Nosokafana tamin’ny fomba ofisialy, omaly, tetsy amin’ny Kianja mitafo Mahamasina, ny fiadiana ny ho tompondakan’i Madagasikara, taranja baolina kitra anaty efi-trano «Futsal 2024». Tsara fanombohana ny ekipan’ny Tac Pro Kids, U13, sy ny CUA ,U15.Tsiahivina fa misy lalao ihany koa eny Ankorondrano.

Voahosotra ho tompondakan’ny “Tournoi Intercall”, andiany faharoa, taranja basikety, ny ekipan’ ny Boost, sokajy vehivavy, sy ny FFI, sokajy lehilahy. Fifaninanana natao teny amin’ny Lapan’ny fanatanjahantena, ny faran’ny herinandro teo.

Tontosa, omaly, ny antsapaka ho an’ny fifaninanana “Alley Hoop”, taranja basikety, andiany faha-6. Fifaninanana izay hatao ny 2 sy 3 novambra izao, eny amin’ny Lapan’ny fanatanjahantena Mahamasina.

Araka ny fikarohana natao omaly, noroahan’ny tomponandraikitra tao amin’ny klioban’ny Man­chester United FC, Angleterre, ny mpanazatra, i Eric Ten Hag. Tsiahivina fa noho ny vokatra ratsy azon’ity klioba anglisy ity matetika no nahatonga izany fanapahan-kevitra izany.

Hiditra amin’ny andro fahatelo, anio, ny fiadiana ny amboaran’i Madagasikara, taranja volley-ball, ho an’ny sokajy latsaky ny 23 taona, lahy sy vavy. Fifaninanana nanomboka ny 27 oktobra teo ary hitohy hatramin’ny 3 novambra izao, any Fianarantsoa, tohanan’ny Telma Madagascar. Ho an’ny ekipan’ny GNVB, manana solontena avokoa ny sokajy lahy sy vavy. Fandresena avy hatrany no azon’izy ireo, ny alahady lasa teo ary nitohy omaly izany. Samy nilalao ary samy nahazo fandresena, na ny lahy na ny vavy, ho an’ity ekipan’ny Zandarimariam-pirenena ity. Teo amin’ny sokajy vehivavy, nandavo ny ekipan’ ny CVBF Atsimo Atsinanana ny GNVB Analamanga, tamin’ny seta 3 no ho 0 (25-14/25-19/25-15). Teo amin’ny lehilahy kosa, tsara fanombohana ihany koa ny GNVB lehilahy, izay nandavo ny GSVBC, tamin’ny seta 3 no ho 0 (25-18/25-12/25-18) ary nahazo fandresena nanoloana ny Squad X, omaly.
Ekipa nahazo vokatra tsara ihany koa, tao anatin’izay 2 andro izay, ny EVBI Ihorombe, nandresy ny MVBC, tamin’ny seta 3 no ho 2 (15-25/25-21/28-25/25-23/15-8), teo amin’ny sokajy vehivavy. Seta 3 no ho 0 (25/18, 25/13, 25/16) kosa no nanilihan’ny EVBI ny VBLC, teo amin’ny sokajy lehilahy.

Mi.Raz

Tapitra teo amin’ny fifanintsanana isam-bondrona ny dian’ny Barea de Madagascar, sokajy vehivavy, ho an’ny fiadiana ny ho tompondakan’ireo firenena aty amin’ny tapany atsimon’i Afrika “Cosafa cup 2024”.

Faharesena iray, ady sahala iray ary fandresena iray. Io no vokatra azon’ny Barea de Mada­gascar, sokajy vehivavy, teo amin’ny fiadiana ny ho tompondaka ho an’ireo firenena aty amin’ny tapany atsimon’i Afrika “Cosafa cup 2024”, taranja baolina kitra. Isa 4 ihany no azon’ny Barea, tao anatin’ny sokajy “B” ary nametraka azy ireo teo amin’ny laharana fahatelo.

Nifarana teo, araka izany, ny lalan’ny Barea de Mada­gascar. Raha ny lalao farany nataon’ny tovovavy malagasy, omaly, nisaraka ady sahala samy tsy nisy nitoko tamin’i Botswana izy ireo. Fihaonana notanterahina tao amin’ny kianja Isaac Wolfson Stadium. Niady ny lalaon’ny roa tonta ary tena nanohitra hatramin’ny farany ny Barea de Mada­gascar, notarihin-dry Christina sy i Edoxie ary Ny Kanto.
Betsaka ny baolina tokony ho tafiditra fa mikoropaka na mitavozavoza rehefa eo am-pototry ny tsatoby ireo lohalaharana malagasy.
Vao niditra ny fizaram-potoana faharoa, nilalao 10 ny Barea de Madagascar. Na­hazo karatra mena i Sarah. Na teo aza izany, tsy nampihemotra ny tovovavy mala­gasy fa nanafika hatrany saingy tsy nety nikobana mihitsy ny haraton-dry zareo Bo­tsoaney.
Tetsy ankilany, niezaka nanafika ihany koa ny Bo­tsoaney, saingy tsara rafitra ny fiarovantenan’ny Barea ka tsy afa-nandingana izy ireo.

Hisolo tena ny sokajy “B” any amin’ny manasa-dalana i Malawi, izay nanamontsana ny Maorisianina, tamin’ny isa mavesatra 9 no ho 0.

Anisan’ny efa tafita amin’ ny manasa-dalana ihany koa ry zareo Afrikanina Tatsimo. Hotanterahina ny alakamisy 31 oktobra ho avy izao ny ankatoky ny famaranana roa.

Tompondaka

Nifarana omaly, teny amin’ ny Kianjan’ny Kanto Maha­ma­sina, ny fampisehoan’ny tarika Rossy. Fampisehoana natao nandritra ny telo andro, na­nomboka ny zoma 25 oktobra 2024 hatramin’ny omaly. Tan­jon’ny fampisehoana ny fampahafantarana ny rakikiran’ny tarika, izay azo jifaina eo anivon’ny Moozik. Tonga maro niaraka nitapolaka tamin’ny tarika Rossy ny mpankafy azy. Seho goavana rahateo no natolotry ny tarika ho an’ireo mpankafy.
«Zoma manifika», «Sabo­tsy mifankahita» ary «Alaha­din’ny fianakaviana» no nentin’ ny tarika Rossy nanome fahafaham-po ireo mpankafy azy. Tonga maro nihanoka izany ny mpankafy ny tarika ny alin’ny zoma sy ny andron’ny alahady, raha somary vitsy kosa no niatrika ny fampisehoana ny alin’ny sabotsy. Hira sy gadona maroloko no nokaloina nandritra ireo telo andro ireo. Anisan’izany ny hira mihetsiketsika nahafantarana ny tarika hatramin’izay. Teo ihany koa anefa ireo hira milamindamina sy hira fiderana. Ankoa­tra izay, anisan’ny nanome endrika ny seho ihany koa ny fiakarana an-tsehatr’ireo handimby an’i Rossy, araka ny nambarany. Anisan’izany i Tinoh sy Jarina, Malagasy tanora tena mana-talenta, izay nandresy nandritra ny fifaninanana nokarakarain’ny tarika.

Lin

Notanana am-ponja ireo telo lahy anaty tambajotra mpangalatra moto tao Antsirabe, ny zoma 25 oktobra teo. Naharay fitarainana avy amin’ny olon-tsotra ny mpitandro filaminana momba ny fisiana tranga halatra moto miseholany ao an-toerana. Nanao fikarohana ny mpitandro filaminana eo anivon’ny UIR. Fantatra tamin’ny alalan’ ny fanadihadiana ny toerana misy ireo olon-dratsy, ahina amin’io halatra io. Nosam­borina ny lehilahy iray. Natao famotorana, nitoroka ny mpiara-miombon’antoka aminy izy. Lehilahy roa hafa tra-tehaka rehefa natao ny vela-pandrika. Mpanamboatra moto ny iray. Mpandray ny entana halatra kosa ny iray izay sady mpanafina ireo moto halatra. Na­hatrarana moto roa teny amin’ ireo olon-dratsy.
Natolotra ny fampanoavana taorian’ny famotorana lalina teny anivon’ ny kaomisaria Centrale ireo mpangalatra moto ireo.

Tsiferana R.

Vonona hamokatra angovo avy amin’ny
fanodinana fako ny orinasa Cambridge Industries. Manodidina ny 150 tapitrisa dolara ny fampiasam-bola hataony, hamokarana angovo 50 MW, ka avy amin’ny fako eny Andralanitra ny 20 MW, raha avy amin’ny masoandro ny 30 MW. Mahatratra 7 500 ny asa hiforona amin’izany. Nisy ny fihaonan’ny mpitantana ny orinasa tamin’ny filoha Rajoelina Andry, ny alakamisy 24 oktobra teo.

Am-pifandrifiana ao anatin’ny Politika
ankapoben’ny fanjakana (PGE) ny lafiny angovo madio. Entina hanatrarana ny Tanjon’ny fampandrosoana maneran-tany ODD7, ny angovo madio sy maharitra, maoderina amin’ny vidiny takatry ny rehetra. Hirosoana ny fandrahoan-tsakafo amin’ny angovo madio, mba hialana amin’ny fandripahana ala, ny fahalotoan’ny rivotra, hampihenana ny tahan’ny Malagasy maty vokatry ny fampiasana kitay sy saribao.

Nandray anjara tamin’ny Fifanarahana
iraisam-pirenena mahakasika ny karazan-javamananaina “Cop16”, natao tany Cali Colombie, ny fikambanana tanora Malagasy Youth Biodiversity Network (MYBN). Navoitran’ny solotenany nandritra ny famelabelaran-kevitra fa manana ny anjara toerany lehibe ny tanora amin’ny fanatanterahana ny paikadim-pirenena sy ny drafitrasa mahakasika ny zavamananaina (SPANB) aty Madagasikara.

Nihaona tamin’ny minisitry ny Fambolena sy ny fiompiana (Minae), Hajarison François, ny delegasiona notarihin’ny fi­lo­han’ny Tranoben’ny tantsaha mpamokatra, Razafim­bololona Angeline, ny 23 oktobra teo. Nangataka fiaraha-miasa sy tohana avy amin’ny minisitera ity fikambanana ity hanamafisana ny fampiofanana ny mpikambana, entina hampitomboana ny vokatra. Nambaran’ ny minisitra fa hisy ny fihaonambe iraisam-pirenena ho an’ny fambolena sy fiompiana (Forum international de l’agriculture). Anisan’ny ho hita mandritra io hetsika io ny lafiny fanodinam-bokatra, sehatra hanomezan-danja ny mpamokatra. Fotoana hampivondronana ny tantsaha, hamolavolana ny rafitra ara-pamokarana, entina hampiakarana ny taham-bokatra.
Eo koa ny fakan-kevitra eo amin’ny fianakaviamben’ny tantsaha, ny sehatra tsy miankina ary ny mpiara-miombon’antoka. Tanjona ny hampandrosoana ny tontolo ambanivohitra amin’ny seha-pamokarana samihafa, ary ahafahan’i Madagasikara manondrana any ivelany.
Vovonana ivondronan’ny fikambanan’ny tantsaha anarivony ny Tranoben’ny tantsaha mpamokatra, miparitaka any amin’ny faritra miisa 18.
Marihina fa vao lany voafidy hitantana ny Tranoben’ny tantsaha mpamokatra mala­gasy (TTMM), mandritra ny 6 taona indray Razafimbololona Angeline, ny fiandohan’ny septambra teo.

Njaka A.

Anisan’ny foto-piveloman’ny mponina ny jono ao amin’ny farihin’Andranotapahana Ambohidratrimo. Mamatsy hazandrano an’i Talatamaty sy Ambohidratrimo ary indrindra ny aty an-dRenivohitra. Nandrotsahana zana-trondro tilapia miisa 25 000 tao amin’ny farihy, ny 23 oktobra teo, avy amin’ny fikambanana Fanilon’i Marovatana sy ny fikambanana Ezaka Firaisankina. Natao ity hetsika ity mba hiteraka tombontsoa ho an’ny mpanjono, sady hampitomboana ny vokatra hazandrano sy hanatsarana ny fidiram-bolany. Nohararaotin’ny talem-paritry ny Jono ny nanentana ny mponina ny mba hanajana tanteraka ny fe-potoana fikatonan’ny fanjonoana amin’izao fotoana izao, satria ahafahan’ny trondro manatody sy hitomboany ihany koa.
Nanatrika ny fotoana ny talem-paritry ny Jono sy ny fampiroboroboana ny toekarena manga Analamanga. Teo koa ny sefo distrika Ambohidratrimo, ny ben’ny Tanàna ny kaominina Talatamaty sy Ambohidratrimo ary ny sefo fokontany isanisany.

Njaka A.

Voafantina tamin’ity herinandro ity ireo Malagasy mpikatroka ny taranja Jiu-jitsu Breziliana, hiatrika ny fiadiana ny ho tompondaka maneran-tany, hatao any Abu Dhabi, ny 6 hatramin’ny 16 novambra ho avy izao. Araka ny vaovao nampitain’ny Federasiona mala­gasin’ny JJB, 24 miandahy izy ireo no niatrika fampivondronana ary 15 amin’izy ireo no voafantina. Efa vonona ny hianto-tena ny folo amin’izy ireo, izay efa fantatra talohan’ ny fampivondronana izany, ka ny mpikatroka 6 mianadahy no niantsorohan’ny federasiona sy ny mpanohana ny fiantohana ny hoenti-manana rehetra.
Tsiahivina, niatrika ny fampivondronana voalohany izy 24 mianadahy ny 2 oktobra lasa teo ary nisy ny sivana natao ka 15 mianadahy no hihazo an’i Abu Dhabi hiatrika ity fiadiana ny ho tompondaka maneran-tany ity. Tamin’ny alalan’ny fifaninanana natao teto an-toerana no nitsongana ireo atleta niatrika fampivondronana, raha ny fanazavana. Tsy mbola fantatra ny andro hiangan’ny delegasiona malagasy ary mbola manao antso amin’ireo malala-tanana ny federasiona sy ireo mpikatroka mba hahafahana manamora ny fiantohana ny hoenti-manana rehetra ilain’izy ireo.

Mi.Raz

Ireo solotena malagasy ho any Abu Dhabi

Rasamy Anoharana Andy Vola Manjaka (Checkmat), Randriamanga Zo Aina Tsilavina (Guerreros), Rakoto­maria Tsinjofiniavana (One Tribe), Rakotondralam­bo Fifaliana Andrianjaka (One Tribe) Rakotobe Chuk Hen Shun Nofy Mica (Checkmat), Rafidinomena Toavin-Tafita (Guerreros).

Mianto-tena
Willy (Checkmat), Chafik (Checkmat), Nomasy (Che­ck­­mat), Aiky (Checkmat), Tsiresy (Checkmat), Adria­no (Guerreros), Christian (Guerreros), Tsivery (Guer­reros), Mikaia (Southside), Andry (Guerreros Team).

Tafiditra ao anatin’ny «All Star» i Tantely sy Tiffany, nandritra ny fiofanana «Fiba Africa Regional Youth Camp», natao tany Abidjan, Côte d’Ivoire. Fiofanana ny 21 hatramin’ny 24 oktobra lasa teo, natokana ho an’ny mpilalao mendrika voafantina avy amin’ny firenena afrikanina 22 izy ity.
Mizara ny traikefany ho an’ireo judokas
malagasy, sokajy Minimes sy Cadets, Rasoanaivo Razafy Laura. Misy ny kotrana hiarahana aminy isaky ny alarobia sy sabotsy, ka lohahevitra ny alarobia 23 oktobra teo ny mahakasika ny “Kumikata en compétition”. Hitohy anio, eny amin’ny Dojo Esca, ny fanazarana omen’i Laura.
Ho fiatrehana ny fifanintsanana hiadiana ny tapakila handraisana anjara amin’ny “Chan 2024”, hatao ny 27 oktobra ho avy izao ny fampivondronana voalohany, ho an’ ireo Malagasy mpilalao voafantina nandritra ny D2 Nasionaly sy ny “Pureplay Football League” (PFL). Tsiahivina fa Rakotondrabe Romuald Felix na ny Coach Rôrô no mpanazatra ny Barea amin’izany.
Nanapa-kevitra ny hijanona tsy hanohy intsony ny fiangaliana ny taranja MMA (Mixed Martial Arts), ny Malagasy mpikatroka, Razafiarisona Iony. Atleta malagasy milaravinahitra any Frantsa an-taonany maro izy izao nisafidy ny hijanona tsy heady izao intsony, rehefa naha­tsapa fa efa reraka ny vatany.

Nambaran’ny filohan’ny Disciples FC Vakinankaratra, Johny Rijaniaina, omaly, fa nalain’ny Enppi Club avy atsy Egypte ny lohalaharan’izy ireo, Randrianarijaona Tendry Mataniah. Maharitra taona iray eo ny fifanarahan’ny roa tonta ary azo havaozina izany. Tsara marihina fa mitana ny laharana fahasivy amin’ny fiadiana ny ho tompondakan’i Egypte, diviziona voalohany, ny Enppi Club.
Klioba telo no nanaovan’i Tendry andrana tany an-toerana. Ankoatra ny Enppi Club, tao ihany koa ny Pyramids FC sy ny El Gouna. Ny El Gouna, nanaiky ny haka ity Malagasy lohalaharana ity saingy tsy nifanaraka ny roa tonta teo amin’ny fepetra napetraky ny klioba. Efa hanomboka tsy ho ela ny fifanin­tsanana any Egypte ka tsy afaka hiverina aty an-tanindrazana i Tendry, raha ny nambaran’ny lehiben’ny Disciples FC. Mijanona ho tsiambarantelo eo amin’ny klioba sy i Tendry kosa ny lelavola nanaovana ity fifindrana ity.
Efa nandalo tao amin’ny AC Sabnam, Tanà FC, Cnaps Sport ary Kinga Sport i Tendry.
Ankoatra izay, misy mpilalao roa vaovao nifindra ao amin’ ity klioba avy any Vakinankaratra ity dia i Donga, hirakiraka Fosa Juniors Boeny sy i Manda na i Bota, mpiandry haraton’ ny Ajesaia teo aloha. Miezaka mametraka ny rafitra matihanina tanteraka ny Disciples FC ankehitriny. Ao anatin’izany ny fisian’ireo ekipa zandriny sy ny sokajy vehivavy.

Fitia Randria 

Hifantoka atsy Afrika Atsimo indray ny sain’ny mpitia baolina kitra, amin’ity faran’ny herinandro ity. Hiaka-tsehatra mantsy, anio, ny Barea, vehivavy, eo amin’ny fiadiana ny “Cosafa cup”. Hidona amin’i Malawi izy ireo, anatin’ny vondrona “B”.

Hiatrika ny andro faharoa amin’ny fiadiana ny ho tompondakan’ireo firenena aty amin’ny tapany atsimon’i Afrika, taranja baolina kitra, vehivavy (Cosafa cup 2024) ny Barea de M/car, anio. Fihaonana hotanterahina ao amin’ny Kianja Nelson Mandela University Athletics Stadium, Afrika Atsimo.
Hifandona amin’i Malawi, ekipa tompondaka farany, ny Malagasy amin’izany. Hien­drika famaranana kely, araka izany, ny fihaonan’ny roa ton­ta, izay ao amin’ny vondrona “B”. Raha tsiahivina, mitarika vonjimaika ny Barea, taorian’ ny andro voalohany. Ny Ma­la­ga­sy irery mantsy no ha­ny na­ha­zo fandresena tamin’ ireo eki­pa 4. Nandavo ny Club M Maurice, tamin’ny isa 5 no ho 1.
Nisaraka ady sahala 1 sy 1 kosa i Malawi sy i Botswana. Hitady fandresena fanindroany hahatsara toerana, hiakarana amin’ny dingana manasa-dalana izany ny Barea amin’ity. Raha ny endri-dalao nasehon’ny Barea aloha, mety tsy hananosarotra amin’izy ireo ny handresy ny malaoita. Efa nanao fanintsiana tamin’ny zavatra tsy nety rahateo ny mpanazatra, taorian’ny fihaonana tamin’i Maurice.
Ny fahazoana isa telo amin’ity lalao anio ity dia mampisy tsirim-panantenana hanohizana ny lalana ho an’ny Barea saingy ny baolina boribory ary tsy maintsy hiady aloha, fa ny mpifanandrina rahateo tsy hitazam-potsiny fa tsy maintsy hiaro ny anaram-boninahitra eo am-pelantanany.
Etsy ankilany, heverin’ny rehetra fa mety tsy hahatohitra an’i Botswana ny maorisianina, ho an’ny fihaonana ilany amin’ity sokajy misy ny Barea ity.
Ny lalao farany ao amin’ity vondrona “B” ity dia ny fihaonana amin’i Botswana, ny ala­tsinainy ho avy izao. Eo no hahalalana ny ekipa tafita amin’ny manasa-dalana.

Tompondaka

Nizarana karatra maha mpamokatra ny tantsaha any Ihosy, any amin’ny faritra Ihorombe, ny alakamisy teo. Natolotra tamin’io fotoana io koa ny taratasy maha mpamokatra masomboly matihanina ny tantsaha any Amoron’i Mania, Matsiatra Ambony ary Ihorombe. Teo koa ny fampisehoana ny fampiasana ny milina fanetsana enti-tanana, novokarin’ny tetikasa Defis, eo ambany fiahian’ny minisiteran’ny Fambolena sy ny fiompiana.

Dinihina any Bruxelles ny fampiharana ny lalan’ny OMC, manoloana ny fihazakazaky ny varotra elektronika maneran-tany. Ao anatin’izany ny fomba maro ividianana entana avy any ivelany, tsy ampiasana lelavola « crypto money ». Karohina ny vahaolana eken’ny rehetra ka hampiharin’ny firenena maneran-tany. Mandray anjara any an-toerana ny lehiben’ny sampandraharahan’ny vidiny sy ny fiavian’ny entana ao amin’ny ladoany malagasy.

Manodidina ny 150 tapitrisa dolara ny fampiasam-bola hanamafisana ny famokarana herinaratra eto Antananarivo ataon’ny orinasa Cambridge Industries. Tanjona ny hamokatra herinaratra 50 MGW ka azo avy amin’ny fanodinana ny fako ao Andralanitra ny 30MGW raha azo amin’ny toeram-pamokarana angovo avy amin’ny masoandro ny 20 MGW. Mikendry hanangona fako hatramin’ny 1 500 taonina isan’andro, eto Antananarivo, ny orinasa hanatanterahany ny tetikasa.

Notontosaina, ny alarobia sy ny alakamisy lasa teo, teny amin’ny Kianja CFFA Andoharanofotsy Ia­vo­loha, ny andro faharoa ny fiadiana ny amboaran’ny « Grand Tournoi d’Antananarivo (GTA) ». Tsy nampoizin’ny rehetra ha­trany ny vokatra teny an-toe­rana. Anisan’izany, ny fandresen’ny AS Ste Anne Espoir,
1 no ho 0, ny FC Rouge, izay klioba mifanintsana amin’ny diviziona voalohany « Pure­play Football League (PFL) ». Voatazon’ny Disciples FC Espoir ady sahala 2 no ho 2 kosa ny Elgeco Plus, tompon’ ny amboaran’i Madagasikara farany teo. Tsara marihina fa ny Disciples FC, nitarika 2 no ho 0 voalohany, izay vao nanenjika ny Elgeco.
Ao amin’ity vondrona “D” ity, azo lazaina fa efa tafita any amin’ny dingana manaraka ny AS Ste Anne Espoir, manana isa enina izy ireo, taorian’ireo fahombiazana azony tamin’ny Elgeco Plus sy ny FC Rouge. Mila maka fandresena iray amin’ireto ekipam-piangonana ireto kosa ny Disciples zan­driny vao tafita any amin’ny dingana manaraka. Ho toy ny famaranana kely, araka izany, ny fifanandrinan’ny roa tonta amin’ny faran’ny herinandro ho avy io, etsy amin’ny Kianja CFFA Andoharanofotsy ihany. “Marina fa efa tafita izahay, saingy ho raisinay toy ny lalao goavana hatrany ny fifanan­drinana amin’ny Disciples Espoir”, hoy ny mpanazatran’ ny AS Ste Anne Espoir, Coach Romeo.
Ankoatra izay, nisaraka ady sahala tsy misy nitoko, 0 no ho 0, ny Disciples FC PFL sy ny Cosfa PFL, omaly, teny an-toerana ihany. Samy ma­nana isa efatra izao ny roa tonta, ao amin’ny sokajy B misy azy ireo.

Fitia Randria

Hafindra eny Bongatsara, atsimondrano, ny toby fitahirizan-tsolika etsy Ankorondrano. Hatao izany, noho ny fananamboarana lalana vaovao eny Anko­rondrano mankeny amin’ny kianja Maki Andohatape­naka. Etsy ankilany, miisa 65 ny ampahatany hananganana ny fitahirizan-tsolika eny Bongatsara. Hiantohan’ny orinasa Logistique Petrolière ny fanonerana ny tompon-tany.
Tanterahana ao Mahajanga ny 24 ka hatramin’ ny 27 oktobra ny hetsika « Salon des acteurs écono­mi­ques » andiany faharoa. Ambohi-pihaonan’ireo mpisehatra ara-toekarena samihafa ny hetsika sy hanandratana ny fahaiza-manao ary ny vokatra malagasy. Mahatratra hatrany amin’ny 100 ny trano heva azo tsidihina mandritra ny hetsika.
Hatao any Azerbaidjan ny fivoriamben’ny firenena mikambana (Cop 29) mahakasika ny fiovan’ny toetr’ andro, ny 11 hatramin’ny 22 novambra ho avy izao. Man­dray anjara amin’ity fihaonambe ity i Madagasikara, hampiseho ny fahavononany hiady amin’ny fiovan’ny toetr’andro. Ho karohina koa ny mpiara-miombon’antoka hamatsy vola antsika.
Manana tanjaka hatrany amin’ny 180 térahwattheures ny fahafahan’i Madagasikara hamokaratra herinaratra avy amin’ny rano. Mametraka ny firenena mala­gasy eo amin’ny laharana fahatelo aty Afrika izany. Hatreto, mbola ny 0,49% monja amin’io tanjaka io no voatran­draka hatramin’izao ka manakana ny fampiasam-bola manatsara ny harinkarena.

Toy ny tamin’ny taona 2016, hotazana mialoha ny letisia any amin’ny faritra atsinanana ho an’ity taona ity. Vinavinaina ho eo anelanelan’ny 11 sy 14 novambra izany, hoy ny ivontoerana teknika mpanara-maso ny famokarana ao Toa­masina (CTHT). Hihena ihany koa ny vokatra noho ny habe­tsaky ny orana hatramin’ny niandohan’ny volana oktobra, izay niantoka ny famokarana sy nampihena ny hafanan’ny rivotra. Nasongadin’ny CTHT fa voakasik’ity tranga ity ireo toerana mpamokatra ao amin’ ny faritra atsinanana fa indrindra ao amin’ny faritra avaratra. Hiantraika mivantana amin’ny fanondranana izay novinavinaina ho 18 000 taonina ny zava-misy. « Ahina hampiakatra ny vidin’ny letisia eny an-tsena ny fihenan’ny vokatra satria hi­fandrombahana ny letisia », hoy ireo mpamokatra.
Voamarin’ireo mpikaroka tao anatin’ny fanadihadiana nataony ny 14 oktobra fa mitotaly 1 667 ireo fototra letisia ka ao Brickaville ny 690 raha ao Toamasina kosa ny 649 ary any Fenoarivo atsinanana ny 328 amin’izany. Mbola maitso avokoa ny 100% ny voankazo ary eo anelanelan’ny 12 ka hatramin’ny 25mm eo ny hangezany tamin’ny fotoana na­naovana ny fanadihadiana raha teo amin’ny 8-18mm izany tamin’ny taon-dasa.
Mbola hisy ny fanadiha­diana hataon’ny eo anivon’ny CTHT ny faran’ny volana izao handrosoany tolo-kevitra in­dray mahakasika ny vokatra letisia.

Henintsoa Hani

Miavaka ny « Salon internationale de l’habitat » andiany faha-26 atao eny amin’ny Forello Expos Tanjombato, nanomboka ny 24 ka hatramin’ny 27 oktobra. « Omen-danja manokana ny tontolo iainana sy ny fikarohana mifandray aminy », hoy ny sekreteram-panjakana misahana ny Tanàna vaovao sy toeram-ponenana, Andriamanohisoa Gerard, omaly, nandritra ny fanokafana ny hetsika. Mivoatra, hoy izy, ny fanorenana na eo amin’ny taotrano na ny akora na ny angovo ampiasaina. Vahaolana manoloana ny fitomboan’ny mponina ny manorina trano mahaleo tena (maison autonome) hampihenana ny fandaniana sy hampiasana ny akora mitsinjo ny tontolo iainana. Ankoatra izay, manampy amin’ny fanorenana ny fampiasaina ny saina voatr’olombelona (intelligence artificielle). Horesa­hina manokana, mandritra ny hetsika, ireo akora fampiasa hiarovana ny tontolo iainana. Marihina fa hisy ny lohahevitra hovoaboasan’ireo mpisehatra sy matihanina avy eto an-toerana sy avy any ivelany mahakasika ny tontolon’ny fanorenana, mandritra ny efatr’andro hanaovana ny hetsika. Mampiranty sy mampahafantatra ny fahaiza-manao isan-karazany ihany koa ireo mpandray anjara manodidina ny 150.

Henintsoa H.

Hampiakarina ny saran’ny herinaratra ho an’ny orinasa indostrialy. Fanapahan-kevitra efa nifanarahan’ny fanjakana sy ny Vondrona orinasa tany aloha ity hampiharina ity.

Nivoaka tao amin’ny fi­lan­kevitry ny minisitra, ny 23 oktobra teo, fa nankatoavina ny fanitsiana ny saran’ny herinaratra Jirama, ao anatin’ilay sokajy « Optima Business ». Voakasik’izany ny orinasa indostrialy mampiasa tanjaka ambony (haute tension HT) sy ny antenantenany (moyenne tension MT).
Voalaza fa tsy mifanaraka intsony ny saran’ny famoka­rana miohatra amin’ny fampiasana azy. Efa nisy ny fivoriana maromaro niarahan’ny minisiteran’ny Angovo sy ny Jirama ary ny Vondrona mpandraharaha tsy miankina (ny Gem sy ny Sim), nitadiavana ny marimaritra niraisana amin’ny saran’ ny herinaratra. Koa, nan­katoa­vin’ny filankevitry ny minisitra, ny fifanarahana nifanekena, ka hisondrotra 20% ny saran’ ny herinaratra ho an’ny taona voalohany, ary ho 16% ho an’ ny taona faharoa sy fahatelo manaraka. Tsy voakasik’izany ny mpanjifa mampiasa tanjaka ambany (basse tension) rehetra, ny sokajy « business » sy ny « residentielle ».

Ny 0,31%-n’ny mpanjifa

Miisa 2 166 ny orinasa sy ny mpandraharaha mampiasa ny HT na MT. Izany hoe, ny 0,31% ny mpanjifan’ny Jirama manontolo izay miisa 696 705. Efa fantatry ny orinasa io fi­son­drotana io tany aloha io, taorian’ny fivoriana niarahana, fa izao vao hampiharina.

Misedra olana anefa ny ori­nasa amin’izao fotoana izao, satria tsy ampy ny herinaratra enti-mamokatra, noho ny deles­tazy. Miampy ny masonkarena, hampiasana gropy mpihary herinjiro, entina hanenjehana ny fe-potoan’ny mpanjifa, toy ny orinasa afakaba manondrana any ivelany, ohatra. Vao mainka koa hitombo izany amin’ity fisondrotan’ny faktioran-jiro ity.
Etsy ankilany, mihena koa ny fidiram-bolan’ny mpandraharaha madinika mampiasa herinaratra satria tsy ampy ny fotoana ahafahana enti-ma­mokatra. Voakasik’izany, ny mpikirakira vy, ny mpanao volo, ny toerana mikirakira internety, ny mpivarotra mampiasa vata fampangatsiahana, sns.

Njaka Andriantefiarinesy