Cliquez sur l’image pour télécharger

Anisan’ny matanjaka indrindra maneran-tany ny kaompania Emirates. Handray mpiasa malagasy ity orinasa ity, ankehitriny, eto Antananarivo, amin’izao fisokafan’ny zotra mivantana Dubaï-Antananarivo, mandalo atsy Mahé Seychelles izao. Andraikitra hosahanina ny fifandraisana sy ny fikarakarana ny mpandeha anaty fiaramanidina sy ny an-tanety. Hiasa any Dubaï ny olona ho voaray, aorian’ny fiofanana mandritra ny 7 volana sy tapany.
Azo atao ny misoratra anarana ao amin’ny adiresy tranokala http://www.emiratesgrupecareers.com/cabincrew, mialoha ny 23 septambra, ho an’ireo hiasa anaty fiaramanidina. Misoratra anarana ao amin’ny http://www.emiratesgroupcareers.com/search-and-apply/375305 kosa ireo maniry hikarakara sy handray ny mpanjifa, izay hatao ny 24 septambra ho avy izao.
Anisan’ny mampiavaka ny mpiasan’ny Emirates ny fampiasana teratany 140 karazana, mampiasa tenim- pirenena 70 mahery, mahay mandray sy manaja olona, sns. Misy ny tombontsoa manokana omena an’izay mpiasa voaray.

Njaka A.

Ao anatin’ny Politika ankapoben’ny fanjakana (PGE) ny fandrakofana ala an’i Madagasikara. Mifameno amin’izany ny fampiroboroboana ny toekarena maitso, toy ny seha-pihariana volobe

Nankalazaina omaly, ny Andro manerantany ho an’ny volobe. Nitarika ny fotoana, ny minisitry ny Tontolo iainana (Medd), i Max Andonirina Fontaine. Lohahe­vitra noraisina ny hoe « Seha-pihariana volobe mahomby sy tontolo iainana mirindra ho an’ny fampandrosoana maharitra ».
Maro ny sehatra eto amintsika amin’ny fampiroboroboana azy, miainga amin’ny fambolen-kazo, ny fanofanana, ny fanodinana, sns. Mahatratra 45 600 ny zanakazo voavoly, amina velarantany 157 ha, any Antsampanana, Atsina­nana, ao anatin’ny tetikasa Volobe ataon’ny fikambanana Bondy. Nilaza Razafindrakoto Jean Yves, manampahaizana amin’ny volobe fa azo hanaovana tetezana, trano, mihitsy aza io zavamaniry io. Misy 35 ny karazana volobe eto Mada­gasikara ka zanatany eto ny 12, nafarana avy any ivelany ny 23. Azo hahodina ho fanaka, kojakoja ao an-tokantrano, trano, sns.
Nanazava ny tomponandraikitry ny Tetikasa ho an’ny daholobe Atsinanana (PIA), miasa any Vatomandry sy Brickaville, fa anisan’ny nafarana avy any India, ny karazana Bambusa Bambos. Matevina sady be nofony, manana habe 12 hatramin’ny 15 sm rehefa lehibe, afaka 5 taona. Azo havadika ho angovo fahandro na saribao ity karazana ity. Haingam-pitombo ny volobe satria efa tafakatra 8 metatra ny haavony ao anatin’ny 2 taona monja, ary 15 metatra anatin’ny 5 taona.

Fanofanana
Anisan’ny nomena fiofanana mahakasika ny volobe ny mpianatra ho teknisian’ny Ala eny amin’ny Foibem-piofanana CNFTF eny Angavokely. Mitotaly 85 ireo nizarana mari-piofanana, omaly.
Mpikambana ao anatin’ny Fikambanana iraisam-pirenena momba ny volobe Inbar, i Madagasikara, nanomboka ny taona 2004. Anisan’ny manohana antsika ny mpamatsy vola iraisam-pirenena, toy ny Fida, ny Vondrona eoropeanina, i Sina, sns.

Njaka Andriantefiarinesy

.

Nanomboka omaly, ary haharitra hatramin’ny alahady 22 septambra izao, eny amin’ny Complexe sportif Vontovorona ny fiofanana ho an’ireo mpitsara amin’ny baolina kitra lalaovina anaty efitrano (futsal). Mitarika izany i Said Nourri, manam-pahaizana avy amin’ny Fifa. Miisa 30 mianadahy ireo mpiofana ka misy ny avy any amin’ny faritra.

Tsara fanombohana ny FCA Ilakaka sy ny FC Avenir Anosy, teo amin’ny andro voalohan’ny “Poule des As”, omaly. Tetsy amin’ny kianja Elgeco Plus, resin’ny FCA, tamin’ny isa 1 no ho 0, ny AS Fos Analanjirofo. Teny Ambohidratrimo, lavon’ny FC Avenir, 3 no ho 2, ny FC Theo Sava.

Hatao ny 21 hatramin’ny 29 septambra izao, eto Antananarivo, ny fiadiana ny tompondakan’i Madagasikara, sokajy 1ère Division, taranja volley-ball. Ny sokajy lahy sy vavy no hifaninana amin’ity, ka hotanterahina ny zoma 20 septambra ho avy izao ny fivoriana ara-teknika sy ny fizaram-bondrona.

Hitohy ny sabotsy 21 sy 22 septambra izao ny fifaninanana “Fety de Baskety e!” karakarain’ny AT2B. Kianja 3 no handray ny lalao mandritra io roa andro io, dia ny eny amin’ny kianja basikety eny Andraisoro, ny kianjam-pokontany Amboditsiry ary ny kianja basikety eny amin’ny CEG Nanisana.

Notanterahina ny talata lasa teo, nanerana an’i Eo­ropa, ny andro voalohany amin’ny fifanintsanana isam-bondrona hiadiana ny ho tompondakan’i Eoropa, taranja baolina kitra «Ligue des champions 2024». Voahaja ny lojika satria tafavoaka ho mpandresy avokoa ireo ekipa goavana. Anisan’ny nisongadina indrindra ny nanamontsanan’ny Bayern de Munich, tamin’ny isa mavesatra 9 no ho 2, ny Dinamo Zagreb. Nanampatra hery tao an-kianja filalaovany, tao Allianz Arena, ry Raini­boto.
Na izany aza, “penalty” avokoa ny telo tamin’ireo baolina tafiditry ny Bayern. Ani­san’ny nahatafiditra baolina be indrindra i Harry Kane, namono 4. Efa nitarika tamin’ny isa 3 no ho 0 ny Bavarois vao nahafaty baolina ry zareo Zagreb.
Ankoatra izay, resin’ny Real de Madrid, tompondaka farany, tamin’ny isa 3 no ho 1, ny Sttutgart ka anisan’ny nahafaty ny baolina iray ho an-dry zareo Madrilènes, i Mbappé, izay nanokatra ny isa teo amin’ny minitra faha-46. Taorian’io nosahalain’i Undav izany, minitra faha-68 saingy nanampy isa 2 ho azy ny Real, tamin’ny alalan’i Rudiger (83 mn) sy i Endrick (90 + 5). Teo amin’ireo vokatra hafa, Liverpool nandavo ny AC Milan, 3 no ho 1. Sporting nanilika an’i Lille, 2 no ho 0. Aston Villa nandresy ny Young Boys Berne, 3 no ho 0, ary Juventus nampiondrika ny Eindhoven, 3 no ho 1.

Tompondaka

Nisy atrikasa nifampizarana ny fivoaran’ny asa vitan’ny tetikasa «Jumelage Frantsay-Italiana-Malagasy», ny 12 septambra teo, nandritra ny Foaran’ny famokarana (FIA), andiany fahenina teny amin’ny Parc expos Forello Tanjom­bato. Miahy azy ny minisite­ran’ny Fambolena sy ny fiompiana (Minae), vatsian’ny Von­drona eoropeanina (UE) vola. Misy sokajin’asa 5 lehibe anatiny, hanatrarana ny tanjona, ny fanatsarana ny kalitaon’ny vokatra mba tsy hisian’ny sakana any amin’ny firenena hanondranana azy. Eo koa ny fifanakalozana mahakasika ny fitantanan-draharaha eo amin’ireo firenena telo ireo, tafiditra ao anatin’ny UE, sady efa manana traikefa amin’ny fenitra ara-pahadiovana sy ara-pahasalamana (SPS).
Manan-danja tokoa ny sehatry ny fambolena sy ny fiompiana eto Madagasikara. Hampiakatra ny kalitaon’ny vokatry ny fambolena sy fiompiana eto ity tetikasa iarahan’ ny telo tonta ity. Hampiakatra ny fidiram-bolan’ny mpamokatra amin’ireo sehatra ireo. Tanjon’ny Minae ny fahavitan-tena ara-tsakafo sy ny fidirana amin’ny fanondranana vokatra ara-tsakafo sy ara-pambolena toy ny lavanila sy ny jirofo, izay efa fanaon’i Madagasikara.

Njaka A.

Nanatitra ny antontan-taratasiny teny amin’ny biraon’ny Ovec Ambohidratrimo, omaly maraina, ny kandidà tsy miankina, Rabary Hery, filohan’ny Zanak’Ambohidratrimo miray (Zam). Izy no voalohany fantatra fa hilatsaka ho ben’ny Tanàna ao amin’ny kaominina Ambohidratrimo. Nilaza ny filohan’ny Ovec eny an-toerana, fa mitazona ny datin’ny 19 septambra ny Ceni Ambohidratrimo hatreto. Nambaran’ny kandidà Rabary Hery, fa Ambohidratrimo filamatra, madio, mivoatra ny teny filamatra napetraky ny Zam. Tanjony ny hitantanana ny kaominina tsy misy kolikoly, mangarahara ary fitantanana madio. Mpanara-maso ny famoahana volam-panjakana rahateo ny asan-dRabary Hery.
Nampahafantarina ny mponina eny an-toerana ireo mpanolotsain’ny Zam avy amin’ny fokontany 9 ao amin’ny kaominina. Nitsodrano azy ny fianakaviany sy ny ray aman-dreny lehibe ao an-tanàna.

Njaka A.

Maty tsy tra-drano ireo roa lahy nandeha moto nifandona tao Ampihaviana Antsirabe, afakomaly alina. Mafy ny fifandonana ka samy niara-namoy ny ainy ireo mpitondra moto…

Nitrangana lozam-pifamoivoizana indray tao Ampihaviana Antsirabe, afakomaly alina. Moto roa nifandona. Maty tsy tra-drano ireo mpitondra moto roa lahy. Araka ny tatitra nampitain’ny zandary, moto Scooter samy nanao taingin-droa ireto niharan-doza ireto. Nifanena tampoka anefa izy ireo ka samy tsy afa-niala intsony. Mafy ny fifandonana ka samy niara-namoy ny ainy izy roa lahy mpitondra moto. Samy naratra mafy kosa ireo roa lahy nentina tamin’ny moto. Tafapitika hatrany amin’ny 50 metatra ny moto nentin’izy ireo. Vaky ny lohan’ireo roa namoy ny ainy. Nandriaka nanerana ny arabe ny ra. Nentina haingana na­monjy hopitaly ireo roa lahy na­ratra mafy. Mbola manaraka fitsaboana ao amin’ny hopitaly, araka izany, izy roa lahy ireo. Potipotika tsy nisy noraisina kosa ireo moto nifandona. Fantatra fa anisan’ireo toerana ahitana trangana lozam-pifamoivoizana ateraky ny mo­to koa ny ao Antsirabe. Ma­te­ti­ka vokatry ny tandrevaka ataon’ ireo mpitondra sy ny tsy fahafehezana ny lalàna mifehy ny fifamoivoizana no tena antony iray mahatonga ny loza. Efa misy hatrany ny fanentanana ataon’ny mpitandro filaminana amin’ireo mpitondra moto saingy very an-javony izany rehefa samy mifampitsapatsapa tanjaka izy ireo.

J.C

« Ho an’ny EPP Ankadinandriana, fokontany Manjakamiadana, mahatratra 17 ny ankizy mpianatra avy amin’ny fianakaviana tena sahirana tsy mandoa vola ho fampidirana ny zanany an-tsekoly », hoy ny talen-tsekoly. 120 kosa ireo ray aman-dreny nangataka fanalefahana ka haloa tsikelikely ny latsakemboka Fram. Manana mpampianatra Fram dimy ny EPP mbola andoavan’ny ray aman-dreny sarany.
Hiatrika fanazaran-tena lehibe iraisam-pirenena hiatrehina ny taom-pahavaratra 2024-2025, any Toamasina sy eto Antananarivo, manomboka anio ka hatramin’ny 21 septambra, ny BNGRC. Goavana ny fanamby fahafaha-miatrika ny taom-pahavaratra amin’ity taona ity. Manaraka ny torolalana voafaritra ao anatin’ireo fepetra ijoroan’ny paikadim-pirenena momba ny fitantanana ny tandindon-doza sy ny loza ny asa.
Nihaona ny minisitry ny Mponina sy ny firaisankina, Razafinjato Aurélie, sy ny sekretera mpanatanteraka eo anivon’ny BNLTEH, Ramahandrisoa Eric. Nanamafy ny fiaraha-miasa hampahomby ny ady atao amin’ny famarinana olombelona, izay fanandevozana miseho amin’ny endriny vaovao ny dinika.
Fifampizarana izay fahasarotana amin’ny fampiasana ny fitaovana sy ny fanafody ho an’ireo ankizy sy tanora miaina miaraka amin’ny diabeta no lohahevitra noresahina nandritra ny hetsika, ny faran’ny herinandro teo, teny amin’ny Amadia. Nisy ny fizaham-pahasalamana toy ny fanao isan-telovolana…

Hatao any Antsirabe ny Andro maneran-tanin’ny Far­ma­sianina, ny 25 septambra izao. Hifanindran-dalana amin’izany ny Herinandron’ny Farmasia ny 26 sy27 septambra. Lohahevitra voizina mandritra ny hetsika ny “Far­masianina: miatrika ny filàna ara-pahasalamana maneran-tany”.
Fihaonan’ireo antokon’asa rehetra misehatra ao amin’ny tontolon’ny farmasia miaraka amin’ireo mpianatra ho farmasianina eto Madagasikara ireo 3 andro ireo.
Entina hampahafantarana misimisy kokoa io sehatrasa io sy ny toerany eo anivon’ny tontolon’ny fahasalamam-ba­hoaka ny Herinandron’ny farmasianina. Hisy ny fanentanana miompana amin’ny loza ateraky ny fanaovana dokotera tena sy ny fivarotana fanafody tsy ara-dalàna, na koa ny maha zava-dehibe sy saro-pady ny taratasim-panafody ao Antsirabe mandritra ny fihaonana.
Ny tontolo andron’ny 25 septambra dia hisy ihany koa ny fizaham-pahasalamana mai­maimpoana, ny fitiliana ny aretina tazomoka, diabeta sy ny tosidra.
Ny Herinandron’ny Far­masia kosa dia natokana ho an’ireo matihanina sy ireo mpianatra eo amin’ny sehatry ny fahasalamana. Hisy ny fampirantiana sy fampahafantarana momba ny tontolon’ny fanafody. Eo koa ny famelabelaran-kevitra samihafa. Anisan’ ny hovelabelarina amin’izany ny zavatsoa azo avy amin’ny ranomafanan’ Antsirabe, ny toeran’ny zavamaniry fanao fanafody eo amin’ny fiainana, na koa ny fianarana momba ny farmasia any am-pitan-dranomasina.

Tatiana A

“Nahatonga ny fisainana hoe tokony hohalavaina ny fe-potoana farany fametrahana ny antontan-taratasy firotsahan-kofidina eny anivon’ny Ovec ny fahavitsian’ireo nametraka izany.”

Io ny fanazavan’ny mpampaka-tenin’ny Ceni, Andria­maro­tafika Soava, teny Alarobia, omaly, ny amin’ny fametrahana ny antontan-taratasy firotsahan-kofidina ho ben’ny Tanàna sy mpanolotsaina. Nahemotra hatramin’ny 26 septambra izany, araka ny tolo-kevitry ny Ceni, raha tokony hifarana amin’ny 19 septambra. Antony roa no nahatonga izay fahavitsian’ny fa­metrahana ny firotsahan-kofidina izay. Eo ny toe-tsain’ny sasany miandry ny fotoana farany, hanentanana ny hialana amin’izay: raha miandry ny fotoana farany, ho fahasahiranana raha misy tsy feno na tsy hanam-potoana hanarenana ny tsy fahafenoana ny tena. Mahatonga ny fahavitsiana koa ny fahasarotana amin’ny fahazoana antontan-taratasy, anaovan’ny Ceni an­tso mandrakariva ny tomponandraikitra ny hanamorana ny fahazoana izany. Mba hanomezana fahafahana ho an’izay manam-paniriana hi­rotsa-ko­fidina izay. Amin’ny lafiny sa­sany, misy olana koa amin’ izay fikarakarana antontan-ta­ratasy firotsahan-kofidina amin’ny fahazoana taratasy fanamarinana ny fandoavan-ketra: adihevitra be fa tsy mitovy, ohatra, ny hetra alaina eo amin’ny samy tantsaha. Izay no itakian’ny sasany hoe tokony hitondra fanazavana ny tomponandraikitra eo anivon’ny sampandraharahan’ny he­tra: inona na ahoana marina? Ao anatin’ny fotoana tokony hisian’izay fanazavana izay izao.

R. Nd.

Notanterahina tany Côte d’Ivoire, ny 12-13 septambra lasa teo, ny fivorian’ny mpanazatran’ny ekipa nasionaly avy amin’ny federasiona 42 mandrafitra ny Kaonfederasiona afrikanina, Caf. Nanatrika izany, tany an-toerana, Rakotondrabe Romuald Felix na ny Coach Rôrô, mpanazatra ny Barea de Madagascar.

Hotontosaina manomboka ny 26 oktobra ho avy izao ny fiadiana ny ho tompondakan’ny ligin’Ana­lamanga, diviziona voalohany. Mialoha an’izay, nilaza ny filohan’ity ligy ity fa misy ny fivoriana hatao ny 8 Oktobra izao, eny amin’ny biraon’izy ireo. Tsiahivina fa ny ekipan’ny AS Ste Anne no tompondakan’Analamanga farany teo.

Nandresy ny ekipan’ny TSBB, tamin’ny isa 29 no ho 20, ny ekipan’ny AT2B, sokajy U12 lehilahy, nandritra ny andro voalohan’ny “Fety de Baskety e”. Mbola nahazo fandresena tamin’ny isa 55 no ho 33 ihany koa ny AT2B, sokajy U20 Lehilahy, nanoloana ny ekipan’ny BCF 4.

Nisy ny hetsika karakarain’ny mpanao fanatanjahantena ao Frantsa, ny faran’ny herinandro teo. Malagasy mpila ravinahitra any an-toerana no nandray anjara nandritra izany. Anisany nandraisana anjara ihany koa ny Kung fu Wisa Ken-Tao.

Tontosa ny 14 sy 15 septambra lasa teo, tao amin’ny Stade Leo-Lagrange, ny an­diany faha-45 amin’ny “Natio­nal de Chalon”, taranja tsipy kanetibe. Resy teo amin’ny famaranana ny ekipa malagasy, nahitana an’i Jean Bruno Andry sy Andrianjaka Jean-Michel (Tsetse) ary Rakoto­niai­na Faratiana (Tiana Kely). Lavon’ny ekipa nisy an-dry Paul Martin sy Eric Dasnias ary Thimothé Pithon, tamin’ny isa mazava 13 no ho 3, ry zalahy.
Nanantombo teo amin’ny tifitra ry Thimothé, anisan’ny mpilalao zandriny nifaninana tamin’ity. Tsy nahatohitra mi­hitsy, na teo amin’ny fakana isa, na teo amin’ny fitifirana kanety ny ekipa malagasy.
Tsiahivina fa nanilika ny ekipan-dry Lahatra Randria­ma­nantany sy Miclo ary Bil­laud, tamin’ny isa 13 no ho 1, ry Tsetse, teo amin’ny manasa-dalana. Nandavo an-dry De Simone sy Marmi ary Ail­loud, tamin’ny isa 13 no ho 0, tany amin’ny ampahavalon-dalana, saingy sendra ny taolana ry zalahy teo amin’ny famaranana.
Marihina fa ity no namaranan’ny ekipa malagasy ny “Tournoi Estival 2024”, natao tany France, nandritra ny telo volana.
Dingana manaraka ho an’ny Federation sport-boule malagasy indray izao ny fanomanana ny fiadiana ny ho tompondaka maneran-tany hatao any Dijon France, ny 5 – 8 desambra ho avy izao. Fifaninanana ho an’ny sokajy olona telo miaraka, lehilahy.

Tompondaka

Hotontosaina ny 26 septambra hatramin’ny 6 oktobra ho avy izao, eny amin’ny Lapan’ny fanatanjahantena Mahamasina, ny dingana farany fiadiana ny tompondaka nasionaly N1A lahy sy vavy, taranja basikety. Ekipa lahy 8 sy vavy 8 tafiditra ao anatin’ny Elites 8 no hiady ny anaram-boninahitra amin’ity fifaninanana ity. Ho an’ny sokajy N1A vavy, ny GNBC, Ascut, Fandrefiala, USJFM, MB2All, JEA, Fandrasa ary ny Ankaratra no mandrafitra ny Elites 8. Eo amin’ny sokajy lehilahy kosa, ny COSPN, Ascut, BCV, Cosfa, GNBC, MBC, SBC ary ny NGB no tafakatra hiatrika ny famaranana ny fifaninanana nasionaly N1A. Araka ny fandaharam-potoana, ny 15 septambra izao no hanaovana ny fivoriana ara-teknika ka hahafantarana ny fandaharan-dalao. Tsiahivina, ny MB2All Analamanga no nandrombaka ny fandresena tamin’ny fiadiana ny tompondakan’i Madagasikara N1A, sokajy vehivavy, taona 2023. Ny GNBC Analamanga kosa no tompondaka 2023, ho an’ny sokajy lehilahy.Andrasana, araka izany, izay handimby ireto ekipa sangany ireto.

Mi.Raz

Afaka 10 andro, izany hoe, ny 27 septambra ho avy izao, any Dubaï, hanomboka ny fifanintsanana iraisam-pirenena amin’ny taranja rugby, sokajy vehivavy, “WXV III”. Anisan’ireo firenena hisolo tena an’i Afrika i Madagasikara.

Vonona tanteraka ireo vehivavy malagasy Makis hiatrika ny fiadiana ny ho tompondaka maneran-tany taranja rugby “WXV III”, izay tontosaina any Dubaï, ny 27 septambra-12 oktobra ho avy izao. 40 ny isan’ireo mandrafitra ny delegasionan’ny Makis Ladies, ka ny 30 amin’izy ireo mpilalao ary ny folo ambiny Staff.
Raha ny vaovao voaray, anio izy ireo no hanainga etsy Ivato, handeha ho any Kenya. Tsiahivina fa hiatrika lalao fanomanana, hifandona amin’ny ekipam-pirenena kenianina, ny Makis, ny 20 septambra ho avy izao, any an-toerana. Aorian’ity fifanandrinana amin-dry zareo kenianina ity, hanainga ho any Dubaï ny ekipa na­sionaly malagasy. Tsiahivina fa efa nanomboka ny 12 aogositra lasa teo ny vehivavy Makis no nanatanteraka fampivondronana teny amin’ny Kianja Makis Andohatapenaka. Tsara ny mampahafantatra fa ny ekipan’i Espagne, Samoa, ary Hong-Kong no hihaona amin’i Madagasikara mandritra ny fifanintsanana.

Fitia Randria

Ny lisitr’ireo mpilalao 30 :
1-Razafindramanga Fenitriniaina Hanta (FTM), 2-Rasoarimalala Mamisoa (FTM), 3-Rabarivelo Miora Laurencia (SCB), 4-Rasoanandrasana Laurence (SCB), 5-Raminoarisoa Fanomezantsoa Elinah (RCTS), 6-Sahondramalala Nomenjanahary Sarindra (3FB), 7-Andriatsilavina Oliviane Yvanah (SCB), 8-Nomenjanahary Nofy Rova Malala (SCB), 9-Rasoanantenaina Eleonore Virginie (FTM), 10-Raharimalala Delphine Sarindra (FTM), 11-Rakotoarison Felaniaina Marie Jeannie (FTM), 12-Razanakolona Fenosoa Fiderana Samaritana (FTFA), 13-Nomenjanahary Sariaka (SCB), 14-Rasoanandrasanavolatiana Marie Fleuris (FTFA),
15-Mirasoa Fenohasina Rafaliharimanana Joela (FTFA), 16-Ranorovololona Vonjimalala (3FB), 17-Razafiarisoa Voahirana Marie Sophie (3FB), 18-Rahariravaka Andoniaina Marie Vacilly (RCTS), 19-Razanakiniaina Valisoa Erickah (SCB), 20-Rasoanekena Veronique Eluriche (RCTS), 21-Razanamahefa Tiana Jinah (SCB), 22-Fanantenana Zaya Dinharisoa Zouanah (SCB), 23-Hanitriniaina Mamy Nirina Olivia (3FB), 24-Rasoarimalala Claudia Maminiaina (FTFA), 25-Bodonandrianina Marie Christine (FTFA), 26-Razafializay Nanou Loula (US Joue France),
27-Ravaoarinoro Mialy Tiana (3FB), 28-Rafanomezantsoa Rojoniaina (FTFA), 29-Ravaoharisoa Nirina Noromalala (SCB), 30-Rakotozafy Nomenjanahary Aina Hanitr’oliva (Asut)

Mpanazatran’ny Makis Ladies : Randriamihaja Alain.

Tontosa ny faran’ny herinandro teo, teny amin’ny Kianja Makis Andohatape­naka, ny famoahana tamin’ny fomba ofisialy ny andiany faha-19, «Dominique Savio» ho an’ny avy eo anivon’ny fikambanana mpikabary katolika (Mpikalo). Miisa 510 no nandrafitra ity andiany ity. Ankoatra ny fitandroana sy fanajana ary fampiroboroboana ny kolontsaina sy ny fomba amam-panao malagasy, tan­jon’ny Mpikalo ny hanandratana ny maha kristianina sy ny fitaizana ireo mpikambana ao anatiny.
Zavakanto sy kolontsaina malagasy miroborobo ankehitriny ny kabary. Zary lasa mivaona indray ary ny sasany amin’izy ireny, na dia nandalo fandalinana sy fampianarana momba ny kabary aza. «Variana any amin’ny kabary miady rima sy hatsikana fotsiny ny sasany amin’ny mpikabary ankehitriny ka very ilay maha kolontsaina sy soatoavina mila tandremana», hoy Rakotomalala René, filoha nasionalin’ny Mpikalo. Izany indrindra no ezahin’ny tomponandraikitra, indrindra ny avy eo anivon’ny Mpikalo ifantohana misimisy kokoa mba hametrahana tsara ilay kabary sy tsy hahapotika azy.
Miofana madritra ny 9 volana. Ankoatra ny Baiboly sy ny maha kristianina, mandalina ny taranja maha Malagasy, ny kolontsaina sy ny riba ary ny fomba, ihany koa ireo mpiofana. Marihina fa hankalaza ny faha-20 taona nijoroany ny fikambanana amin’io taona ho avy io.

Lin

Nanao tari-dositra teny amin’ny dahalo naka azy ho takalonaina ireo olona miisa roa lasibatra, ny 22 jolay lasa teo. Karohina ireo olon-dratsy.

Tafatsoaka teo am-pelatanan’ireo dahalo mpaka an-keriny, ny zoma hariva teo, ireo olona roa nalaina an-keriny. Ny 22 jolay 2024 tamin’ny 9 ora sy 30 mn no lasan’ireo mpaka an-keriny tao amin’ny fokontany sy kaominina Ambatomanoina, distrika Anjozorobe, izy ireo, kanjo tafaporitsaka tampoka tao amin’ny toeram-piompiana omby, ao Kelimahery Ambolo­tarakely, distrika Anjozorobe. Tsy nisy fandoavam-bola, araka izany, nataon’ny fianakavian’izy ireo na teo aza izany fitakiana nataon’ny malaso izany. Efa tonga any amin’ ny fianakaviany, ao Antsakay, fokontany Maromandia, kaominina ambanivohitr’An­taka­vana, tamin’io alina io, izy ireo. Ireo mpitandro filaminana manao ny hetsika «OPS Coups de Poing” ao Amba­to­haranana, fokontany Ambohi­tsi­taitaika, Beronono, no nian­tsoroka ny fiarovana tamin’ny fanaterana azy ireo teo am-pelatanan’ny fianakaviany. Mitohy ny fanadihadiana sy ny fanarahan-dia ataon’ny zandary ireo malaso.

J.C

Efa-dahy tra-tehaky ny polisy teo am-pangalarana moto tao Androhibe, boriborintany fahadimy, ny 12 septambra teo. Mivelona amin’ny asa fibatabatana entana izy efa-dahy ireto saingy mangalatra moto tampoka rehefa misy mipetrapetraka. Nisy nahatsikaritra tampoka anefa ny fihetsik’ireto mpandroba. Nibata ny moto izay tsy azy ireo izy efa-dahy. Tsy lavitra ny mpitandro filaminana ka noraisim-potsiny izy ireo. Natolotra ny tompony ny moto.

Tsiferana R.

Nisandoka andraikitra, na­nao fanamiana tsy ara-dalàna, ka nosamborin’ny zan­dary ny lehilahy iray tao amin’ny fokontany Manarin­tsoa, kaominina Ankadinondry, ny sabotsy 14 septambra teo. Nitonon-tena ho mpitandro filaminana, nanararao-pahefana, tao amin’ny trano fisotroana tao Bejofo io lehilahy io. Lasibatra tamin’izany ny raim-pianakaviana iray monina ao Manarintsoa. Nosolokian’io lehilahy io ary norahonany ilay lasibatra. Nidina ifotony ny zandarimaria nanao ny fanadihadiana sy nanangom-baovao momba ilay voalaza ho mpisoloky. Nentina natao famotorana ity voasaringotra tamin’ny fanambakana olona ity. Nosavaina ny taratasy rehetra izay nirakitra ny mombamomba azy. Voamarin’ny zandary fa mpisoloky io lehilahy io. Tsy anisan’ny mpitandro filaminana izy. Tsy vitan’izay, nihazona fanamiana mpitandro filaminana koa izy. Hoentiny manao ramatahora ireo rehetra izay solokiany izany. Nogiazan’ny zandary io fanamiana io. Nentina natao fanadihadiana alohan’ny hanolorana azy eny anatrehan’ny fampanoavana ity lehilahy ity.

Tsiferana R.