Niavaka raha tena niavaka ny trangam-pirehetana tamina karazan-javatra maro teto Toamasina ny taona 2024 sy ny fiando­han’ny taona 2025. Nandrai­san’ny vondrona mpamonjy voina eto Toamasina anjara mavitrika avokoa izany. Ho an’ny haintrano aloha, nahatratra hatramin’ny 76 ny tranga novonjena, ny taon-dasa. Ny fiandohan’ny volana janoary ka hatramin’ny febroary ity, efa miisa sivy sahady izany ankehitriny. Ny tranon’ny lefitra konsilin’i Frantsa etsy Ampasimazava no nanokatra ny volana febroary. Kila tanteraka tsy nisy noraisina ny entana tao an-tokantrano fa dia lasa lavenona avokoa izy ireo. Niainga tamina fipoahana maotera mitondra herinaratra noho ny fahatapahan’ny herinaratry ny Jirama ny fi­rehetana. Miisa sivy kosa
ny firehetana ala ary saika
ao amin’ny orinasa mpanao savony mamboly ireo palmie no mateti-piseho izany, “Manome faritra hambolen’ ireo mpiasa ao aminy vary na zavatra hafa ny mpampiasa fa ireo mpiasa izay miasa ny tany kosa tsy mahay manao fiaro afo rehefa mandoro ny tanimboliny ka mitarika firehetana ala izany”, hoy ny kolonely Charles Désiré, raha nanazava. Ankoatra izay, nitrangana firehetana andrin-jiro imbalo teto Toamasina, raha miisa fito kosa ny fako nirehitra. Teo koa ny firehetan’ny “feu d’Hydrocarbure izay miisa efatra.Miisa telo kosa ny fiarakodia may. Efa mahatratra 98 ny trangana firehetana isan-karazany ankoatra ny haintrano. Manoloana izany, miasa mafy ny vondrona mpamonjy voina amin’ny fifehezana ny afo mba tsy hiitatra ka hanimba zavatra maro.

Manampy ny fiarahamonina

Tsy ny vonjy voina hamono afo ihany no ahafantarana sy ahitana ny andraikitry ny mpamonjy voina, raha ny angom-baovao avy eo ani­von’ny mpamonjy voina. Ho an’ny taona 2024, namonjy olona maty an-drano miisa efatra izy ireo. Niampy iray izany ny taona 2025, ity farany izay tranga vao niseho ny 30 janaory 2025 lasa teo. Ireny faty tsy misy fianakaviana maka ao amin’ny tranom-paty ireny koa efa tapitra fetr’andro hijanonana ao amin’ny tranom-paty, ny mpamonjy voina ihany koa no miantoka ny fandevenana ireo razana. Ho an’ny taon-dasa dia miisa telo izany. Mandray anjara amin’ ny fanadiovana tsena koa izy ireo ary nanao izay indimy miantoana ny taon-dasa.

Amin’ny maha mpamonjy voina azy izay, mandray anjara amin’ny fanampiana sy famonjena olona koa izy ireo. Miisa fito ny olona novonjena tra-doza ary enina ireo narovana teny amoron-dranomasina. Olona dimy, marary saina, no nosamborina ka naterina any amin’ny hopitalin’ny marary saina. Ilana fahaiza-manao avokoa izany fandraisana andraikitra izany ka mahatonga ny mpamnjy voina nanao fanazarantena intelo niaraka tamin’ny Simex. Manao izay ho vitany ny mpamonjy voina fa matetika olana ny tsy fahampian’ny solika. 3 080 litatra monja no nampiasaina nandritra ny taona 2024.

Avy amin’ny fipoahan’ ny herinaratra

Tsy nisorona teto ny kaomandin’ny mpamonjy voina Toamasina, ny kolonely Charles Désiré, nilaza fa ny 80 isan-jaton’ny haintrano teto Toamasina dia saika avy amin’ny fifampikasohan’ny tariby mitondra herinaratra ( court circuit). Misy ankolafiny kanefa izany fa tsy hoe ny Jirama no omena tsiny. Ny ankamaroan’izy ireny dia noho ny fampiasana herinaratra tsy ara-dalàna (branchement sauvage et illicite). Tsy mifanaraka amin’ny fitaovana ampiasaina ao an-tokantrano ny Tarif. Eo koa ny fifampizarana herinaratra tsy ara-dalàna isan-tokantrano. Vokany, miteraka haintrano goavana izany. Mahatonga firehetana ihany koa ny fahanteran’ny tariby mpitondra herinaratra ao an-trano, izay miteraka ny 5 isan-jaton’ ny fahamaizana. Avy amin’ny tandrevaka tsy fitandreman’ny olon-dehibe mametraka ankizy irery an-trano kosa ny 15 isan-jatony. Anisan’izany ny fipoahana tavoahangina gazy izay tsy voafehin’ny ankizy ny fampiasana azy.

Nohamafisin’ny vondrona mpamonjy voina hatrany fa anisan’ny olana mahatonga ny fihandronan’ny rano ny fanaovana trano eny ambony tatatra, fanariam-pako anaty tatatra. Raha tsorina, saika avy amin’ny vahoakan’ i Toamasina izay tsy manaraka ny fepetra apetraky ny kaominina ihany no mahatonga ny fahasahiranana rehefa avy ny orana ka miakatra ny rano.

Sajo

Hampitomboina 17 isan-kerinandro ny sidina ataon’ny kaompania Ethiopian Airlines mampitohy an’Antananarivo sy i Nosy Be, manomboka ny volana jona 2025. Hetsika ho fampiroboroboana ny sidina ataon’ny kaompania eto an-toerana hatramin’ny niverenany teto Madagasikara nanomboka ny taona 2022.
Hotanterahina ny 29 mey ka hatramin’ny 1 jona ny hetsika « Rallye VHR (Voiture Historique de Régularité) ». Handalo ny faritra Analamanga, Itasy sy Vakinakaratra ny hetsika ka anasana ny rehetra hanatrika izany. Ankoatra izay, nandray anjara tamin’ny « Salon Rétromobile » 2025 tao Paris Expo Porte de Versailles ihany koa i Madagasikara, ny 5 ka hatramin’ny 9 febroary teo.
6,60 tapitrisa amin’ireo mponina 32,4 tapitrisa eto Madagasikara no mampiasa interneto. Izany hoe, 20,4% monja raha oharina amin’ireo firenena hafa izay tafakatra hatrany amin’ny 79,6 %. Tarehimarika izay mametraka ny firenena eo amin’ny laharana faha-10 amin’ireo firenena maneran-tany ambany indrindra ny tahan’ny fampiasana interneto.
Hanome tanana amin’ny fampiroboroboana ny fandraharahana ny minisiteran’ny Fitsarana. Ity farany izay mitazona sy mitantana ny rejisitry ny varotra sy ny fikambanam-barotra. Mbola izy ihany koa no miantoka ny fangaharahan’ny orinasa ka mamela ny rehetra ahita ny toe-bola sy ny fitantanana ny orinasa rehetra.

Lelavola mitentina 25 000 000Ar no loka azon’i Lalarison Ricardo Cassidi, nandritra ny lalao tombola « Devenez multimillionnaires » nokarakarain’ny Cos­mos Madagascar, ny 3 de­sambra 2024 ka hatramin’ny 13 janoary 2025. « Bon d’achat » mitentina 5 tapitrisa Ar kosa ny loka ho an’ny laharana faharoa raha 3 tapitrisa Ar kosa izany ho an’ny laharana fahatelo, izay samy ahafahan’izy ireo mividy entana eny amin’ny magazay Cosmos avy.
Notolorana ireo mpandresy, ny sabotsy teo, teny amin’ny magazay Cosmos Anko­rondrano ny loka azon’ny tsirairay raha natao ny 1 febroary lasa teo ny fisarihana.
« Faly ary tsy nampoizina ny fahazoana ny loka ka manasa ny rehetra handray anjara amin’ny lalao toy izao », hoy i Cassidi. Nividy entana indray mandeha monja teny amin’ny magazay Anko­rondrano ny raim-pianakaviana ka nandrombahany ny loka goavana.
Marihina fa mitentina ha­trany amin’ny 51 tapitrisa Ar ny loka nozarain’ny Cosmos Madagascar tamin’ireo mpandresy miisa 50 manerana ny Nosy izay nandray anjara ta­min’ny lalao.
Ankoatra izay, toy ny fa­naony isaky ny fety dia mbola hisy ny lalao goavana karakarain’ny magazay ny volana jona. Hanasana sahady ny rehetra handray anjara amin’izany.
Tsiahivina fa miisa 37 890 ny tapakila nosarihana nanditra ny tombola « Devenez multimillionnaires » izay nahafan’ny mpanjifa rehetra nandray anjara.

Henintsoa Hani

Hatao eto Madagasikara ny volana aogositra ny fihaonana an-tampony faha-45 an’ ny filoham-pirenena sy lehiben’ny governemanta eo anivon’ny Sadc. Mifanindry an-dalana amin’izay ny fanamarihana ny Herinandron’ny fampiroboroboana ny indostria, andiany faha-8. Tapaka nandritra ny dinika niarahan’ny minisitry ny Fampiroboroboana ny indostria sy ny varotra, Ralambofiringa David, sy ny solotenan’ny minisiteran’ny Raharaham-bahiny, ny Economic Development Board of Madagascar (EDBM) ary ny Sendikan’ny indostria eto Madagasikara (SIM), tetsy Ambohidahy, fa hatsangana ny vaomiera samihafa handrindra sy handamina ny asa rehetra. Antenaina fa hanatsara ny tontolon’ny fandraharahana aty amin’ny faritr’Afrika ny hetsika ka hampivondrona ireo matihanina sy mpampiasa vola ary ireo rafitra mpandraharaha ara-bola. Andrasana koa ny hampiroboroboana sy hitondrana zava-baovao maharitra eo amin’ny sehatry ny indostria ho an’ireo mpikambana ny Sadc. Noho izany, omena lanja mandritra io fotoana io ireo singa samihafa mampiavaka ny firenena malagasy.

Henintsoa H.

Tsara ny vokatra azo tamin’ny andrana tsy nikirakirana lelavola nandoavana ny saran-dalana tamin’ny taxi-be 147 D. Nisy ny tetikasa nampiasana ny teknolojia niomerika ka nametrahana fitaovana manokana hanamarinana ny tapakila saran-dalana tamin’ireo fiara fitaterana.

Nahomby ny tetikasa nataon’ny Airtel Money sy ny orinasa CPP System, tsy ampiasana lelavola andoavana ny saran-dalana amin’ny taxi-be. Na­nombohana izany, natao an­drana ny zotra 147 D. Nam­piasana ny teknolojia niomerika, ka nametrahana fitaovana manokana hanamarinana ny tapakila saran-dalana any anaty fiara fitaterana. Vidiana amin’ny fifanakalozam-bola Airtel Money ny saran-dalana, ahazoana ny karatra tapakila.
Nomarihin’ny tale jeneralin’ ny Airtel Money, Randria­narison Heritiana, fa « tohananay ny fifindrana tsikelikely any amin’ny toekarena niomerika, mampiroborobo ny fivoaran’ny teknolojia. Mampan­droso ny fikirakirana ara-bola sady manamora ny filana andavanandron’ny mpampiasa sy ny matihanina amin’ny fitateram-bahoaka ».
Manoloana izany fahombiazana izany, nankasitrahana ny mpamily sy ny mpanampy azy, ny 7 febroary teo. Miisa 6 izy ireo, nomena kojakoja avy amin’ny Airtel Money, miampy famandrihana internety MIFI, miampy famandrihana fifanakalozam-bola Airtel Money.
Tsahivina fa tanteraka ity fiaraha-miasan’ny roa tonta ity, mba hoentina hanatsarana ny sehatry ny fitaterana eto amintsika, hampiharana sy hampiroboroboana ny teknolojia niomerika sy ny fampiasana ny fifanakalozam-bola niomerika.
Andrasana ny fampiharana azy amin’ny zotra taxi-be rehetra sy ny fitaterana any amin’ny zotram-paritra sy nasionaly manontolo.

Njaka A.

Inspecteurs du travail 42 mianadahy no nahavita fianianana tetsy amin’ny Fitsarana tampony, Anosy. Andiany Mahomby izy ireo, niofana nandritra ny 2 taona teny amin’ny Enam Androhibe. Mitazona andraikitra eo amin’ny firenena ny Inspecteurs du Travail izay misehatra ara-tsosialy sy ara-toekarena. Ho an’ny sosialy, sady mampihatra ny lalàna mifehy ny asa ireto teknisianina ireto no manome ny toromarika ho an’ny orinasa amin’ny fampiharana izany.
Nanao sonia fiaraha-miasa amin’ny fanomezana tohana mitentina 59 924 euros (278 tapitrisa Ar) hividianana fiara hatao cliniques mobiles ho an’ny Centre Médical Le Bon Samaritain, ao Toamasina, ny masoivohon’i Japon eto an-toerana. Voatery mandeha an-tongotra lavitra ny mponina eny ambanivohitra rehefa hamonjy toeram-pitsaboana. Vahaolana ny fisian’ity clinique mobile ity.
Teboka manan-danja maro no nivoitra tamin’ny fivoriana lehibe niarahana tamin’ireo fitaleavana eo amin’ny foibe sy ny isam-paritra amin’ny sehatry ny fahasalamana. Anisan’izany ny fanatsarana ny fitantanana, ireo paikady miainga eny ifotony, ny fizarana andraikitra mazava ary ny fanatsarana ny tolotra ara-pahasalamana ho an’ny vahoaka. Nohamafisina koa ny ady amin’ny kolikoly sy ny fitantanana mahomby hampandroso ny asa rehetra.
Miverina tsikelikely ny oram-baratra mitsitokotoko, amin’ny ankapobeny, ho an’ny faritra rehetra manerana ny Nosy, ato anatin’ny telo andro manaraka, hoy ny foibe famantarana ny toetry ny andro.

Namoaka fanambarana mandà marindrano ireo lainga aparitaka amin’ny tambajotra sosialy, milaza ny fivarotana ireo nosy maromaro manodidina an’i Nosy Be amin’ny mpa­mpiasa vola vahiny, Emi­ratis, ny eo anivon’ny mi­ni­­site­ran’ny Fitsinjaram-pahefana sy ny fanajariana ny tany (MFFT). Nohitsin’ny fanambarana fa tsy misy fangatahana voaray na fifanarahana nosoniavin’ny fanjakana malagasy ho an’ny Emiratis, momba izany. Mazava rahateo ny didy aman-dalàna momba ny fananantany sy ny fampiasana azy, eo ambany fanaraha-mason’ny fanjakana malagasy.
Manoloana izany, miantso ny vahoaka hitandrina amin’ny vaovao tsy marina sy ireo fanakorontanana isan-karazany, miparitaka eny amin’ny tambajotran-tsosialy ny eo anivon’ny MFFT. « Aoka hanamarina ireo loharanom-baovao ofisialy hialana amin’ny fandisoana sy fanodinkodinana ny hevi-bahoaka », hoy ny fanambarana. Nohelohin’ny minisitera koa ny famafazana lainga ho fitandrovana ny filaminam-bahoaka. « Hiharan’ny lalàna famaizana ireo olona na fikambanana minia manohintohina ny fitantananan-draharaham-panjakana », hoy hatrany ny eo anivon’ny minisitera.
Araka izany, diso sady tsy mitombina ireo vaovao miely momba ity resaka fivarotana nosy maromaro any Nosy Be ity.

Synèse R.

Voatendrin’ny filohan’ny Repoblika ho loholona Rakotondrazafy Lalatiana. Naneho ny heviny avy hatrany ny tenany, manoloana izany.

“Mariky ny fahatokisan’ny filohan’ny Re­poblika no nanendrena ahy”, hoy ny loholona, Rakotondrazafy Lalatiana, ta­min­’ny mpanao gazety, taorian’ny lanonana nametrahana samboady azy teny amin’ny Lapan’ny Antenimieran­doho­lona, Anosy, omaly. Nita­rika ny lanonana ny filohan’ny Anteni­mieran­doholona, ny Jly Rava­lomanana Richard. Nisa­oran’ny loholona Rako­ton­drazafy Lalatiana ny filohan’ny Repoblika nanendry azy ho mpikambana vaovao ao amin’ny Antenimierandoholona. Heveriny fa zava-dehibe ny antony fahatokisana amin’ny vanim-potoana toa izao. Ny zava-misy, na tiana na tsy tiana: mila mpanohana ny fitondram-panjakana. Nave­rin’ny filohan’ny Repo­blika taminy ny fahatokisana azy. Misy anjara andraikitra sy faharesen-dahatra tsy maintsy ijoroany amin’izany.

“Tsy anjarako ny misora-tena toa voatango hoe izaho izany no tena tsara toerana eto amin’ity andraikitra maha loholona ity”, hoy kosa izy ny amin’ny hoe olona tsara amin’ny toerana tsara. Ny traikefa rehetra izay mety ho azony tamin’ny fanaovana politika dia entina hanasoavana ny andrimpanjakana nametrahana azy. Mba ho amin’ny tombontsoan’ny firenena izany. Tonga nanome voninahitra ny lanonana ny mpikamban’ny governemanta, solombavambahoaka, loholona, manampahefana samihafa…

R. Nd.

Mitotaly 10 000 ireo zana-trondro narotsaka ao amin’ny farihin’Ankadinondry Sakay nandritra ny fambolen-kazo natao tany an-toerana. Nisitraka zana-trondro ihany koa ireo fikambanan’ny mpanjono mba hahafahany mampiroborobo ny fihariany sy hanatsarany ny velo-tenan’ny tsirairay.
Vita ny 93% ny asa fanarenana ny lalam-paritany, RIP71, ampahany voalohany, mampitohy an’­Imerintsiatosika (RN1) sy Ambohimiarina. Mirefy 12,95 km ity lalana ity, ka avy amin’ny Tahirimbolan’ny lalana (FR) ny famatsiam-bola nanamboarana ny ampahany voalohany. Tafiditra ao anatin’ny tetikasa « Ankoho­nana miarina ».
Mampiasa ny teknolojia niomerika « Recycle Now » amin’ny fanivanana fako plastika, ny orinasa STCV. Zava-baovao ity fomba fiasa ity, mety amin’ireo olon-tsotra na orinasa, manana akora plastika efa niasa mampandre ny STCV, ka manatona any avy hatrany izy ireo. Tanora mpandraharaha no mitantana ity orinasa ity.
Misokatra manomboka ny alatsinainy ka hatramin’ny zoma ny « Guichet central d’information et de documentation » (GCID) eny Ambohidahy. Toerana andraisana ny mpisitraka sy ireo liana amin’ny tolo-draharaha avy amin’ny minisitera. Natao hikirakirana antotan-taratasy ao amin’ny minisitera ny maraina, raha natao hizarana izany kosa ny hariva.

Nihena 17,2% ireo entana naondran’i Madagasikara ny taona 2024 raha oharina ny taona 2023 noho ny fitotongan’ny harinkarena faobe. Na­nampy trotraka izany ny fihenan’ny vola azo tamin’ny fa­non­dranana lavanila, jirofo, nikela sy kobalta ary ireo vokatry ny orinasa afakaba. Nidina 15,4% ny vola azo tamin’ny lavanila noho ny fihenan’ny vidiny ho 74% na niakatra 224,9% aza ny vokatra, raha ny fanadihadiana ara-toekaren’ny Banky foiben’i Madagasikara (BFM). Nahi­tam-pihenana 43,9% sy 47% ny nikela sy kobalta naondrantsika. Nihena 7,2% ny vokatr’ireo orinasa afakaba ka nahatonga ny fihenan’ny fa­non­dranana ho 5,3% na nahitam-piakarana 2% aza ny vidin’entana. Lasibatr’ity fitotonganana ity koa ny jirofo. Ni­hena 35,5% ny vokatra naondrana rehefa nihena 31% ny vokatra azo nandritra ny taona ka nitarika ny filatsahan’ny vidim-bokatra ho 6,5%. Na izany niakatra 124% ny fanondranana lohamenaka taorin’ny fitomboan’ny fangatahana ho 169,6% na nihena 16,9% aza ny vidiny tamin’ny taon-dasa. Niakatra 26,1% ihany koa ny fanondranana « graphite » na­taon­tsika rehefa nitombo 36,8% ny vokatra raha toa nihena 7,8% ny vidiny. Nia­katra 140,2% ny cacao naondran’i Madagasikara nandritra ny taona 2024. Nahatonga izany ny fiakaran’ny vidim-bokatra eo amin’ny sehatra iraisam-pirenena sy ny fiakaran’ny fanafana ho 9,6%, araka ny fanazavan’ny BFM. Mitotaly 2 838,6 tapitrisa dolara ny vola vahiny ao amin’ny BFM ka ahafahana manafatra entana ao anatin’ny enim-bolana mahery ho amin’ity taona ity.

Henintsoa Hani

Hotanterahina ny 2 sy 3 mey, any Genève, ny « Forum économique du secteur privé Madagascar, terre d’opportunités » izay eo ambany fiahian’ny minisiteran’ny Fampiro­boroboana ny indostria sy ny varotra sy ny minisiteran’ny Fizahantany sy ny asa tanana. Hetsika karakarain’ny Federasion’ny antenimieran’ny varotra sy ny indostria eto Madagasikara (FCCIM) sy ny Antenimieran’ny varotra sy indostria Genève-Antananarivo (CCIGA). « Tanjona ny hisian’ny fiaraha-miasa eo amin’ny Malagasy mpandraharaha sy ny any ivelany amina sehatra marolafy, toy ny fizahantany, indostria, harena an-kibon’ny tany ary fambolena », hoy ny FCCIM.
Ankoatra ny hetsika, hisy ny fampihaonana sy fampifandraisana ireo samy mpandraharaha. Hasongadina manditra ny varotra fampirantiana ihany koa ny hatsaran’ny vokatra malagasy sy ny mampiavaka azy amin’ny hafa, hisarihana ireo mpampiasa vola vahiny. Araka izany, maherin’ny 100 ny mpandray anjara andrasana mandritra ity fihaonambe ity ka manana hatramin’ny 28 febroary hisoratana anarana izay liana.

Henintsoa H.

Ao anatin’ny fotoanan’ny rotsakorana, tena tsara indrindra hambolena hazo isika izao. Ho an’ny eto afovoantany, efa maro ny fikambanana, ny fiangonana, ny orinasa ary ny olon-tsotra niroso tamin’ny fambolen-kazo nanomboka tamin’ny volana desambra lasa teo. Anisan’ny efa nahavita izany ny fikambanana Hasin’ny zaza manga. Notontosaina ny sabotsy 01 febroary 2025 lasa teo, tany amin’ny kaominina Ambato, ny andiany faharoa tamin’ny fambolen-kazo, nataon’izy ireo. Nitarika izany ny filohan’ny fikambanana sady ben’ny Tanànan’ny kaominina any an-toerana, Rakotondravao Sarobidy. Natao tamin’ny sabotsy 25 janoary 2025 kosa ny andiany faharoa.
“Fototry ny fandrosoana eo amin’ny tanàna iray ny fanomezana sehatra ny fambolena, anisan’izany ny fambolen-kazo”, hoy ny ben’ny Tanàna voafidy tany amin’ny kaominina ambanivohitra Am­bato, distrika Ambohidra­trimo, nandritra ny fambolen-kazo nataon’izy ireo. Nambarany fa raha voatsabo sy voatohana tsara araka ny tokony ho izy ny fambolena, dia miroborobo ny fiveloman’ny vahoaka. Mihatsara toy izany koa ny fari-piainana, manome fahafahana misimisy kokoa ho an’ny taranaka koa izany. Efa nanao fambolen-kazo foana ity fikambanana ity tao anatin’ny 5 taona nisesy. Mahatratra 5 000 isan-taona ny zana-kazo novolen’izy ireo hatramin’izany. Mba ho an’ny fanatsarana sy fiarovana ny tontolo iainana any Ambato. Tanjona maharitra ity, izay natao hanamafisana ny fizakan-tenan’ny ala sy hanomezana vahaolana amin’ny olan’ny fahasimban’ny tontolo voajanahary, raha ny fanazavana voaray hatrany.

Hiarovana ny tontolo iainana
Tanjona sy politikan’ny fambolen-kazo ny famerenana ny ala sy fiarovana ny harena voajanahary. Mano­loana ny fahasimban’ny tontolo iainana misy amin’izao fotoana izao, ilaina ny fambolen-kazo. Mba ho fanarenana ny toerana maro ho rakotra ala indray sy ho fiarovana ny zavamananaina. Ankoatra izay, fisorohana ny fahanteran’ny tany sy fanohanana ny fambolena sy fiompiana ihany koa. Manatsara ny fiasan’ny tany koa, mitahiry rano, manamafy ny fototry ny fambolena ary manakana ny fihotsahan’ny tany, ny faritra rakotra ala.
Ho an’ny kaominina ambanivohitra Ambato, distrika Ambohidratrimo, manana tanjona sy sehatra manokana entina mampiroborobo ny sehatry ny fambolena izy ireo. Laharam-pahamehana voalohany ny fampivoarana ny voly, toy ny voly vary, tongolo sy ireo voly hafa manan-danja rehetra. Ankoatra izay, hatsaraina ihany koa ny lalana. Mba hoentina manamora ny fitaterana sy fivarotana ny vokatra miakatra avy any an-toerana. Ilaina ihany koa ny fampiofanana ny tantsaha hanaraka ny teknika manaraka ny fiovan’ny toetr’andro. Tanjona ny hahafahana mampitombo ny vokatra miakatra. Hamafisina ihany koa ny fifandraisana amin’ny tsena, mba hahazoan’ny tantsaha ny vidim-bokatra ara-drariny sy ahazoana tombony bebe kokoa.

Fanaraha-maso sy fikojakojana

Ilaina ny fambolen-kazo na ho an’ny mponina rehetra, ary tokony hanao izany na ny olona tsirairay avy aza. “Tsy vitan’ny mamboly fotsiny anefa fa miantoka ny fahaveloman’ireo zana-kazo amin’ny alalan’ny fanaraha-maso sy fanentanana ny mponina hikolokolo izany ny tena tsara indrindra”, hoy hatrany ny ben’ny Tanànan’ny kaominina Ambato, distrika Ambohidratrimo. Ankoatra izay, ilaina koa ny fanentanana sy fanabeazana amin’ny fiarovana ny tontolo iainana. Mampirisika ny rehetra, indrindra ny tanora, mba ho tomponandraikitra amin’ny fiarovana ny harena voajanahary hatrany ity fikambanana iray ity.
Tsy mahomby ny ankamaroan’ny fambolen-kazo eto Madagasikara, amin’ny ankapobeny, raha ny fanadihadiana natao. Maro ny antony mahatonga izany. «Voalohany, tsy mipetraka tsara araka ny tokony ho izy ny fotoam-pambolen-kazo eto Madagasikara. Eo ihany koa ny fambolena tsy manaraka ny tekinika, izay anisan’ny antony tsy mampahomby ny fambolena », hoy Rahazatovo Andry, tomponandraikitra eo anivon’ny ONG Graine de Vie. Nilaza izy fa lasa toy ny fitsangantsangana fotsiny ihany ny fotoana hanaovan’ny olona ny fambolen-kazo. Anisan’ny tsy mampahomby ny fambolen-kazo eto amin’ny Nosy ihany koa ny doro tanety ataon’ny olona sasany. Manampy izany ny tsy fahampian’ny fanaraha-maso sy ny fandraisan’andraikitra aorian’ny fambolena.

Nanatontosa : Mino

Hanampy amin’ny famokarana herinaratra amin’ny RIA ny tetikasa « Tana Medium Ring ». Hanangana zotra mpitatitra herinaratra 90KV, mirefy 193 km, ny tetikasa. Hamafisina ireo zotra efa misy ka hatsangana ny « sous-stations » miisa 8 ao Antsipolitra, Antsirabe I, Antanifotsy, Behenjy, Tana Sud II, Ambohijanaka, Tana Ouest II, ary Imerintsiatosika.

Hiasa manomboka amin’ity volana febroary ity ny « Turbine éolienne » voalohany mirefy 50m ao Tao­lagna­ro. Iray amin’ireo 19 hatsangana izany ka afaka mamokatra herinaratra 850 Kw. Mitotaly 16MW ny herinaratra ho azo amin’ny alalan’ny tetikasa rehefa tafajoro avokoa ireo « turbine ».

Nihena 15,4% ny vola azo tamin’ny fanondranana lavanila nandritra ny taona 2024, noho ny fidinan’ny vidim-bokatra 70% na niakatra 224,9% aza ny vokatra naondrantsika. Nilatsaka hatrany amin’ny 128,4 tapitrisa dolara ny vola azo tamin’ny fanondrana nandritra ny enim-bolana voalohan’ny taona 2024, raha toa 226,1 tapitrisa dolara izany ny taona 2023.

Nohavaozina ny drafitra sy tetikasa nasionaly ho an’ny fahasamihafan’ny zavaboahary. Tanjona ny ha­natsarana ny fiveloman’ny mpanjono sy hiarovana ny tontolo iainana an-dranomasina sy ny toekarena manga. Kendrena ny hahazoana vokatra maharitra sy miaro ny harena voajanahary.

Mikendry ny hampihenana ny tsy fanjarian-tsakafo eto Ma­dagasikara ny tetikasa Sanbonai. Miara-miombon’antoka amin’ny fikambanana Mpamboly frantsay sy fampandrosoana iraisam-pirenena (Afdi). Nahazo tohana ny tambajotra Soa, ka voakasiky ny tetikasa ny faritra Anala­manga, Bongolava ary Itasy. Nambaran’ny filohan’ny tambajotra Soa, Razafimbololona Angéline, fa “paikady notratrarina ny vahaolana hiatrehina ny fiovan’ny toetr’andro. Toy ny fampitomboana ny vokatra, ny famokarana masomboly tsara kalitao, ny fambolena agro-ekolojika (zana-kazo, zezi-pahitra, fifampivadiana voly, ….). Nofanina ara-teknika sy ara-pitantanana ny mpamokatra, indrindra ny tanora. Nofanina ihany koa ny vehivavy, amin’ny lafiny fanjarian-tsakafo maro loko sy ny olona marefo”.
Mahatratra 700 ny tanora nofanina, ary maherin’ny 200 no notohanana ara-bola, ahafahan’izy ireo mamokatra. Ni­ainga tamin’ny 600 000 Ar tsirairay ny taona voalohany, niakatra 800 000 Ar ny faharoa ary 1 000 000 Ar ny fahatelo. Seha-pihariana natao ny fambolena vary, katsaka ary voly anana sy legioma.
Tapitra ny tetikasa, ankehitriny, izay naharitra 3 taona. Nilaza ny filohan’ny tambajotra Soa, fa nahafa-po ny vokatra, satria miavaka ireo tantsaha nisitraka ny fiofanana miohatra amin’ny hafa. Mitohy kosa ny tohana sy fanaraha-maso ataon’ny tambajotra.

Henintsoa H.

Anisan’ny vokatra vokarin’ny Alpha Ciment ny simenitra lafatra. Ho fanapariahana izany, nisy ny lalao ho an’ireo mpanjifa natao ny 15 ka hatramin’ny 31 desambra 2024 lasa iny. Notanterahina ny 24 janoary 2025 lasa teo, tetsy Anala­kely, ny fanolorana ny loka ho an’ireo tsara vintana. Niisa 15 ireo nisitraka izany ka nomena 1 taonina avy.
Notsiahivin’ny tomponandraikitra fa akora mamaly ny fi­lan’ny mpanjifa amin’ny fanamboarana fotodrafitrasa na famitana toeram-ponenana na tetikasa mifandraika amin’izany ity vokatra ity, izay vita malagasy tanteraka.
Efa nisy ny fotoana nampahafantarana sy nanaovana fanehoana ity akora ity, nandritra ny
« Salon international de l’habitat 2024 », niaraka tamin’ireo teknisianina avy amin’ny orinasa mpamokatra. Dingana manaraka ny fanomanana lalao sy fanentanana ho an’ireo mpanjifa matoky ka mampiasa ity akora ity. Manohana sy manaja ny tontolo iainana ho an’ny hoavy maharitra eto amin’ny firenena ihany koa izy ireo. Toerana telo no misy ny orinasa misahana ny akora dia ny any Ibity Antsirabe, Toa­masina ary Antananarivo.

Henintsoa H.

Tafiditra ao anatin’ny paikady hampitomboana 1 tapitrisa taonina fanampiny ny voka-bary eto amintsika ny fampiasana ny masomboly safiotra. Nahazo ny anjarany i Vakinankaratra.

Taorian’ny tany Alaotra, natolotra tamin’ny fomba ofisialy omaly, ny ma­som­boly vary safiotra, ho an’ ny faritra Vakinankaratra. Mi­isa 70 ny kaoperativa tantsaha nahazo ny anjarany, miaraka amin’ny kojakojam-pamokarana miaraka aminy. Ho an’ny velaran-tany 1 ha, mi­lanja 25 kilao ny masomboly vary safiotra, miampy zezika mitotaly 750 kilao (300 kilao ny NPK, 100 kilao ny « urée » ary 350 kilao ny zezika organika).
Nilaza ny sekreteram-panjakana miadidy ny Fahavitan-tena ara-tsakafo (SEAA), Razanamahefa Tahian’ny Avo, fa « zava-dehibe ny fahavitan-tena ara-tsakafo sy ny fanatsarana ny fari-piainan’ny tantsaha. Mampidi-bola 6 tapitrisa Ar isaky ny hekitara ho an’ny mpamboly iray ny fampiasana ny masomboly vary safiotra. Hanamafy ny fiatrehana ny fiovan’ny toetr’andro izany, sady hampandroso ma­haritra ny sehatry ny fambolena ao Vakinankaratra ».
Tsy zava-baovao eto amintsika ny fambolena vary safiotra. Nahatratra 12 t/ha ny vokatra azo tamin’ny fanandramana natao tany amin’ny faritra Morombe. Misitraka ny tohana avy amin’ny fanjakana ny tantsaha nahazo fiofanana manokana mahakasika ny lafiny teknika.
Miara-miombon’antoka hampahomby ny fandaharanasa ny Sekretariam-panjakana (SEAA) miaraka amin’ny mi­nisiteran’ny Fambolena sy ny fiompiana (Minae), ny fandaharanasa Fihariana, ny ao amin’ny Fitsinjaram-pahefana (MATD), sns.

Vaomiera manara-maso
Natsangana ny vaomiera iombonana misahana ny fanaraha-maso sy manao tombana ny asa amin’ny alalan’ny fampiasana ny teknolojia niomerika. Misy ny teknisianin’ny fambolena manohana ny tantsaha mpamokatra, hanatrarana ny vokatra sy hampaharitra ny fampiharana ny lafiny teknika. Hentitra ny fepetra arahina, hiarovana ny tantsaha ma­noloana ny fanararaotana ny vidin’ny kojakojam-pamokarana samihafa.

Njaka Andriantefiarinesy

Notakin’ny filoha Rajoelina Andry tamin’ny filankevitry ny minisitra, afakomaly, teny Iavoloha, ny hitaterana ao anatin’ny fotoana fohy ireo fitaovana rehetra ilaina hanatontosana ny fihaonana an-tampon’ny COI, hatao eto amintsika ny volana avrily izao. Hifarimbona amin’izany ireo minisitera sy ny governora ary ny ben’ny Tanàna…
Nirary soa ny filoha nasionalin’ny Tim, Ravalomanana Marc, noho ny taona vaovao ireo ben’ny Tanàna sy mpanolotsaina Tim, voafidy tany amin’ny distrikan’Andramasina, omaly. Fotoana koa io nanomezana toromarika azy ireo. Tafiditra ao anatin’
izany ny famelomana aina ny mpikambana eny ani­von’ny fokontany.
Nifampidinika tamin’ny minisitry ny Fitsarana, Rakotomandimby Benjamin Alexis, teny Faravahitra, afakomaly, ny ben’ny Tanànan’ny kaominina Itaosy, Rasolofo Haja. Nivoitra, tamin’izany, ny momba ny fampandrosoana ny faritra sy ny hevitra hoentina manakaiky hatrany ny vahoaka.
Ao anatin’ny fanatanterahana ny fampanantenany ny ben’ny Tanànan’Ivato, i Penjy Ran­drianarisoa. Anisan’izany ny fanamboaran-dalana eo amin’ny Sary Masina, fiantsonan’ny taxi-be, ny eny amin’ny fokontany Ilaivola sy ny kartie fahenina. Nambarany fa mbola hitohy any amin’ny fokontany hafa izany. “Hajao hatrany ny tanànantsika”, hoy izy.

Mbola nanantitrantitra ha­trany amin’ireo ben’ny Tanàna ny minisitry ny Fitsinjaram-pahefana sy ny fanajariana ny tany (MFFT), Andriantsito­haina Naina, eo amin’ny fitantanana ny kaominina. Na­nafatra ireo mpitantana eny ifotony tany Ankazobe ny tenany.
Nambarany fa mafy ny asa miandry ny ben’ny Tanàna ary efa niaina izany ny tenany fony nisahana izany andraikitra izany. Nampahereziny tsy ho kivy izy ireo. Miandrandra sy manantena anareo ny mponina tamin’ireo fampanantenana, araka ny nambarany. “Tsy ho mora ny hahatanteraka izany fa mitaky asa sy fahavononana ary fahendrena”, hoy izy, tao amin’ny kaominina Ambohitromby, distrika Ankazobe, omaly. Nampanan­tena ny tenany fa vonona hanampy ireo ben’ny Tanàna ny minisitera tantaniny amin’ny alalan’ny tetikasa hahazoana traikefa. Hapetraka tsy ho ela izany ka hisy ny fanofanana azy ireo hananany ny fahaiza-manao. “Mba tsy higadra noho ny tsy fahaizana ny lalàna na noho ny tsy fahafantarana ireo dingana samihafa tokony hatao amin’ny fitantanana kaominina”, hoy izy.
Notsiahiviny fa fahefana lehibe eo an-tanan’ny ben’ny Tanàna ny Birao ifoton’ny fananantany (Bif) ahafahana mizara karatany ho an’ny vahoaka. Mbola ilana fahen­drena koa ny momba izany, araka ny nambarany. Ani­san’ny nitondra fandriampahalemana sy filaminana ary fampandrosoana izany. “Mba ho lovain-jafy ny tany ary manana fanamarinana ny maha anareo ny tany isika izao ka tsy ahina hisy hangalatra in­tsony”, hoy izy.
Fanafainganana ny asa…
Nanteriny fa maherin’ny 60 000 ireo karatany hozaraina amin’izao tetikasa izao. Mbola eo koa anefa ireo tsy voazara ka niantsoany sy nanentanany ireo tompon’andraikitra rehetra ny hijerena izany akaiky sy ny hanafainganana ny famoahana izany. Hisitrahan’ny vahoaka tombontsoa ny fahazoana izany. Natsidiny sahady koa anefa fa efa propagandy ho an’ireo ben’ny Tanàna amin’ny dimy taona manaraka ary ahafahany miverina amin’ny toerana ny fikarakarana izany ho an’ny vahoaka. “Ho mora ho an’ny rehetra ny mankasitraka sy mifidy anareo amin’izany fotoana izany”, hoy izy.
Nambarany koa fa efa hita izao ny vokatry ny hetsika, fizarana karatany sy “Titre” faobe ka hotohizana.

Synèse R.

Raikitra indray ny fotoana fambolena hazo eto amin’ny tanàna. Samy serintseriny avokoa ny mpiasam-bahoaka, eny anivon’ny minisitera sy ireo rantsamangaikany. Manao izay ho afany amin’ny fandrakofana ny vohitra, samy mikendry ilay famerenana an’i Madagasikara maitso. Dia rodorodo goavam-be tokoa anie no ataon’ny minisitera rehetra.
Milamina sy mipetrapetraka ery ny fanomanana, manohatra noho ireny asaramanitra goavam-be ireny. Tena mahavelombolo ny fiaraha-mientana sy ny firaisan-tsain’ny mpiara-miasa handeha hamonjy fambolen-kazo. Tena hoe tsy ho ela dia ho feno zana-kazo mitombo ny tanàna. Tsy miandry an-jatony taonany dia efa mba ho maitso mavana izay tadiavina.
Indrisy anefa! Mba mampisaina ihany ny mahita fa ny andron’ny fambolen-kazo ihany no nafana fo Ramalagasy. Zary fety tokoa ny ankamaroan’ny hetsika. Natao ho fialana ny toeram-piasana sy ho fitsangantsanganana fotsiny ihany. Mijanona ilay indray mandeha tsy miverina dia rava ny tsena. Tsy misy ny fanaraha-maso aorian’ny hetsika.
Taratry ny fomba fisainan-dRamalagasy amin’ny ankapobeny mihitsy io. Fomba ilay mafana fo am-boalohany. Rehefa mandeha ny mandeha, misy mivadi-belirano tampoka sy manary namana izany. Maty momoka hatrany izay mba tetikasa, na drafitra iarahana manatanteraka. Tsy mifidy sehatra fa saika ahitana izay fomba fiaina sy fomba fiasa izay ny ankamaroan’ny Malagasy.
Mila fandinihan-tena sy fahaizana mandrafitra matipaika ny zava-drehetra. Tsy mahazatra ny Malagasy anefa izany. Miankina amin’ny kisendrasedra ny ankamaroan’ny olona. Manao zara fa vita amin’izay hatao. Tsy mahagaga raha tsy misy ny vokatra. Samy miesona sy mijinja ny nataony eny. Simba ny toe-tsaina, hany ka mahita faisana noho ny fahazarana manao ala-safay!

r.r