ny 9 ora alina. Voaroba ny solosaina miisa roa sy finday telo. Nanamafy koa ny tompon-trano fa lasan’ireo tsy valahara ny antontan-taratasy sarobidy samihafa. Nitsoaka nandositra ireo jiolahy taorian’ny asa ratsiny. Niroso amin’ny famotorana momba ity raharaha ity ny mpitandro filaminana ao an-toerana. Tsy manana ny mombamomba ireo nahavanon-doza hatreto ny tompon-trano lasibatra.
Fotoana mampirongatra ny tsy fandriampahalemana rahateo ny volonandro fety toy izao. Fanararaotan’ireo mpanao ratsy sy mpanao hala-boty, lasibatra amin’izany ny fitaovana sarobidy, ny kojakojan-tokantrano, hatramin’ny biby fiompy.

Tsiferana R.

Naiditra vonjimaika am-ponja ireo olona telo voasambotra teto Antananarivo momba ny trafikan-tsokatra, afakomaly. Nahatraran’ny mpitandro filaminana zana-tsokatra miisa 37 teny amin’ireo olona ireo. Kazaran-tsokatra ahina ho lany tamingana « radiata » ny 36 tamin’ireo biby ireo. Anisan’ny maro mpitady eo amin’ny tsena maizina iraisam-pirenena rahateo io sokatra io. Karazany “pyxis” kosa ny iray fanampiny. Efa mpivelona amin’ny famarotana io karazam-biby arovana io ireto olona telo ireto. Ankoatra azy ireo, olona iray hafa koa nosamborin’ny mpitandro filaminana tany Toliara. Mpiara-miombona antoka ihany izy ireo. Mitohy ny fikarohana ny atidoha miray tendro amin’ireo olona efatra ireo. Tsy maintsy fongorana ifotony ireo olon-dratsy minia mivarotra ny harem-pirenena an-tsokosoko tahaka izao, araka ny nambaran’ny tomponandraikitra eo anivon’ny minisiteran’ny Tontolo iainana.

Tsiferana R

Nanambara tao amin’ny tambajotran-tseraserany, omaly, ilay mpanao judo malagasy, Rasoanaivo Laura, fa anisan’ireo mpifaninana hiatrika ny lalao Olympika “JO 2024” hatao any Paris France, afaka iray volana. Tsy maintsy niandry ny lisitra navoakan’ny Federasiona iraisam-pirenena ny amin’ireo atleta tafita amin’izany ny tenany. Izay izany vao ofisialy ny fandraisany anjara amin’ity fihaonana goavana maneran-tany ity. «Afaka ihany ny tebitebiko sy ny adintsaiko, ny fijaliana ara-batana, taorian’ny ezaka natao nandritra ny taona maro sy ny fiandrasana ity lisitra ity», hoy izy. Nahatratra ny iray amin’ny tanjona tratrariny izany ity tompondakan’i Madagasikara sy Afrika ity.
Raha tsiahivina efa namoaka mialoha ny komity olympika malagasy (Com) fa tafita amin’ny lalao Olympika hatao any France, i Laura. Noho ny laharany teo amin’ny sehatra afrikanina sy ny isa azony nandritra ireofifaninanana iraisam-pirenena maro natrehiny no nahatonga ny Com hilaza izany.

Tompondaka

Ambivitra vao tafakatra amin’ny dingana ampahavalon-dalana i France, eo amin’ ny fiadiana ny ho tompondakan’i Eoropa, taranja baolina «Euro 2024». Fifaninanana tanterahina any Allemagne. Ny talata lasa teo, nisaraka ady sahala, 1 sy 1, tamin’i Po­logne, teo amin’ny andro fahatelo sady farany amin’ny fifanintsanana isam-bondrona ry zareo. Baolina tokana, tafiditr’i Mbappé, tamin’ny alalan’ ny Pénalty.
Tetsy an-kilany, resin’i Autriche tamin’ny isa 3 no ho 2 i Pays-Bas. Io faharesen-dry zareo Hollandais io no nahazoan’ny frantsay ny tapakila hanohizany ny diany. Nita­zona ny laharana faharoa i France manarakaraka an’i Autriche. Taorian’ny fahavitan’ny lalao, nanambara ireo frantsay mpijery baolina fa diso fanantenana tamin’ny endri-dalao nasehon’ny Les Bleus satria Pénalty no hany baolina tokana matin’ny ekipany ary tsy nahitana endri-dalao mahafinaritra.
Ankoatra izay, nisaraka ady sahala 0 no ho 0 tamin’i Slovenie i Angleterre. Tsy afapo tamin’ny vokatra azon’ny anglisy ihany koa ireo mpomba azy ireo ka nitaky ny hialan’i Southgate, mpanazatrany. Samy tsy nisy nitoko koa Danemark sy i Serbie.
Hatreto, 11 ireo firenena efa tafita amin’ny dingana ampahavalon-dalana amin’ity «Euro 2024» ity dia i Allema­gne, Suisse, Espagne, Italie, Angleterre, Danemark, Slo­vénie, Autriche, France, Pays-Bas, Portugal.

Tompondaka

Ho maina ny andro ho an’ny afovoantany sy ny ilany atsimo atsinanan’ny Nosy, manomboka anio. Vinavinaina ho maina koa izany any amin’ny faritra hafa. Mety hisy fiakarana ny maripana ambony saika manerana ny Nosy, manomboka rahampitso. Manodidina ny 5 – 24°C izany ny maraina ary eo anelanelan’ny 18 – 35°C ny tolakandro.

Anatin’ny vanim-potoan’ny ririnina izao ka tokony ho efa miomana amin’ny fanatanterahana hetsika “Famorana zaza faobe manerana ny Nosy”, hoy ny minisitry ny Fahasalamam-bahoaka, ny fiandohan’ny herinandro lasa teo. Nambarany ihany koa ny tokony hanamafisana hatrany ny fanaovam-baksiny ho an’ny ankizy.

Nanatanteraka Fizarana arendrina sy biscuit teny Ambohitahara, fokontany Ambohidratrimo, i Souleman mpikabary, afakomaly. Ankizy 200 mahery, teny an-toerana, no nisitraka izany. Tafiditra ao anatin’ny fanampiana sy fanomezan-tanana ho an’ireo fikambanam-behivavy ihany koa ny hetsika nataony.

Anisan’ny CSB nisitraka tombontsoa tamin’ny tetikasa Miarova ny ao Ampataka, izay tarihin’ny lehibeny, Andrianantenaina Princi. Vata fampangatsiahana vaventy mandeha amin’ny herin’ny masoandro no azon’izy ireo tamin’izany.
Afaka manao vaksiny isan’andro ny CSB amin’izao fotoana, satria efa arifomba ny vata fampangatsiahana fitehirizana ireo vaksiny ary mandeha andro aman’alina mihitsy izany. Efa niofana amin’ny fikarakarana ireo fitaovana ihany koa ny lehiben’ny CSB.
Teo aloha, voatery mandeha an-tongotra any Morondava maka ireo vaksiny isam-bolana ary voafetra anaty fotoana fohy ihany ny fitehirizana izany. Nandeha tamin’ny solika fandrehitra ny vatakely fitehirizana ny vaksiny tamin’izany ka manano sarotra rehefa tsy misy ny solika na tapaka ny jiro any amin’ireo toerana misy herinaratra. Potika ny vaksiny ary ariana fotsiny mihitsy.
Toerana saro-dalana, any amin’ny 50km miala ny arabe no misy ny CSB Ampataka. Tsy misy fiara fitateram-bahoaka fa dia an-tongotra no hamonjen’ny olona ny tanànan’i Morondava.
6 288 ny mponina amin’ireo fokontany 5 manodidina. Misy ireo mipetraka any amin’ny 22 km miala amin’ny CSB.
Miara-miasa amin’ireo mpanentana ara-pahasalamana ny CSB mitety fokontany manao
vaksiny mahazatra ho an’ireo ankizy sy reny bevohoka ary ny vaksiny covid19 ho an’ireo olona marefo.

Tatiana A

Nankalaza ny Aïd al-Ghadir ny mpino silamo Chiite eto Antananarivo, ny talata lasa teo. Niara-niombom-bavaka sy nisaotra an’Andria­manitra tetsy Andohatape­naka izy ireo nandritra izany. Nofaranana tamin’ny fiaraha-misakafo sy fiaraha-mifety teo amin’ireo mpino ny fotoana. “Fety lehibe ho an’ny mpino silamo izy io satria andro fanehoana sy fampahafantarana ny lehibe mpitarika, taorian’ny mpaminany farany”, hoy ny filoha nasionalin’ny Ummi Madagasikara, Sheikh Rijaly. “Rehefa akaiky ho tapitra ny fampielezana nataon’ny mpaminany farany tety an-tany dia nomen’Andriamanitra baiko izy ny hampahafantatra ampahibemaso ny olona izay nandimby toerana azy mandra-pahatonga ny farandro”, hoy hatrany izy. Lamina napetrak’ Andria­manitra ny tsy maintsy hisian’ny mpitarika ny zanak’olombelona ety ambonin’ny tany. Nambarany fa mankalaza izany avokoa ny mpino silamo rehefa mahatsapa ny hasarobidin’io andro io. Fotoana mifanindry amin’ny 18 ny volana «Dul-Hiju»1445 izy io.
Nirary soa ny vahoaka malagasy ihany koa izy ireo amin’ny fahatrarana ny asaramanitry ny fahaleovantenan’i Madagasikara. Mba hijoro hatrany ny vahoaka manoloana izao fankalazana ny fetim-pirenena izao fa tsy hiraviravy tanana. Nifanandrify tamin’ny fankalazana ny 25 jona moa io andro io, ankatoky ny Asara­manitra. Mandray anjara amin’ny fampandrosoana ny ara-toekarena sy sosialin’ny firenena ihany koa ny mpino silamo, izay marihina fa 15 isan-jaton’ny mponina.

Mino

Nidinika ny sahanasa iarahana ho an’ny taom-pianarana 2024-2025 ny fandaharanasan’ny Firenena mikambana momba ny sakafo (Pam) sy ny minisiteran’ny Fanabeazam-pirenena, ny herinandro lasa teo, nandritra ny roa andro.

Notombanana ny asa vita ho an’ny taom-pianarana 2023-2024 ary nojerena manokana ireo sekoly hisitraka ny tohana ara-tsakafo, ao anatin’ny tetikasa fiarenan’ny Rafitra ara-tsakafo eto Madagasikara (FSRP). Mite­tina 40 tapitrisa dolara ny vola hampiasaina amin’ny tetikasa avy amin’ny Banky iraisam-pirenena. Haharitra telo taona ny asa fanohanana ny fanjakana amin’ny ezaka ho fanatsarana ny sehatry ny fanabeazana. Zava-dehibe ny fitazomana ny ankizy tsy handao ny sekoly any amin’ireo toerana iharan’ny tsy fanjarian-tsakafo sy ny fahantrana.
Hisitraka sakafo mafana hozaraina any an-dakilasy ny mpianatra 24 000 eny anivon’ny sekoly 800. Ireo mpamboly miisa 20 000 eny an-toerana ihany no hividianana ny vokatra hampiasana eny amin’ny toeram-pisakafoana. Faritra voakasiky ny tetikasa ny any Androy, Anosy, Atsimo An­drefana, Atsimo Atsinanana, Vatovavy sy Fitovinany , Vakinankaratra Analamanga ary Itasy. “Tsapa fa nitondra tombontsoa ho an’ny mponina niantefany ny fividianana ny akora fototra eny amin’ny tantsaha”, hoy ny mpandrindra nasionalin’ny FSRP, Rafali­manana Olivia. Mitondra fidiram-bola tsy tapaka ho an’ny mpamboly ny fividianana ny akora fototra sady miantoka ny kalitaon’ny sakafo omena ny mpianatra.
Efa nankatoavin’ny fanjakana malagasy ity fomba fiasa ity hoentina manamafy ny fanjarian-tsakafo sy ny fanabeazana ary ny fiarenana ho fanampiana ny toekarena eny ifotony. Hitondra ny fahaiza-manaony anatin’ny fanatanterahana ny tetikasa ny Pam miaraka amin’ny minisiteran’ny Fanabeazam-pirenena. Tanjona ny hahazoan’ny mpianatra sakafo raha vao miandoha ny taom-pianarana ho avy ka vonona hifanome tanana amin’ny fanjakana ny Pam, araka ny fanazavan’ny solontenany eto amintsika, i Mamadou Mbaye.

Vonjy

“Miantso ny FFKM ny hanajana hatrany ny fahamarinana, indrindra ny voka-pifidianana. Fa mariky ny fanajana ny safidin’ny vahoaka izay tompon’ny fahefana izany, ary antoka amin’ny hisian’ny fandriampahalemana sy ny fifampitokisana eo amin’ny vahoaka sy ny mpitondra”. Io ny hafatry ny FFKM tamin’ny 23 jona ary nampitainy, afakomaly, amin’ny fiandrasana ny voka-pifidianana ofisialy. Mitaona ireo depiote nofidin’ny vahoaka hisolo vava azy hanatanteraka ny andraikitra amin’ny fanajana ny fahamarinana. Fa ny fahamarinana no manandratra avo ny firenena.
Manaraka izay, manainga anareo mba hanaja sy hanatanteraka amin’ny asa sy ny teny izay nampanantenainareo ny vahoaka nifidy anareo nandritra ny fampielezan-kevitra nataonareo. Ataovy lohalaharana ny hikatsaka ny tombontsoa ho an’ireo vahoaka maro anisa izay miaina anaty fahasahiranana lalina ankehitriny. Lehibe ny andraikitrareo, araka ny fahefana omen’ny Lalàmpanorenana anareo, ka tanteraho amim-pahamendrehana izany. Satria “Ny fahotan’ny tany mahamaro mpanapaka; fa ny fisian’ny olona manan-tsaina kosa no mampahateza ny fanjakana”. (Oha 28: 2), ary “Raha misandratra ny ratsy fanahy, dia miery ny vahoaka; fa raha ringana kosa izy, dia mihamaro ny marina”. (Oha 28: 28).
Miantso ny rehetra mba hanamafy ny fifankatiavana sy ny fanajana ka hikatsaka izay hahasoa sy hahatsara ny firenena sy ny vahoaka malagasy ny FFKM. Aoka hialana ny hambompo sy ny fikatsahana ny tombontsoa manokana, ary ny FFKM dia maneho ny fahavononany hatrany hijoro ho raiamandreny.

R. Nd.

Le ministère des Affaires étrangères, de la Coopération africaine et des Marocains résidant à l’étranger, a annoncé que Sa Majesté le Roi Mohammed VI, président du Comité Al Qods, a donné ses très Hautes Instructions pour déployer une opération humanitaire d’aide médicale, en faveur de la population palestinienne de Gaza.
Cette aide composée de 40 tonnes de produits médicaux, vise à soutenir les Palestiniens touchés par les conflits et les urgences médicales, dont de matériel de soin des brûlures, des urgences chirurgicales et traumatologiques, ainsi que des médicaments essentiels pour les adultes et les enfants en bas âge.
Le Souverain marocain a généreusement financé une grande partie de cette aide sur ses deniers personnels, témoignant ainsi de son engagement constant en faveur de la Cause Palestinienne. L’aide marocaine sera acheminée en empruntant le même itinéraire terrestre utilisé lors de l’opération d’aide alimentaire déployée sur instructions du Souverain au mois de Ramadan dernier.

Recueillis par Naisa

Mifarana anio ny fampirantiana « Firenena sy ny hery fiarovana sy filaminana », tanterahina ao amin’ ny Lapan’ny Tanànan’Antananarivo. Tratra ny tanjona, amin’ny ankapobeny, araka ny nambaran’ny tomponandraikitra. Maro no tonga nitsidika ny fampirantiana, indrindra ireo tanora sy mpianatra, izay tena noken­drena hahafantatra ny mahakasika ny hery fiarovana sy filaminana.

Tanterahina anio hariva, eny amin’ny PK 00 Soarano, ny fampisehoana “Revy mozika, ndao hana­lazy”, iarahana amin’ny tarika Jeneraly sy Njara Marcel. Mpanakanto samy manana ny maha izy azy ireto hifam­pizara sehatra ireto. Seho miavaka sy hafa mihitsy no ampanantenain’ny mpikarakara sy ireto mpanakanto ireto, ho an’ny mpankafy azy ireo.

Hifarana anio ny “podium” Analakely. Efa niaka-tsehatra ry Iraimbilanja, Kiaka, Lôla ary Mr Sayda, omaly. Hofaranan’ireo mpanakanto mpivoy ny gadona mihetsika sy ny mozika ankehitriny kosa izany, anio. Hifandimby hiakatra eo ry Raouto, Smaven, Natchou ary i Simonda. Ry Fou Hehy hatrany no hiandraikitra ny fanentanana.

Fety be ny eny Talatamaty. Hiavaka amin’ny maro ity kaominina ity, mandritra ny fankalazana ny
fetin’ny Fahaleovantena, anio sy rahampitso. Hisy fotoam-bavaka, matso, hiragasy, atsam-piderana, dihy mirindra sy fampisehoana iarahana amin-dry Oladad, Tempo Gaigy, Gasta, Nya Orchesta, Raouto, Johanne, Mijah, El Ross, Bajio, …, eny an-toerana.

Hanao hetsika ho amin’ny fanohanana sy fanampiana ny ao aminy ny sampana eo anivon’ny fiangonana katolika etsy Bemasoandro.

Mikarakara seho hira­gasy ny eo anivon’ny Lehilahy misionera katolika (LMK), eny amin’ny fiangonana katolika (Ekar) Bemasoandro, Itaosy. Hifa­nandrina amin’izany ny tarika Raveloson Jean Ba avy any Arivonimamo sy ry Sahon­drafinina zanany avy etsy Fenoarivo. Hotanterahina ny alahady 30 jona izao izany, manomboka amin’ny 10 ora maraina, ao amin’ny kianja malalaka Antanikatsaka, eny Itaosy. Hanomboka hisokatra amin’ny 8 ora maraina ny vavahady amin’izany. Ho hita eny an-toerana koa ireo sakafo sy tsakitsaky samihafa ary zava-pisotro isan-karazany. Hamidin’ireo mpikarakara amin’ny vidiny mirary izany.

Ho adin’ny samy henjana

Ho adin’ny samy henjana sy goavana io ka tsy hifampi­tsitsy ny roa tonta eny an-kianja. Na eo amin’ny zanakira na koa ny vakodrazana miaraka amin’ny dihy mampiavaka ny tarika avy. Eo koa ny feo manga sy ny fitafiana… Tana hifampitana ny roa tonta amin’ izany.
Tsiahivina fa natokana manontolo ho amin’ny fampitaovana ny fiangonana ny vola ho azo amin’izany hetsika karakarain’ny LMK Bema­soan­dro izany. Anisan’izany ny dabilio hanampiana ny efa ao anatiny amin’izao fotoana izao.

Synèse R.