Miisa 552 ireo nahazoan’i Madaga­sikara fifandraisana sy nampanantena ny hanjifa ny vokatra malagasy, nandritra ny hetsika « Food Ingre­dients Eu­ro­pe » (FIE), ny 19-24 novambra 2024 tany Francfort-Alemaina. Lafo avokoa ny ankamaroan’ny lavanila « bio » ho an’ireo orinasa mpisehatra amin’izany. Hitombo, araka izany, ny vola miditra amin’izy ireo.
Voatazona ny 18 000 « palettes » tamin’ny fa­nondranana ny letisia nandritra ny taom-piotazana na dia nihena 50,3% aza ny vokatra, vokatry ny fiovaovan’ny toetr’andro. Nampirisika ny mpandraharaha handeha tamina toerana lavitra sy saro-dalana ny zava-nisy hahatrarana ny habetsaky ny vokatra takin’ny fanondranana.
Nisongadina i Madagasikara nandritra ny he­tsika « Fitur », andiany faha-45, tany Madrid, Espag­ne. Nihaona tamin’ireo tomponandraikitra samihafa ny minisitry ny Fizahantany sy ny asa tanana nandritra ny hetsika. Kendrena tao anatin’ny fifanakalozan’ny roa tonta ny fampiroboroboana ny fizahantany eto amintsika eo amin’ny sehatra iraisam-pirenena.
Laharam-pahamehana ny famokarana ara-biolojika sy ny voly fanondrana hitsinjovana ny tsena iraisam-pirenena sy hampitomboana ny fidiram-bolan’ny mpamokatra. Mila faritana ireo faritra voatokana ho an’ny famokarana sy hanaraha-maso ny fenitra mifanaraka amin’izany.

Efa manomboka ny asa fananganana ny tetezan’i Mangoky eo Bevoay any amin’ny lalam-pirenena RN9. Tsy mora ny asa fa mila fanadihadiana lalina ampiasana ny teknolojia avo lenta. Satria, lava dia lava ity tetezana vaovao ity, mirefy 900 km. Efa am-perinasa ny orinasa sinoa CRBC, manadihady ny herin’ny renirano, ka nohalavaina ny fe-potoana, nohavaozina ny antontan-kevitra. Efa hatrany amin’ny 15% ny fivoaran’ny asa, ary vinavinaina ho vita tanteraka amin’ny faran’ny taona 2026. Famatsiam-bola avy amin’ny mpamatsy vola arabo (Badea, FSD,…) sy ny governemanta malagasy. Hisy koa asa sosialy hataon’ny orinasa ankoatra ny fanorenana ny tetezana. Toy, ny fananganana tobin’ny zadarimaria, fanarenana sekoly EPP sy toera-pitsaboana, famatsian-drano, jiro manazava arabe, sns.
Lemak’i Bevoay

Nifampidinika tamin’ny minisiteran’ny Fambolena ny tantsaha mahakasika ny famatsian-drano ny lemak’i Bevoay, nandritra ny fidinana ifotony tany an-toerana. Koa, hanokana tetibola ny minisiteran’ny Asa vaventy (MTP) ho amin’ny fampidiran-drano mandritra ny fotoana main-tany. Tsiahivina fa efa vita tanteraka ny lalana RN9, miainga any Toliara hatreo amin’ny distrikan’i Manja. Eo am-pamolavolana ny fanohizana hatrany Dabaraha sy Mo­rondava.

Njaka A.

Maromaro ireo ben’ny Tanàna vao voafidy no ahina ho voasaringotra amin’ny kolikoly. Anisan’izany ny ben’ny Tanànan’Antsiranana, i Jean Luc Djavojozara. Nofidin’ny vahoaka any an-toerana tamin’ny salanisa 65% ny tenany na tsy afaka nanao propagandy aza.

Ny ekipany ihany koa no nametraka ny an-tontan-taratasy firotsahany. Efa namoahana didy fampisamborana avy amin’ny Pac noho ny fiahiahiana kolikoly tamin’ny fitantanany ny kao­minin’Antsiranana izy ny tao­na 2017. Voaheloka sazy mihatra 5 taona an-tranomaizina sy lamandy 20 tapitrisa Ar ity farany.
Etsy andaniny, namoahana didy fampisamborana ny ben’ny Tanànan’i Bealanana, vao voafidy teo, Morainjara Donit Florent. Mbola fanodinkodinam-bola fony izy ben’ny Tanàna ny taona 2017 koa ny antony. Efa nilatsaka ny saziny, figadrana 2 taona an-tranomaizina sy lamandy 20 tapitrisa Ar. Samy tsy hita popoka avokoa izy ireo amin’izao fotoana izao.
Ankoatra izany, nosamborina afakomaly hariva kosa ny ben’ny Tanàna vao voafidy any Nosimena, Miandrivazo. Tsy mbola fantatra ny antony. Tsiahivina fa nandresy ity kandidà tamin’ny vokatra navoakan’ny Ceni. Notorian’ny kandidà Irmar ny tenany, saingy mbola nahazo rariny tamin’ny nilazan’ny Fitsarana misahana ny ady amin’ny fanjakana (Taf) fa tsy mitombina ny fitoriana. Nahagaga ny vahoaka anefa fa ny kandidàn’ny mpitondra indray no nandresy.
Araka izany, mbola baraingo ny hoavin’ireo olom-boafidy ireo sy ny kaominina tantaniny ary ireo vahoaka mpifidy.

Synèse R.

Niharan’ny fanafihan-jiolahy ny renim-pianakaviana iray hamonjy ny asany tao Andranomadio Toamasina, ny alarobia tamin’ny 8 ora sy 30 mn maraina. Jiolahy roa nitondra basy sady nanao taingin-droa tamin’ny moto no nanakana azy. Voambana basy izy, tsy vitan’izay fa norahonan’ireo olon-dratsy hiala avy eo ambony moto nentiny. Tsy maintsy nidina tokoa ity renim-pianakaviana ity ka lasan’ireo jiolahy ny moto sy ny finday tao anaty poketra nipetraka tao anaty fitoeran’entana. Nambarany fa tsy nisy vola io finday lasan’ireo mpanafika io.
Fanafihana faharoa, tamin’io fotoana io ihany tao Anjoma, tsy lavitry ny fiangonana Ekar. Renim-pianakaviana mpitantana Cash point koa no nandrasan’ny jiolahy roa nitaingina moto. Vao nanokatra ny varavaran’ny Cash point hiasany ilay ramatoa no niditra an-keriny izy roa lahy. Nanambana basy nandrahona nitaky vola sady naka ny finday dimy teny aminy. Tsy nisy lelavola lasa tamin’io fotoana io fa nosakanana ny kaonty tao anatin’ilay finday. Mitombo isan’andro ny fanafihana mitam-piadiana ao Toamasina amin’izao fotoana izao. Tsy mifidy intsony ireo jiolahy fa mitondra faisana izay tratran’izy ireo.

Sajo

Nanatanteraka valandresaka niarahana tamin’ireo mpanao gazety, ny filohan’ny Malagasy Rugby, Rakotomalala Marcel, omaly, teny amin’ny birao hiasany etsy Andohatapenaka. Nison­gadina tamin’izany ny handraisan’i Madagasikara, ny fiadiana ny ho tompondakan’i Afrika, amin’ny taranja Rugby lalaovin’olona fito, sokajy vehivavy.
Araka ny nambaran’ity lehiben’ny federasiona ity, zava-dehibe tokoa io fifaninanana io satria natao hiadiana ny tapakila hiatrehana ny fifaninanana izay ho tompondaka maneran-tany, ny taona 2026. Ireo firenena 12 tsara indrindra aty Afrika no hiatrika izany. Tsiahivina fa ny taona 2022, tany Afrika Atsimo, no niatrehan’ny Makis Ladies Sevens ny Mondial voalohany. Ankoatra izay, tsara ny mampahafantatra fa anisan’ireo fire­nena mifanin­tsana amin’ny World Series Challenger, lalaovin’ olona fito ihany, sokajy lehilahy, i Madagasikara. Fifaninanana hotontosaina any Cape Town Afrika Atsimo, ny 1-2 sy ny 7-8 marsa ho avy izao.
Izay valo voalohany amin’izany no makany Pologne, ny volana avrily ho avy io. Efa ao anaty ny fanomanana tsara ireo lehilahy mpilalao anaty ekipa nasionaly. Nampitandrina ny mpi­tantana ny Malagasy Rugby, fa handray fepetra izy ireo ho an’ ireo olona manao teny fihantsiana anaty tambajotra-tserasera.

F.R

Anisan’ny nanamarika ny fifidianana ben’ny Tanàna natao ny 11 de­sambra teo ny tsy fahatomombana sy ny tsy fanarahan-dalàna na koa ny hosoka. Teo koa ny fanodinkodinana ny voka-pifidianana. Anisan’izany ny tany amin’ny faritanin ‘i Fianarantsoa ka tsy maintsy haverina ny fifidianana amin’ ny kaominina miisa efatra. Eo ny tany amin’ny kaominina Kianjandrakefina any amin’ny distrikan’Ambositra, ny tao amin’ny kaominina Ilakaka, faritra Ihorombe sy ny kaominina iray any amin’ny distrikan’i Vangaindrano, faritra Vato­vavy.
Miisa 430 ireo ben’ny Ta­nàna voafidy ho an’ny faritanin’i Fianarantsoa. Haverina ma­nontolo koa ny fifidianana amin’ ny kaominina miisa telo any amin’ny faritanin’i Toliary.
Etsy andaniny, nisehoana fivadihan’ny voka-pifidianana ny tany Dabolava, Miandri­vazo. Nahazo ny vato ambony, 1 215 ny Firaisankina raha 1 067 ny an’ny Irmar. Niova anefa izany rehefa nivoaka ny didy tao amin’ny Fitsarana misahana ny ady amin’ny fanjakana (Taf) tany Toliary. Niampy 200 ny vato azon’ny Irmar ka lasa 1 267 izany raha nijanona ho 1 215 kosa ny an’ny Firaisan­kina.
Tsiahivina fa lasan’ny Irmar avokoa ny toeran’ny ben’ny Tanàna, amin’ireo renivohi-paritany dimy amin’ny alalan-dRafanomezantsoa Alain any Toamasina; Ramanandraibe François ao Fianarantsoa; Rabehaja any Toliary raha Ramanantsoa Harilala eto Antananarivo. Voafidy tany Mahajanga kosa i Heriniaina Tia Solofomanga. Noromba­hin’ny tsy miankina, Djavojo­zara Jean Luc Désiré kosa izany ho an’ny tao Antsira­nana.

Synèse R.

Hananganana toby fivarotan-tsolika ny distrika miisa 38 tsy mbola manana eto amintsika. Hotaterina amin’ny sambo ihany koa ny solika mankany Mahajanga sy Toliara. Nodinihina ny fifanarahana eo amin’ny Jirama sy ny mpamatsy solika amin’ny lafiny famatsiana ny milina.

Fomba ahavitan-tena ara-bary ny fanapariahana ny fitaovana mekanika. Hamoraina ny fahazoana masomboly sy zezika ny tantsaha. Havaozina ny fitantanana ny rano sy ny fotodafitrasa manondraka ny lemaka. Hamboarina ny lalana hamoahana ny vokatra. Nivoitra ireo nandritra ny asam-baomiera tamin’ny fikaonandoha mikasika ny fambolena teny Ivato.

Vita ny fanarenana ny arabe « Avenue » ao Fenoarivo Atsinanana. Avy amin’ny Tahirimbolan’ny lalana (FR) ny vola nanaovana ny asa, notanterahin’ny orinasa Metalu. Noraisina vonjimaika, omaly, ny asa, notanterahin’ny tompon’andraikitry ny Fotodra­fitrasa (DINFRA) sy ny fitantanam-paritry (DRTP) Ana­lanjirofo.

Miisa 10 000 ny zanakazo nambolen’ny mpiasan’ny primatiora, omaly. Mahatratra 9 ha ny velaran-tany nanatanterahana izany teny Ambatombo­lamena, fokontany Amboniandrefana, distrika Atsi­mon­drano. Nitarika ny fotoana ny praiminisitra Ntsay Christian, notronin’ny mpiasa rehetra.

L’histoire demeure, les témoins sont là

Notapahan’ny tsy matahotody ny lohan’ilay ankizivavy vao 16 taona tao Marovato, distrikan’i Tsihombe, ny alin’ny talata hifoha ny 22 janoary teo. Mpandalo no nahita ny fatin’io olona nisy namono io. Nariana tany amin’ny toerana nangingiana ny vatan’io ankizivavy vao erotrerony io. Nentin’ireo jiolahy nanaraka azy ny lohany. Niezaka nikaroka ireo nahavanon-doza ny fiakanavian’ilay lasibatra. Tsy fantatra ny nahavanon-doza. Tranga fanapahan-doa faninenina niseho tao amin’ny distrikan’i Tsihombe tao anatin’ny enim-bolana ity. Tsy fantatra ma­zava ny anton’ny hanaovan’ireo olon-dratsy ny habibiana toy izao. Marihina, miseo lany ny vono olona tsy an-tanàn-dehibe hatrany ambanivohitra saika manerana ny faritra amin’izao fotoana izao. Raha tsy lasibatry ny dahalo, maty vokatry ny disadisam-piarahamonina ny ankamaroan’ny olona. Manjaka ny tsy fandriampahalemana ka mitaky ny fandraisan’andraikitry ny tsirairay indrindra ny mpitandro filaminana.

Tsiferana R.

Hifarana androany ny fampiofanana tanora mahakasika ny fahaiza-manao entina miatrika ny loza ara-boajanahary (GRC). Fio­fanana nanomboka omaly, tanterahina etsy anivon’ny QG Tanora Ankorondrano. Atri­kasa karakarain’ny CCMAJ eo anivon’ny ministeran’ny Ta­nora sy ny fanatanjahantena.
Ampiofanina mahakasika ny fahaiza-manao entina miatrika ny loza ara-boajanahary izany ireo tanora ireo. Mba hahay handray an-tanana sy handray andraikitra manoloana ny loza maro mety hiseho, indrindra rehefa amin’ny vanim-potoan’ny fahavaratra sy ny orana tahaka izao. Fi­kambanana tanora miisa dimy ireo miofana mandritra izany. Andrasana ny hahatongavan’ny tanora manodidina ny 100 isa mandritra ny roa andro. Tanora 50 isa ho an’ny andron’ny omaly, 50 isa kosa no andrasana ho an’ny anio.
Tsiahivina fa misy ny fiaraha-miasa miaraka amin’ny BNGRC, ny avy amin’ny SBC Unicef. Ezahina ny hanaovana ny atrikasa tahaka izao. Satria, manampy betsaka ny tanora hiatrika ny mety ho ka­razana loza ara-boajanahary misy isan-karazany ny fiofanana toy izao.

Mino

Vonona hanohana antsika amin’ny famokaram-bary i Korea Atsimo. Eo koa ny indostria vaventy toy ny fitrandrahana vaventy ny harena an-kibon’ny tany ary ny fifanakalozana ara-barotra. Nivoitra ireo nandritra ny fihaonan’ny masoivoho, Park Ji-Hyun sy ny Praiminisitra Ntsay Christian, omaly, teny amin’ny Lapan’i Mahazoarivo.

Vita ny fanarenana ny lalana tena ratsy any Mahatsinjo RN44 avaratra, mampitohy an’Ambatondrazaka sy Vohitraivo. Mirefy 800 metatra ny asa nataon’ny orinasa Fanasina. Nosoloin’ny orinasa Mahavanontsoa «béton» ihany koa ny tetezan-kazo eo amin’ny fidirana an’Ambatosoratra.

Miisa 10 000 ny zana-kazo voavoly tany Maintirano, omaly 22 janoary. Zanakazo nahitana Acacia, Gmelina, Anakaraka, Arofy, Kily, Kininina, … Nandritra ny fanokafana ny taom-pambolen-kazo 2025 ho an’ny faritra Melaky no nanatanterahana ireo. Nandray anjara daholo ny avy amin’ny sampandraharaham-panjakana sy ny tsy miankina tany an-toerana.

Harenina ny fotodrafitrasan’ny famatsian-drano any amin’ny lemaka PC 15 sy ny Vallée Marianne any Ambatondrazaka. Ho vita tanteraka amin’ny faran’ny volana janoary ny asa. Tena ritra ny rano, ankehitriny, any amin’ny tohodrano Bevava PC 15. Anisan’ny vahaolana naroson’ny fanjakana ny hanaovana taniketsa iombonana.

Fanamby lehibe napetraky ny filoha Rajoelina Andry ny fanombohana amin’ity taona ity ny asa fanamboarana ny lalam-pirenena RN10, mampitohy an’Andranovory sy Am­bovombe. Efa natao ny ampahan-dalana mirefy 4 km tamin’ny alalan’ny Famatsiambola anatiny (RPI). Nijery ifotony ny fizotry ny asa ny minisitry ny Asa vaventy (MTP), Rafidison Richard Théodore, omaly, niaraka tamin’ny tomponandraikitry ny tetikasa avy ao amin’ny Antokon-draharaha misahana ny lalana (Agence routière) sy ny fitantanam-paritry ny Asa vaventy (DRTP) Atsimo Andrefana. Efa vita godirao ny 1,6 km, ka nomena baiko ny orinasa hampitombo ny fitaovana, hahavitan’io ampahan-dalana io mialoha ny faran’ny volana febroary ho avy izao.
Ankoatra izay, mitotaly 414 km ny lalana harenina amin’ny RN10, famatsiam-bolan’ny Banky iraisam-pirenena, ao anatin’ny tetikasa PCMCI. Hovitaina amin’ny telo volana voalohany ity ny antso tolobidy, ho an’ny Andranovory PK4- Ambatry PK 101, mirefy 98 km. Toraka izany koa ny antso tolobidy ho an’ny Ambatry-Ampanihy (113 km). Eo andalam-pikarakarana ny fanombohana ny Ampanihy – Beloha (92 km) sy ny Beloha-Ambovombe (111 km).
Nanamafy ny minisitra MTP, Rafidison Richard, fa tsy maintsy vita hatramin’ny farany ny asa, mba hitondra fampandrosoana ho an’ny faritra, in­drindra ny any atsimon’ny Nosy.

Njaka A.

Natao sonia, omaly, ny fifanarahana eo amin’ny Ofisim-pirenena ho an’ny fizahantany eto Madagasikara (ONTM), sy ny Fikambanana iraisam-pirenena ho an’ny fizahantany, ny «Tourisme sans frontière» (TSF). Mifantoka amin’ny lohahevitra efatra ny fiaraha-miasa. Fanamafisana ny fahaiza-manao ny ofisim-paritry ny fizahantany, amin’ny lafiny fifehezana ny tsena sy ny varotra, toy ny fikarakarana foaran’ny fizahantany, ohatra. Eo koa, ny fanolorana tolotra tsara kalitao amin’ny fizahantany. Hampirisihina ny mpandraharaha handray anjara amin’ny hetsika eto an-toerana sy iraisam-pirenena, toy ny Salon Solidarissimo hatao any Comar, ohatra. Hisy koa ny fanohanan’ny TSF ny ONTM amin’ny fametrahana fiara-miasa, hampiroboroboana ny fizahantany aty Madagasikarara amin’ny mpanjifa any Frantsa.

Njaka A.

Quand les âmes se rencontrent à Babetville.

Hosokafana amin’ny fomba ofisialy ny sabotsy 25 janoary ho avy izao ny taom-pilalao­vana 2025 ho an’ny ligy atletisma Ihorombe. Hotantera-§hina eo amin’ny Kianja fahaleovantena Ihosy izany. Hisy hetsika maro hanamarihina ity fanokafana ity. Anisan’ireny ny fisian’ny «cross de cohésion», natokana ho an’ireo daholobe ka nanasana ireo tomponandraiki-panjakana ao an-toerana, ary ny fianakaviamben’ny atletisma ao anatin’ny ligin’Iho­rombe.
Ankoatra izay, misy koa ny «relais pédestre mixte», fifaninanana natokana ho an’ireo sekoly rehetra ao an-toerana manomboka any amin’ny EPP, CEG ary ny Lycée, izany hoe, tsy misy sokajin-taona fa misokatra ho an’ny rehetra. Han­dray anjara amin’ity hetsika ho fanombohana ny taom-pilalaovana 2025 ity, ireo seksiona roa mandrafitra ny ligy dia Ihosy sy Ivohibe ary ireo klioba rehetra.
Marihina fa nahatontosa ny fifaninanana rehetra tamin’ ny taona 2024 ny ligin’Ihorom­be ary nahazo fankatoavana 100% tamin’ireo seksiona any an-toerana ny mpitantana. Tsara ny vokatra ho an’ny ligin’Ihosy tamin’ny taon-dasa, izay nahazoany medaly 12 ta­min’ny fifaninanam-pirenena. Hiezaka hatrany ny mpitondra ny ligy amin’ity handrombaka anaram-boninahitra maro. Tsiahivina fa hampiantrano ny fiadiana ny ho tompondakan’i Madagasikara, eo amin’ny «Cross country» ny ligin’Ihosy, ny 15 marsa 2025.

Tompondaka

Hisy « festival de rugby » ho an’ny sokajy zandriny U13 sy U16, lahy sy vavy, hatao ny sabotsy 25 janoary ho avy izao. Fihaonana karakarain’ny Malagasy rugby ary hotanterahina etsy amin’ny Kianja Makis Andohatapenaka. Klioba 14 no hifaninana ho an’ny U13, raha 15 kosa izany ho an’ny U16.

Araka ny tsiliantsofina, mety hivoaka amin’ity faran’ny herinandro ity ny anaran’izay ho mpanazatra hitondra ny Barea de Madagascar. Efa eo am-pama­ranana ny fifanarahana amin’ilay teknisianina sisa ny Federasiona malagasin’ny baolina kitra (FMF) sy ny fanjakana amin’ny pitsopitsony rehetra.

Namoaka ny fandaraham-potoana ho an’ny taona 2025 ny taranja bodybulding. Ho an’ny fifaninanana rezionaly, ny volana marsa ny fe-potoana farany tsy maintsy hanatanterahana ny fifaninanana. Ny volana mey kosa no hanaovana ny fifaninanam-pirenena ary ny faran’ny volana jona ny hanatontosana ny fifaninanana Bodyperfect fanao isan-taona.

Hotanterahina ny 8 hatramin’ny 16 marsa izao, eny amin’ny Lapan’ny fanatanjahantena Mahama­sina, ny fifaninanana Smatchin, andiany faha-11. Fifa­ninanana natokana ho an’ny Oniversite manerana ny Nosy, miankina sy tsy miankina amin’ny fanjakana. Anisan’ny fifaninanana fanao isan-taona andrasan’ny maro izy ity.

Vaovao tsara indray no nitranga, ho an’ny taranja judo. Nivoaka ny boky voalohany mirakitra ny tantaran’ny judo mala­gasy (Tome 1). Nanoratra azy, rehefa novolavolainy aman-taonany maro, ny Maître Ratsimiketraka Jean Patrice,. “Ny tantaran’ny judo Malagasy”, io no lohatenin’ity boky ity. Efa azon’ny rehetra jifaina sy vakina izany. Tepana mainty 5e Dan, mpi­tsara iraisam-pirenena ary mpikambana eo anivon’ny komi­siona nasionalin’ny grady, ny Maître Jean Patrice. Niaina ny taranja judo an-taonany maro izy ary tao anatin’izay no nahafahany nanoratra ity boky ity hampahafantarina ireo mpise­hatra eo amin’ity taranja ity eto Madagasikara sy manerana izao tontolo izao. Marihina fa efa naparitaka any amin’ny ligim-paritra manerana ny Nosy ity boky ity mba hahafahan’ny mpiangaly sy mpikirakira ity taranja ity mampitombo fahala­lana sy mamantatra ny tantara ka hampihatra izany amin’ny tontolon’ny judo eto Madagasikara.
Manasa ny mpiandraikitra efitrano fikotranana sy ireo judokas hamaky sy hampiasa ity Tome 1 amin’ny tantaran’ny judo ity ny Federasiona malagasin’ny judo. Mbola hisy ny Tome 2, araka ny fanazavana azo ary efa eo am-pamolavolana izany ny mpanoratra.

Mi.Raz

Hangotraka ny famaranana lehibe amin’ny « Passion Pétanque Française (PPF 2025) ». Nisafidy ny hiaraka ao anaty ekipa iray ireo andrarezina ka anisan’izany ilay frantsay, i Dylan Rocher, ilay Italianina, i Diego Rizzi. Manana ekipa roa kosa ny Malagasy amin’ity.

Ho toy ny fiadiana ny ho tompondaka maneran-tany kely ny famara­nana lehibe amin’ny “Passion Pétanque Française (PPF 2025)”, taranja tsipy kanetibe, amin’ity. Fihaonana hotanterahina ny sabotsy 15 sy ny alahady 16 febroary ho avy izao, ao amin’ny Kianja Complexe sportif du Val del’Arc.
Hifampitana amin’izany avokoa mantsy ireo kalaza­lahy rehetra amin’ity taranja ity. Araka izany, samy nanao ny safidiny ireo mpilalao 16 voalohany, nanana isa be indrindra nandritra ny fifaninanana nampanaovin’ny PPF, ny taona 2024. Efa fantatra avokoa ireo hiaraka amin’ity famaranana lehibe ity. Anisan’izany i Dylan Rocher sy ilay italia­nina, i Diego Rizzi tompon­daka maneran-tany 2024 ary i Adrien Delahaye.
Ankoatra azy ireo, hifa­nome tanana ihany koa i Quintais sy i Philippe Suchaud ary i Pietri. Mpilalao totota­nana avokoa, izany hoe, Mala­gasy ranoray no mandrafitra ny ekipan’i Madagasikara. Hanana ekipa 2 ny Malagasy amin’ity “PPF 2025” ity ka ny ekipa voalohany ahitana an’i Zigle, tompondaka maneran-tany amin’ny «tir de précision 2024» sy i Tianakely, tompondaka maneran-tany lefitra 2024 ary i Baloti. Ny ekipa faharoa, tarihin’i Racle, mpilaravinahitra any France sy i Nanou ary i Tsé-Tsé. Mpilalao efa zatra fihaonana iraisam-pirenena avokoa izy enina mirahalahy ireo. Marihina fa tsy tafiditra ao anatin’ireo lisitra navoakan’ny PPF hanaovana fifantenana i Christian Fazzino sy Ny Havana, raha tsy hitanisa afa-tsy ireo.
Raha ny fandaharam-po-toana, hatao ny sabotsy ma­raina ny fihodinana voalohany sy faharoa. Ny tapakandro hariva ny lalao sakana sy ny ampahefa-dalana. Ny alahady maraina ny manasa-dalana ary ny folakandro ny famaranana.

Tompondaka

Nisy namaky ny trano fivarotana iray an-dRandriam­boavonjy Mbola Andry tany Tanambe Avaradrano, kaominina Ambanivohitra Tanambe, distrika Amparafaravola, ny alatsinainy 21 janoary lasa teo. Tamin’ny 2 ora maraina teo ho eo ny fotoana nisehoan’ny tranga, tamin’io fotoana io. Nanatanteraka ny fanarahan-dia avy hatrany ny alika mpitsongo-dia avy amin’ny CFS/CRFDC, tamin’ny 3 ora tolakandro tany ho any. Olona manodidina ny valo, araka izany, no natao andrimaso.
Raha tsiahivina, tsy tao an-trano izy mivady tompon-trano fa nankany Toamasina. Mpiandry trano irery no tao, tamin’io fotoana io. Noloahin’ireo olon-dratsy ny tamboho avy aty ivelany nahafahan’izy ireo niditra. Novakiny indray avy eo ny tao amin’ny trano fivarotana. Lasan’ireo jiolahy nandritra izany, ny baoritra maromaro misy ny sigara, biscuits, ranom-boankazo ary ny vola vidin’entana talohan’io fotoana io.

Mino