Nisitraka fotodrafitrasa moderina hianaran’ny zanany ny mponina ao amin’ny fokontany Amboniavaratra, kaominina Ampanotokana, distrikan’i Mahitsy. Triatra sady simba nandritra ny taona maromaro, tsy afaka nampiasa ireo efitrano fianarana ireo intsony ny mpianatra tao an-toerana. Na­noloana io, nandray an-tanana ny fanarenena ny sekoly ta­min’ny lafiny rehetra, ny orinasa Tozzi Green. Nohavoazina avokoa ny efitrano rehetra mandrafitra ny toeram-pianarana. Tsy vitan’izay, nisitraka latabatra, hatramin’ny kitapo entina mandranto fianarana ireo kilonga mianatra eo anivon’ity EPP ao Ambonia­varatra ity. Nankasitraka ma­nokana ny ezaka ataon’ny vondrona Tozzi Green ny solontenan’ny ray aman-drenin’ny mpianatra ao an-toerana. Voavaly rahateo koa ny fangatahan’izy ireo amin’ny fanamboarana hatry ny ela io sekoly io. Tsihiavina, nanavao ny lalam-bahoaka mirefy 11 km mahery miala ao Mahitsy mampifandray ireo tanàna anatin’ny kaominina Ampano­tokana ity orinasa ity. Mandray anjara mivantana amin’ny alalan’ny famatsiana ara-tsakafo ireo mpianatra amin’ny alalan’ ny «cantine scolaire» sy sehatra hafa koa izy ireo.

Tsiferana R.

Fotoana mampiray ireo mpankafy fiara ny «Salon de l’auto» 2024. Hiavaka tanteraka ny andiany faha-14 amin’ity taona ity. Hisy ny lalao «Tombola SMS» hahazoana fiara vaovao, moto, finday avo lenta avy amin’ny Telma Madagascar ary loka maro samihafa avy amin’ireo mpanohana ny «Salon de l’auto». Marihina fa natokana ho an’ny mpanjifa Telma Madagascar ny lalao ka tsy voafetra ny fandraisana anjara ho an’ny tsirairay. Atao ny 13 oktobra kosa ny fisarihana izay tsara vintana. «Toy ny tamin’ny taon-dasa, hanolotra karazana fiara vaovao avokoa ireo mpikambana ao amin’ny Vondron’ny mpandraharaha mpanafatra fiara eto Mada­ga­sikara (GCAM) ka afaka misafidy izay tiany ilay tsara vintana», hoy ny mpikararaka ny hetsika sy ny mpiara-mio­mbon’antoka amin’ny Telma Madagascar, Raharimanjato Eli Malala, omaly, tetsy Andranobevava.
Ankoatra izay, hampiranty sy hanolotra ireo fiara vaovao sy hiaka farany ny GCAM. Ho hita mandritra ny hetsika ihany koa ny fiaingan’ny «Grand Ral­lye International de Mada­gascar», ny zoma 11 oktobra. «Zava-baovao amin’ity andiany faha-14 ny fampisehoana ny fiara mandeha amin’ny herinaratra (hybride) ho fitsinjovana sy fiarovana ny tontolo iainana» hoy ny sekretera jeneralin’ny GCAM, Ramaro­son Rado.
Tsiahivina fa hotanterahana ny 10-13 oktobra eny amin’ ny CCI Ivato ny Salon de l’auto 2024. Lohahevitra amin’ity taona ity ny hoe «fahafahana mihetsika sady maharitra» (Mobilité et Durabilité).

Henintsoa Hani

Hotanterahina ny 23 oktobra ka hatramin’ny 3 novambra ho avy izao, ny fifaninanam-pirenena amin’ ny baolina kitra lalaovina anaty efitrano «futsal». Fifaninanana karakarain’ny Federasiona malagasin’ny baolina kitra (FMF). Hisy sokajy dimy izany fiadiana ny ho tompondakan’i Madagasikara izany, ny U13 ; U15 ; U17 ary ny «véteran» mihoatra ny 35 taona sy ny mihoatra ny 45 taona.

Hiditra amin’ny andro faharoa anio ny
fiadiana ny ho tompondakan’i Madagasikara, taranja baolina kitra «world cola ligue des champions» na ny D2 National. Eny amin’ny kianja Ambohidratrimo no hifampitana ny FC Theo sy ny AS Fosa. Hifampitana, etsy amin’ny kianja Elgeco Plus Stadium kosa ny FCA Ilakaka sy ny FC Avenir du Sud. Mety efa ho fantatra eo izay hisalotra ny anaram-boninahitra.

Hitohy ny sabotsy 28 sy ny alahady 29
septambra izao, ny fifaninanana “Fety de Baskety e!”. Lalao 29 no hatao mandritra io roa andro io ary kianja 3 no handray ireo lalao ireo, toy ny efa mahazatra: Andraisoro, CEG Nanisana ary Fokontany Amboditsiry.

Hatao ny 1 novambra izao, ao amin’ny Kianja mitafon’i Mahamasina, ny fifaninanana “Combat International”, ahitana taranja 3 (K1, Jiu-Jitsu, pancrace). Fifaninanana karakarain’ny klioban’ny Guerreros Team, taranja JJB.