Anisan’ireo firenena mandray anjara amin’ity fifaninanana ara-panatanjahantena, vehivavy, ho an’ny firenena aty amin’ny faritra Atsimon’i Afrika ity, i Madagasikara. Ao amin’ny vondrona « B » no misy azy ireo.

Hotanterahina manomboka anio, any Afrika Atsimo, ny fifanintsanana baolina kitra, sokajy vehivavy, Cosafa 2024. Araka ny fandaharam-potoana navoakan’ny komity mpikarakara ny fifaninanana, rahampitso no hiakatra kianja ny Barea de Madagascar, izay hifanintsana ao amin’ny vondrona « B ». Ry zareo nosy rahavavy, Maurice, no hifandona amin’izy ireo mandritra ny andro voalohany.
Eo amin’ny andro faharoa kosa, hihaona amin’i Malawi ny ekipam-pirenena malagasy. Amin’ny lalao farany, hifanandrina amin’i Botswana ny Barea. Tsara ny mampahafantatra fa ireo voalohany isan-tsokajy ihany no tafita any amin’ny dingana manaraka, ka hiatrika ny manasa-dalana avy hatrany.
Marihina fa hifarana ny 2 novambra ho avy izao ity fifaninanana Afrikanina ity.

Manarina ny ratsy

Fanamby goavana ho an’ny Barea, vehivavy, ity Cosafa ity. Tamin’ny taona lasa, tany Afrika Atsimo ihany, nandray anjara tamin’izany ny vehivavy malagasy mpilalao. Ratsy ny vokatra azon’izy ireo, faharesena telo tamin’ireo lalao telo natao no vitan’ny ekipa nasionaly. Fotoana iray ity hahafahan’ireo mpilalao 23 mirahavavy, nantsoin’i Portez l’Hydrensia sy Ramiara­ma­nana Haingo­malala Ninette, mpanazatra an’i Madagasi­kara, hanarenana io lesoka io.
Araka ny fikarohana natao, eo amin’ny faha-190, laharana navoakan’ny Fifa ny Barea, sokajy vehivavy, raha toa ka faha-194 i Maurice.

Fitia Randria

Mihamitombo ny olana atrehin’ny Malagasy amin’izao fotoana izao. Maro ireo olona matahotra ny hiditra birao kanefa misy zo voahitsakitsaka ao anatin’izany. Noho izany indrindra no antom-pisian’ny Hafari Malagasy, mampahafantatra ny zo didian’ny lalàna amin’ny olona iray, araka ny fanazavan’ny filohan’ny Hafari Malagasy, Rafanomezantsoa Jean Nirina. Nambarany, tamin’izany, fa maro ireo olana mianjady amin’ny olona saingy ireto no hita matetika eo anivon’ny fiarahamonina: ny lehilahy tsy mamelona ny ankohonany, ny fanitsakitsaham-bady ary ny herisetra sy fikasihan-tanana (CBV). Olana mahatonga izany ny tsy fisian’ny fifampiresahana eo amin’ny mpivady. Manoloana izany, miditra an-tsehatra ny Hafari Malagasy mandamina. « Tsy terena hiaraka kanefa koa izahay tsy manery hisaraka », hoy hatrany ny mpitarika ny fikambanana. Nohamafisiny fa firenena tan-dalàna i Madagasikara ka matoa misy lalàna voahitsakitsaka dia misy zon’olombelona tsy voahaja koa ambadik’izany. Olana iray mahatonga ny korontana ara-tokantrano koa ny tsy fisian’asa amin’izao fotoana izao. Miezaka hatrany, araka izany, ny Hafari Malagasy mandrindra sy mihaino ny olan’ireo olona mahatsiaro ho voahitsakitsaka ao anatin’izany herisetra izany.

Jean Claude

Fahombiazana. Nizara traikefa sy namelabelatra ireo foto-kevitra sy paikady ary fomba fanaon’ireo mpanao fanatanjahantena matihanina eo amin’ny tontolon’ny fandraharahana, ny sabotsy teo, teny amin’ny Club Olympique de Tananarive (Le COT) Ankadikely Ilafy, ny Dr Fabrice Lollia. Notsindriny manokana fa « ilaina ny fifantohana sy fahavonona hahombiazan’ny fandraharahana sy ny fitantanana orinasa ». Maro, hoy izy, ny tombontsoa amin’ny fivoizana ny toe-tsain’ireo mpanao fanatanjahantena matihanina eo amin’ny fandraharahana. Mila omen-danja ny tsirairay mba hahafahana mandroso sy miatrika ny manodidina fa indrindra ny hahazoam-bokatra. Mila jerena ihany koa ireo ambana mety hiseho sy paikady apatraka hanatsarana ny vokatra. Takina ao anatin’ny fitantanana ny fahaiza-miaraka amin’ny ekipa, ny faharetana, ny fikirizana ary ny fifanajana. Marihina fa voamarina sy azo tamin’ny alalan’ny fikarohana siantifika avokoa ireo foto-kevitra novoaboasany mba hipaka mivantana eo amin’ny tontolon’ny fandraharahana.

Traikefa
Nizara ny traikefany tamin’ireo mpandraharaha 20 nandray anjara tamin’ny hetsika nokarakarain’ny Peak Busi­ness Partner, Rakotozafy Rosa, atleta matihanina sy nitondra ny voninahi-pirenena teo amin’ny sehatra iraisam-pirenena. « Mifameno ny fanatanjahantena sy ny asa. Mila tazomina ao an-tsaina ny kolontsaina hahazo vokatra », araka ny fanazavany.
Samy miaina anaty fifaninanana ny mpandraharaha sy ny mpanao fanatanjahantena matihanina. Mila mifantoka amin’ny tanjona apetraka ny mpandraharaha hampahomby sy hampaharitra ny fitantanany.

Henintsoa H.

Mahatratra hatramin’ny 100 miliara Ar ny vola miditra amin’ny Jirama isam-bolana raha toa ka eo anelanelan’ny 140 ka hatramin’ny 170 miliara Ar ny fandaniana ataony. Noho izany, tsy maintsy manohana ara-bola ny Jirama ny fanjakana. Mivarotra herinaratra amin’ny fatiantoka ny orinasa satria 22 cents/KWh, izany hoe, 1000Ar ny vidin’ny famokarana, raha amidy 12 cents na 550Ar/Kmh izany.

Tafakatra 17 000 taonina ny cacao tsara kalitao naondran’i Madagasikara ny taona 2023, raha 6 000 t izany ny taona 2015. Nitombo avo telo heny ny vokatra tao anatin’ny 10 taona noho ny tetikasa « Pôles intégrés de croissance (PIC) ». Nanampy tamin’ny famokarana ny tetikasa ka nampiorina toerana misy aloka mirefy 4 000m2 any Ambanja, antony nahavokarana fototra cacao mihoatra ny 10 000 isa isan-taona.

Miisa 172 ny orinasa afakaba misehatra amin’ny lamba sy ny fanodinana sakafo miasa ara-dalàna manerana ny Nosy. Manan-danja eo amin’ny lafiny ara-toekarena ny fisian’ny faritra sy orinasa afakaba (ZEF). Natao mangarahara tamin’ny sehatra tsy miankina ny dingana arahina hisitrahana ireo karazana fahazoan-dalana omen’ny fanjakana. Firenena mandray ny vokatra sy ny entana vokarintsika i Etazonia sy Eoropa.

Nisitraka mari-pankasitrahana, ny zoma teo, ireo « épidémiologistes de terrain » vaovao miisa 30. Hifantoka amin’ny fitiliana ireo aretina izay mety hahazo ny olona sy ireo biby fiompy ireto mpisehatra ireto. Nakatona tamin’ny fomba ofisialy, nandritra io fotoana io ihany koa, ny atrikasa fanofanana momba ny fikojakojana ny fitaovana natao ho an’ny laboratoara any amin’ireo firenena mpikambana ao amin’ny Vaomieran’ny ranomasimbe Indianina. Nisy ny fampitaovana an’ireo tomponandraikitra ara-pahasalamana eto Madagas­i­kara ary miisa 12 ireo mpiofana nisitraka izany.

Ankoatra izay, nahazo fampitaovana mitentina hatrany amin’ny 5,5 miliara Ar avy amin’ny AFD sy ny Vondrona eoropeanina ireo mpiahy ny fahasalaman’ny biby. Marihina fa mitotaly 119 ankehitriny ireo « épidémiologistes de terrain » eto Madagasikara. Miara-miasa amin’ny minisiteran’ny Fambelena sy ny fiompiana izy ireo, amin’ny alalan’ireo teknisianina sy veterinera miahy ny fahasalaman’ny biby.

Henintsoa H.

Hisokatra tsy ho ela amin’ny firenena rwandais ny lanitr’i Madagasikara, ho fampiroboroboana ny sehatry ny fizahantany sy ny fitaterana ana habakabaka ary ny fampandrosoana ny toekarena.

Atao sonia tsy ho ela ny fifanarahana eo amin’i Madagasikara sy ny kaompaniam-pitaterana ana habakabaka Rwandair. Voa­resaka izany nandritra ny fihaonana teo amin’ny minisitry ny Fitaterana sy ny famantarana ny toetr’andro, Ra­monjavelo Valery, sy ny masoivohon’i Rwanda, Em­manuel Hategeka, ny herinandro teo. Vonona hanamafy ny fifandraisana ara-toekarena sy ny sehatry ny fizahantany eo amin’ny firenena roa tonta ireo tomponandraikitra. Ham­pivelatra ny firenena malagasy amin’ny fifandraisana amin’ny firenena hafa ny fiaraha-miasan’i Madagasikara sy ny Rwandair. Tafiditra ao anatin’izany ireo fifanakalozana ara-barotra, ny sehatry ny fandraharahana ary ny fampiroboroboana ny fizahantany. Ankoatra izay, nidinika tamin’ny minisitry ny Fizahantany sy ny asa tanana, Viviane Dewa, ihany koa ity diplaomaty ity. Nifantoka tamin’ny fampiofanana sy fifampizarana traikefa eo amin’ireo mpisehatra amin’ny fizahantany ny fihaonana. Eo koa ny fiaraha-miasan’ny minisitera roa tonta ary ny fanomanana ny “Eductour” hisarihana ireo mpizahatany Rwandais ho avy eto amintsika. Notsindrina manokana ny hanamorana ny fahazoana « visa » hampiroboroboana ny sehatry ny fizahantany eo amin’ny firenena roa tonta.

Toekarena

Vina ho an’ny fampandrosoana ny ara-toekaren’i Ma­dagasikara ny fiaraha-miasa amin’ny firenena Rwanda. Hojerena manokana ny fampiasam-bola sy ny fifanakalozana ara-barotry ny roa tonta. Ankoatra izay, mikasa ny hikarakara iraka ara-toekarena (mission économique) eo amin’i Rwanda sy Madaga­sikara ity masoivoho vao voatendry hiasa eto amintsika ity sy ny Economic Development Board of Madagascar (EDBM) ho an’ny fampiroboroboana ny toekarem-pirenena.

Henintsoa Hani

Tontosa ny sabotsy teo ny fanolorana faneva ho an’ireo holafy efatra sy sakelika iray eo anivon’ny Vondron-kery manokana vonjy taitra na ny Groupement des forces spéciales d’intervention (GFSI), izay feno herintaona no nisiany, eo anivon’ny fiadidiana ny Repoblika. Nanome voninahitra ny lanonana ny filohan’ny Repoblika sady lehibe fara tampon’ny Foloalindahy, Ra­joe­lina Andry, notronin’ny filohan’ny Antenimieram­pire­nena, i Tokely Justin, ny minisitry ny Foloalindahy, ny Jly Sahivelo Lala Monja Delphin, ary ireo mpiara-miasa aminy. Notolorana ny brevet de mérite ny filoha Rajoelina Andry sy ireo tomponandraikitra ambony eo anivon’ny Hery fiarovana sy filaminana. Novola­volaina tao anatin’ny fanitsian-drafitry ny Tafika Malagasy ny GFSI satria ilaina amin’ireo ambana misy ankehitriny ity vondron-tafika ity. Amin’ny maha miaramila mpanao vy very ny ainy azy ireo, vonona mandrakariva amin’ny iraka rehetra, araka ny nambaran’ny minisitry ny Foloalindahy (MFA), ka mijoro hatrany tsy hiraviravy tanana hitondra fandriampahalemana maharitra eto Madagasikara. Efa maro ireo asa nandraisan’ny GFSI anjara nandritra izay herintaona nisiany izay. « Nanampy tamin’ny fahazoana vokatra tsara nampihenana ny tahan’ny tsy fandriampahalemana izy ireo », hoy ny MFA. No­tsongaina avy amin’ny Tafika telo: an-tanety, an-dranomasina ary ana habakabaka ny miaramilan’ny GFSI. Manana ny fahaiza-manao rehetra amin’ny famitana iraka, toy ny ady amin’ny fakana an-keriny sy fandravana tambajotran-jiolahy mpanao asa ratsy. Notolorana ny « Brevet forces spéciales Apinga » ireo miaramila rehetra nahavita fiofanana.

Jean Claude

Hitohy rahampiso, etsy amin’ny Kianja Makis Ando­hatapenaka, ny andro fahavalo amin’ny fiadiana ny ho tompondakam-pirenena “Top 12 Mada”, taranja rugby. Anisan’ ny fihaonana goavana ary hiendrika famaranana kely ny an’ny USA Ankadifotsy (Anka­dy) sy ny UAS Cheminots (Be­setroka).
Very mantsy izay resy eo amin’ny roa tonta. Midina any amin’ny D2 amin’ny taom-pilalaovana manaraka. Hango­traka, araka izany, ny lalaon’izy ireo. Fileovana samy manana ny fahaiza-manaony ny andaniny sy ny ankilany. Besetroka matanjaka ao anaty “avant” raha mailaka sy faingana kosa Ankady amin’ny filalaovana amin’ny “trois quart”. Ho lavo, araka izany, izay ratsy fanomanana sy diso paikady eo.
Ankoatra izay, hanohitra ny Cosfa (Bebaoty) indray ny TFA Anatihazo (Pilo kely). Hanala vela rahateo ry zareo Anatihazo amin’ity. Tsara ho fantatra fa misy mpilalaon’ Anatihazo, mandrafitra ny Cosfa, amin’izao fotoana izao, toa an’i Mbola sy i Ginot. Mialoha io no hifanandrina ny Mang’Arts sy ny STM (Sa­vony).
Hatao mialoha io ny ampahavalon-dalana amin’ny “Top 20”, hifandonan’ny Rosa sy ny US Ikopa. Etsy amin’ny kianja Malacam kosa no hifampitana ny CRAI sy ny AFA ary FTAT sy ny FTAM ary ny an’ny JSTA sy FBM. Ho fantatra eo izany ireo ekipa tafita amin’ny ampahefa-dalana amin’ity “Top 20”, ity.

Tompondaka

Hanomboka anio ary hitohy rahampitso, eny amin’ny Kianja CFFA Andoharanofotsy, ny andro voalohany amin’ny fiadiana ny amboara « Grand Tournoi d’Antananarivo (GTA) », taranja baolina kitra. Lalao 8 no voalahatra amin’izany ka 4 hatao anio ary rahampitso ny 4 ambiny.

Hotanterahina rahampitso, eny amin’ny Kianja mitafon’Ankorondrano, ny fifaninanam-pirenena, taranja handball, sokajy Sénior, lahy sy vavy. Hanana ny lanjany lehibe izany satria hisolo tena an’i Madagasikara amin’ny fiadiana ny ho tompondakan’ny ranomasimbe Indianina (CCCOI) izay ho tompondaka eo.

Hatao anio, ao amin’ny torapasika Hurghada, ao Egypte, ny fiadiana ny ho tompondakan’i Afrika, taranja beach-soccer. Hiady lohany amin’izany ireo firenena 8, ahitana an’i Egypte mpampiantrano, Maroc, Tanzanie, Ghana ao amin’ny vondrona “A” ary Senegal, Mozambique, Malawi, Mauritanie, sokajy “B”.

Nosongonan’ny Coelacanthes Comores ny filaharan’ny Barea ao amin’ny Federasiona iraisam-pirenena (Fifa) sy ny Kaonfederasiona afrikanina (Caf ). Faha-108 i Comores, raha faha-109 ny Barea eo amin’ny filaharana maneran-tany. Faha-24 ry zareo kaomorianina eto Afrika raha faha-25 ny Malagasy.

Ny alarobia teo no tafaverina an-tanindrazana ny Barea de Madagascar, taorian’ny fiatrehany ny andro fahatelo sy fahefatra amin’ny fifanintsanana hiadian-toerana ho an’ny “Can 2025”, natao tany Maroc, ny zoma 11 sy ny alatsinainy 14 oktobra lasa teo, ao amin’ny vondrona “A”. Hatreto, tsy mbola misy nahazo ny tapakila hiatrehina izany ity sokajy misy ny Malagasy ity. Samy mbola manana herijika hiatrehana izany avokoa ny ekipa efatra dia i Tunisie, mitarika amin’ny isa 7, arahin’i Comores isa 6 ary Gambie isa 5 sy Barea isa 2. Hiankina amin’ny andro roa farany ny hahalalana izay ho tafita. Mila mandresy amin’ireo lalao roa farany hikatrohana amin’i Tunisie sy i Comores ny Barea. Mety hatao atsy Afrika Atsimo ny lalao hifanandrinana amin’i Comores.
Tsara ny mampahatsiahy fa tsy afaka milalao mandritra ny andro fahadimy, hikatrohan’ny Barea sy Tunisie, i Sonny Laiton, Malagasy mpiandry tsatoby, noho ny karatra mavo roa azony. Ankoatra izay, miisa valo ireo firenena efa tafita any amin’ny “Can”, anisan’izany i Maroc, mpampiantrano, Algerie, Cameroun, Sénégal, RD Congo, Angola, Burkina Faso ary Egypte.

Tompondaka

Nahazo fandresena faharoa, nandritra ny fifaninanana “Road to ball”, taranja basikety, ny Gendarmerie nationale basket-ball club (GNBC), omaly, tany Tanzanie. Resin’ny GNBC, 98 no ho 72 , ny BVH avy atsy Seychelles.

Mitohy vakana ny fa­hombiazana ho an’ny ekipan’ny zandary GNBC, omaly, tamin’ny fifanintsanana taranja basikety, “Road To Bal”, sokajy lehilahy, izay tontosaina any Tanzanie. Lavon’izy ireo, tamin’ny isa 98 no ho 72, indray ny ekipa avy atsy Seychelles, Beau Vallon Heat (BVH), omaly, tao amin’ny Kianja mitafon’i Dar-Es-Salam.
Raha fintinina ny fifanandrinan’ny roa tonta, nanindry tanteraka tamin’ny teknika sy ny tanjaka ny Malagasy mpilalao. Teo amin’ny folo minitra voalohany ihany, «1ère Quart-temps (QT)» no nitarika 21 no ho 14, ry zareo seyseloa. Nie­zaka nanenjika ny isa ny GNBC nandritra ny QT faharoa, ka lasa nitsimbadika ny isa teny amin’ny solaitrabe, nitarika 34 no ho 33 indray ny zandary mpilalao. Io isa io ihany koa no nentin’ny roa tonta niala sasatra.
Nanomboka nampiseho ny heriny amin’izay ry Elly sy ny namany, ka lasa 67 no ho 56 ny isa, tamin’ny QT fahatelo. Tsy nijanona teo anefa ny isa fa mbola niampy izany nandritra ny folo minitra nilalaovana farany, ka niafara tamin’ny 98 no ho 72 ny fifanandrinan’ny roa tonta.
Tsara ny mampahatsiahy fa ity no fandresena faharoa, azon’ny GNBC. Niondrika teo anatrehan’izy ireo, 89 no ho 72, ny klioba mpampiantrano ny fifaninanana JKT Stars, ny alakamisy lasa teo, tao amin’io kianja io ihany.
Hifandona amin’ny Nairobi Thunder
Taorian’izay lalao roa izay, hiatrika ny fihaonana fahatelo amin-dry zareo kenianina, Nairobi Thunder (Nat), indray ny solontenan’i Mada­ga­si­kara, anio, any an-toerana ihany. Araka ny fikarohana natao, nomontsanin’ny Nat, tamin’ny isa mavesatra 89 no ho 58, ny BVH Seychelles, nandritra ny andro voalohan’ ity fifanintsanana ity. Tsiahi­vina fa izay roa voalohany amin’ity “Road To Bal” ity no miakatra Elite 16.

Fitia Randria

Miisa 35 ny fandavahan-drano lalina hatao eto Antananarivo sy ny manodidina. Misy ny vaovao ary eo koa ny hasiana fanatsarana. Mahatratra 1000 m3 isan’ andro ihany koa ny rano taterin’ny fiarabe hamenoana ny sinibe miisa 150 napetraka eny amin’ny fokontany. Efa nidina ho 50 ny salanisan’ny daba mavo milahatra eny amin’ny paompy tsirairay amin’ny ankapobeny.

Miaina anaty tsy fanjarian-tsakafo ny 70% ny tokantrano malagasy mandritra ny taona. Mandray anjara feno amin’ny tanjona iombonana, hanatrarana ny fahavitan-tena ara-tsakafo ny Tahirim-bola ho fampiroboroboana ny famokarana (FDA), amin’ny alalan’ny tohana ara-bola ny tetikasan’ny mpamokatra. Maha­tratra 3 tapitrisa Ar ny tohana omeny ny tantsaha raha famatsiam-bola hatrany amin’ny 60 tapitrisa Ar ho an’ny vondron’ny tantsaha.

Hitombo 4,5% ny toekarena eto Madaga­si-kara, amin’ity taona ity, amin’ny alalan’ny tohana azo avy amin’ny fambolena, ny fitrandrahana ny harena
an-kibon’ny tany, ny indostria ary ny fifandraisan-davitra, raha ny vinavina nataon’ny Banky iraisam-pirenena. Nambarany fa hiakatra 3% ny toekarena ho an’i Afrika atsimon’i Sahara, raha heverina fa hiakatra 4,8% ny tahan’ny fidangan’ny vidim-piainana.

La création, l’art de l’inspiration avec le coco

Natao sonia, omaly, ny fanavaozana ny fiaraha-miasa eo amin’ny vovonana fiarahamonim-pirenena Alliance Voa­hary Gasy (AVG) sy ny Birao mahaleo tena miady amin’ny kolikoly (Bianco). Fanintelony ity fiaraha-miasa hiadiana amin’ny kolikoly amin’ny sehatry ny harena voajanahary ity, efa natomboka ny taona 2018. Nilaza ny filohan’ny filankevi-pitantanan’ny AVG, Razaka­ma­narina Ndranto, fa zava-dehibe ny fiarahana miady amin’ny kolikoly, satria mifameno ny fiarahamonimpirenena (OSC) sy ny fanjakana. Efa ataon’ny fanjakana laharam-pahamehana rahateo ny fiarovana ny harena voajanahary. Nohamafisiny fa tokony hojeren’ny fanjakana foibe manokana ny hampiakarana ny tetibolan’ny minisitera misehatra amin’ny tontolo iainana. Satria maro ny andraikitra tokony hataony, nefa tsy ampy ny hoenti-manana, ka izany no mahatonga ny fiarahamonimpirenena manohana, toy izao fiaraha-miasa amin’ny Bianco izao.

Fahavalo ny kolikoly

Etsy ankilany, nilaza ny tale jeneralin’ny Bianco, Razakamanantsoa Gaby Nestor, fa «tokana ny fahavalo. Tsy olombelona ny fahavalo fa ny kolikoly no fahavalo». Efa eo am-pamolavolana ny Paikadim-pirenena ho an’ny 5 taona manaraka.
Anisan’ny laharam-pahamehana ao ny mahakasika ny harena voajanahary.

Njaka A.

Miisa 11 500 ny efitrano fandraisam-bahiny vaovao haorina, entina hampiantranoana ny vahiny sy ny mpizahatany ho avy eto Madagasikara. Tsy voatery ho mpizahatany mahazatra ny hanjifa azy ireny fa eo koa ny mpandraharaha hampiasa vola aty amintsika. Anisan’ny paikady hanatrarana mpizahatany sy vahiny miisa 1 000 000 mitsidika an’i Madagasikara amin’ny taona 2028 izany.

Hamokatra rano hatrany amin’ny 60 000m3 isan’andro ny toeram-pamokarana mirefy 4ha apetraka eny Amoronankona. Tafiditra ao anatin’ny tetikasa Tana Water III, vatsian’ny Banky iraisam-pirenena izy ity. Hamaha ny olan’ny famatsian-drano amin’ny vanim-potoana maintany ny fotodrafitrasa. Hisy koa ny toeram-pamokarana rano hatsangana eny Ambohi­tri­manjaka, hamokara 40 000m3 sy ny ao Mandroseza 10 000m3.

Apetraka ny drafitrasa nasionaly momba ny fampiroboroboana ny jono madinika an-dranomasina sy an-tanety eto Madagasikara. Jerena manokana ny fomba hitantanana sy ny fampiasana izany ary ny fampitaovana ny mpanjono. Hapetraka ireo fotodrafitrasa hahafahana hampihena ireo vokatra very. Miara-miombon’antoka manatanteraka ity drafitrasa nasionaly ity ny FAO sy ny Task Force izay nandrafitra ny PAN-PP.

Manakaiky sy manome fahafaham-po ny mpanjifa hatrany ny Orange Madagascar. Nampahafantarina omaly, tetsy Soarano, ny Orange Shop eo anivon’ny tranokalan’ny www.orange.mg. Tolotra hahafahan’ireo mpanjifa mividy finday sy kojakoja isan-karazany ary tolotra samihafa ana habaka eo anivon’ny orinasa Orange Madagascar manerana ny Nosy. « Tsy voatery hanatona botika Orange intsony ireo mpanjifa fa manao fangatahana ao amin’ny tranokala dia azony ny entana tiany ho vidiana. Atao izany mba hiarovana ny mpanjifa sy hisorohana amin’ny fisolokiana amin’ny endriny samihafa », hoy ny tomponandraikitry ny Orange Madagascar, Ratsimbazafy Harimbola.
Mampiavaka ny Orange Shop ny fananany ireo tolotra mampiavaka azy sy ny fanavaozana entiny hahafahana mividy entana amin’ny alalan’ny fampiasana ny niomerika “e-commerce”. Mahazo tombony kokoa ireo mampiasa ny tolotra. Maimaimpoana ny fanaterana ny entana ary tsy atahorana ny kalitaon’izany. “Afaka misafidy ny toerana hanaterana ny entana ny mpanjifa, azony alaina eny anivon’ny botika Orange ihany koa izany aorian’ny kaomandy ataony”, hoy kosa ny tale jeneralin’ny Orange Madagascar, i Frédéric Debord. Nomarihiny manokana fa hiparitaka manerana ny faritra ny fanaterana ireo entana raha hanombohan’azy ny eto Antananarivo.

Henintsoa H.

Hanatsara ny sehatry ny fandraharahana eto Madagasikara ny dinika ho an’ny fifanakalozan-kevitry ny rafi-panjakana sy ny sehatra tsy miankina. Voaresaka ny tomban’ezaka sy ny fanamby.

Fifanakalozana. Natao teny Ambodivona, om­a­ly, ny dinika fahafito ho an’ny fifanakalozan-kevitry ny rafi-panjakana sy ny sehatra tsy miankina (7ème table ronde économique) momba ny fandraharahana eto Mada­gasikara. Nifantoka betsaka tamin’ny tomban’ezaka sy ny fanatsarana atao ary ireo fanamby apetraka ny diniky ny roa tonta. “Voafaritra nandritra ny dinika ireo laharam-pahamehana hanatsarana ny tontolon’ny fandraharahana sy ny fomba hisarihana ireo mpampiasa vola eto amintsika”, hoy ny tale jeneralin’ny Economic Development Board of Mada­gascar (EDBM), Rafidy Josielle. Nahafahana namaritra ireo lohahevi-dehibe ho an’ny sehatra tsy miankina ny fifanakalozana. Voaresaka ihany koa ny mahakasika ny tetikasa fitaratra hanitarana ny seranan-tsambon’i Toama­si­na. Ankoatra izay, napetraka ny komity mpanara-maso sy mpandrindra ny fitantanana ary hijery ireo vahaolana hanatsarana sy hanafainganana ny famoahana entana eny anivon’ny fadintseranana. Nahomby tanteraka ny fomba fiasa. Satria, mihena enina andro ankehitriny ny famoahana ireo entana raha toa ka nahatratra 11 andro izany teo aloha.

Famatsiam-bola

Hifarimbonan’ny rafi-panjakana sy ny sehatra tsy miankina ny fampiroboroboana ny famatsiam-bola eto Madagasi­kara. «Hahafahana miara-mijery ireo dingana iaraha-manao sy hanatsarana ny fampiasam-bola eto amintsika ny fifanakalozan-kevitra toy izao», hoy ny sekretera jeneralin’ny minisiteran’ny Fampi­ro­boroboana ny indostra sy ny varotra, Ranoelimanana Vahinisoa. Voaresaka manokana ny hanamafisana ny rafitra teknika misy ny Clim Invest iarahana amin’ny vondrona eoropeanina sy ny sehatra tsy miankina. «Nivoitra nandritra izany koa ny hevitra iraisan’ny rafi-panjakana sy ny avy amin’ny sehatra tsy miankina mahakasika lohahevitra iray», hoy ny tale jeneralin’ny EDBM. Aorian’izay vao miroso amin’ ny dinika ny roa tonta, araka ny fanazavany.

Henintsoa Hani

Lavo nandritra ny fifandonana tamin’ny zandary ny dahalo raindahiny, tao amin’ny fokontany Ambohimiarina Tsaramandroso, distrikan’Ambatoboeny, omaly. Avy nanao fanafihana tokantrano, tao amin’ity fokontany ity, no nifanehatra tamin’ny zandary. Tao anatin’ny sakana nataon’ny
zandary no nahalavo azy. Malaso efatra hafa kosa tafapori­tsaka na efa naratra voatifitra aza. Voalaza fa miaraka amin’ny fitaovam-piadiana mahery vaika ry zalahy. Maro ny fanafihana vitan’ireto andian-dahalo ireto tao anatin’ny distri­kan’Ambatoboeny. Mitohy ny fanarahan-dia ataon’ny zandary amin’ny fikarohana ireo tafaporitsaka.

J.C

La création, l’art de l’inspiration avec le coco