Nahazo fandresena faharoa, nandritra ny fifaninanana “Road to ball”, taranja basikety, ny Gendarmerie nationale basket-ball club (GNBC), omaly, tany Tanzanie. Resin’ny GNBC, 98 no ho 72 , ny BVH avy atsy Seychelles.

Mitohy vakana ny fa­hombiazana ho an’ny ekipan’ny zandary GNBC, omaly, tamin’ny fifanintsanana taranja basikety, “Road To Bal”, sokajy lehilahy, izay tontosaina any Tanzanie. Lavon’izy ireo, tamin’ny isa 98 no ho 72, indray ny ekipa avy atsy Seychelles, Beau Vallon Heat (BVH), omaly, tao amin’ny Kianja mitafon’i Dar-Es-Salam.
Raha fintinina ny fifanandrinan’ny roa tonta, nanindry tanteraka tamin’ny teknika sy ny tanjaka ny Malagasy mpilalao. Teo amin’ny folo minitra voalohany ihany, «1ère Quart-temps (QT)» no nitarika 21 no ho 14, ry zareo seyseloa. Nie­zaka nanenjika ny isa ny GNBC nandritra ny QT faharoa, ka lasa nitsimbadika ny isa teny amin’ny solaitrabe, nitarika 34 no ho 33 indray ny zandary mpilalao. Io isa io ihany koa no nentin’ny roa tonta niala sasatra.
Nanomboka nampiseho ny heriny amin’izay ry Elly sy ny namany, ka lasa 67 no ho 56 ny isa, tamin’ny QT fahatelo. Tsy nijanona teo anefa ny isa fa mbola niampy izany nandritra ny folo minitra nilalaovana farany, ka niafara tamin’ny 98 no ho 72 ny fifanandrinan’ny roa tonta.
Tsara ny mampahatsiahy fa ity no fandresena faharoa, azon’ny GNBC. Niondrika teo anatrehan’izy ireo, 89 no ho 72, ny klioba mpampiantrano ny fifaninanana JKT Stars, ny alakamisy lasa teo, tao amin’io kianja io ihany.
Hifandona amin’ny Nairobi Thunder
Taorian’izay lalao roa izay, hiatrika ny fihaonana fahatelo amin-dry zareo kenianina, Nairobi Thunder (Nat), indray ny solontenan’i Mada­ga­si­kara, anio, any an-toerana ihany. Araka ny fikarohana natao, nomontsanin’ny Nat, tamin’ny isa mavesatra 89 no ho 58, ny BVH Seychelles, nandritra ny andro voalohan’ ity fifanintsanana ity. Tsiahi­vina fa izay roa voalohany amin’ity “Road To Bal” ity no miakatra Elite 16.

Fitia Randria

Miisa 35 ny fandavahan-drano lalina hatao eto Antananarivo sy ny manodidina. Misy ny vaovao ary eo koa ny hasiana fanatsarana. Mahatratra 1000 m3 isan’ andro ihany koa ny rano taterin’ny fiarabe hamenoana ny sinibe miisa 150 napetraka eny amin’ny fokontany. Efa nidina ho 50 ny salanisan’ny daba mavo milahatra eny amin’ny paompy tsirairay amin’ny ankapobeny.

Miaina anaty tsy fanjarian-tsakafo ny 70% ny tokantrano malagasy mandritra ny taona. Mandray anjara feno amin’ny tanjona iombonana, hanatrarana ny fahavitan-tena ara-tsakafo ny Tahirim-bola ho fampiroboroboana ny famokarana (FDA), amin’ny alalan’ny tohana ara-bola ny tetikasan’ny mpamokatra. Maha­tratra 3 tapitrisa Ar ny tohana omeny ny tantsaha raha famatsiam-bola hatrany amin’ny 60 tapitrisa Ar ho an’ny vondron’ny tantsaha.

Hitombo 4,5% ny toekarena eto Madaga­si-kara, amin’ity taona ity, amin’ny alalan’ny tohana azo avy amin’ny fambolena, ny fitrandrahana ny harena
an-kibon’ny tany, ny indostria ary ny fifandraisan-davitra, raha ny vinavina nataon’ny Banky iraisam-pirenena. Nambarany fa hiakatra 3% ny toekarena ho an’i Afrika atsimon’i Sahara, raha heverina fa hiakatra 4,8% ny tahan’ny fidangan’ny vidim-piainana.

La création, l’art de l’inspiration avec le coco

Natao sonia, omaly, ny fanavaozana ny fiaraha-miasa eo amin’ny vovonana fiarahamonim-pirenena Alliance Voa­hary Gasy (AVG) sy ny Birao mahaleo tena miady amin’ny kolikoly (Bianco). Fanintelony ity fiaraha-miasa hiadiana amin’ny kolikoly amin’ny sehatry ny harena voajanahary ity, efa natomboka ny taona 2018. Nilaza ny filohan’ny filankevi-pitantanan’ny AVG, Razaka­ma­narina Ndranto, fa zava-dehibe ny fiarahana miady amin’ny kolikoly, satria mifameno ny fiarahamonimpirenena (OSC) sy ny fanjakana. Efa ataon’ny fanjakana laharam-pahamehana rahateo ny fiarovana ny harena voajanahary. Nohamafisiny fa tokony hojeren’ny fanjakana foibe manokana ny hampiakarana ny tetibolan’ny minisitera misehatra amin’ny tontolo iainana. Satria maro ny andraikitra tokony hataony, nefa tsy ampy ny hoenti-manana, ka izany no mahatonga ny fiarahamonimpirenena manohana, toy izao fiaraha-miasa amin’ny Bianco izao.

Fahavalo ny kolikoly

Etsy ankilany, nilaza ny tale jeneralin’ny Bianco, Razakamanantsoa Gaby Nestor, fa «tokana ny fahavalo. Tsy olombelona ny fahavalo fa ny kolikoly no fahavalo». Efa eo am-pamolavolana ny Paikadim-pirenena ho an’ny 5 taona manaraka.
Anisan’ny laharam-pahamehana ao ny mahakasika ny harena voajanahary.

Njaka A.

Miisa 11 500 ny efitrano fandraisam-bahiny vaovao haorina, entina hampiantranoana ny vahiny sy ny mpizahatany ho avy eto Madagasikara. Tsy voatery ho mpizahatany mahazatra ny hanjifa azy ireny fa eo koa ny mpandraharaha hampiasa vola aty amintsika. Anisan’ny paikady hanatrarana mpizahatany sy vahiny miisa 1 000 000 mitsidika an’i Madagasikara amin’ny taona 2028 izany.

Hamokatra rano hatrany amin’ny 60 000m3 isan’andro ny toeram-pamokarana mirefy 4ha apetraka eny Amoronankona. Tafiditra ao anatin’ny tetikasa Tana Water III, vatsian’ny Banky iraisam-pirenena izy ity. Hamaha ny olan’ny famatsian-drano amin’ny vanim-potoana maintany ny fotodrafitrasa. Hisy koa ny toeram-pamokarana rano hatsangana eny Ambohi­tri­manjaka, hamokara 40 000m3 sy ny ao Mandroseza 10 000m3.

Apetraka ny drafitrasa nasionaly momba ny fampiroboroboana ny jono madinika an-dranomasina sy an-tanety eto Madagasikara. Jerena manokana ny fomba hitantanana sy ny fampiasana izany ary ny fampitaovana ny mpanjono. Hapetraka ireo fotodrafitrasa hahafahana hampihena ireo vokatra very. Miara-miombon’antoka manatanteraka ity drafitrasa nasionaly ity ny FAO sy ny Task Force izay nandrafitra ny PAN-PP.

Manakaiky sy manome fahafaham-po ny mpanjifa hatrany ny Orange Madagascar. Nampahafantarina omaly, tetsy Soarano, ny Orange Shop eo anivon’ny tranokalan’ny www.orange.mg. Tolotra hahafahan’ireo mpanjifa mividy finday sy kojakoja isan-karazany ary tolotra samihafa ana habaka eo anivon’ny orinasa Orange Madagascar manerana ny Nosy. « Tsy voatery hanatona botika Orange intsony ireo mpanjifa fa manao fangatahana ao amin’ny tranokala dia azony ny entana tiany ho vidiana. Atao izany mba hiarovana ny mpanjifa sy hisorohana amin’ny fisolokiana amin’ny endriny samihafa », hoy ny tomponandraikitry ny Orange Madagascar, Ratsimbazafy Harimbola.
Mampiavaka ny Orange Shop ny fananany ireo tolotra mampiavaka azy sy ny fanavaozana entiny hahafahana mividy entana amin’ny alalan’ny fampiasana ny niomerika “e-commerce”. Mahazo tombony kokoa ireo mampiasa ny tolotra. Maimaimpoana ny fanaterana ny entana ary tsy atahorana ny kalitaon’izany. “Afaka misafidy ny toerana hanaterana ny entana ny mpanjifa, azony alaina eny anivon’ny botika Orange ihany koa izany aorian’ny kaomandy ataony”, hoy kosa ny tale jeneralin’ny Orange Madagascar, i Frédéric Debord. Nomarihiny manokana fa hiparitaka manerana ny faritra ny fanaterana ireo entana raha hanombohan’azy ny eto Antananarivo.

Henintsoa H.

Hanatsara ny sehatry ny fandraharahana eto Madagasikara ny dinika ho an’ny fifanakalozan-kevitry ny rafi-panjakana sy ny sehatra tsy miankina. Voaresaka ny tomban’ezaka sy ny fanamby.

Fifanakalozana. Natao teny Ambodivona, om­a­ly, ny dinika fahafito ho an’ny fifanakalozan-kevitry ny rafi-panjakana sy ny sehatra tsy miankina (7ème table ronde économique) momba ny fandraharahana eto Mada­gasikara. Nifantoka betsaka tamin’ny tomban’ezaka sy ny fanatsarana atao ary ireo fanamby apetraka ny diniky ny roa tonta. “Voafaritra nandritra ny dinika ireo laharam-pahamehana hanatsarana ny tontolon’ny fandraharahana sy ny fomba hisarihana ireo mpampiasa vola eto amintsika”, hoy ny tale jeneralin’ny Economic Development Board of Mada­gascar (EDBM), Rafidy Josielle. Nahafahana namaritra ireo lohahevi-dehibe ho an’ny sehatra tsy miankina ny fifanakalozana. Voaresaka ihany koa ny mahakasika ny tetikasa fitaratra hanitarana ny seranan-tsambon’i Toama­si­na. Ankoatra izay, napetraka ny komity mpanara-maso sy mpandrindra ny fitantanana ary hijery ireo vahaolana hanatsarana sy hanafainganana ny famoahana entana eny anivon’ny fadintseranana. Nahomby tanteraka ny fomba fiasa. Satria, mihena enina andro ankehitriny ny famoahana ireo entana raha toa ka nahatratra 11 andro izany teo aloha.

Famatsiam-bola

Hifarimbonan’ny rafi-panjakana sy ny sehatra tsy miankina ny fampiroboroboana ny famatsiam-bola eto Madagasi­kara. «Hahafahana miara-mijery ireo dingana iaraha-manao sy hanatsarana ny fampiasam-bola eto amintsika ny fifanakalozan-kevitra toy izao», hoy ny sekretera jeneralin’ny minisiteran’ny Fampi­ro­boroboana ny indostra sy ny varotra, Ranoelimanana Vahinisoa. Voaresaka manokana ny hanamafisana ny rafitra teknika misy ny Clim Invest iarahana amin’ny vondrona eoropeanina sy ny sehatra tsy miankina. «Nivoitra nandritra izany koa ny hevitra iraisan’ny rafi-panjakana sy ny avy amin’ny sehatra tsy miankina mahakasika lohahevitra iray», hoy ny tale jeneralin’ny EDBM. Aorian’izay vao miroso amin’ ny dinika ny roa tonta, araka ny fanazavany.

Henintsoa Hani

Lavo nandritra ny fifandonana tamin’ny zandary ny dahalo raindahiny, tao amin’ny fokontany Ambohimiarina Tsaramandroso, distrikan’Ambatoboeny, omaly. Avy nanao fanafihana tokantrano, tao amin’ity fokontany ity, no nifanehatra tamin’ny zandary. Tao anatin’ny sakana nataon’ny
zandary no nahalavo azy. Malaso efatra hafa kosa tafapori­tsaka na efa naratra voatifitra aza. Voalaza fa miaraka amin’ny fitaovam-piadiana mahery vaika ry zalahy. Maro ny fanafihana vitan’ireto andian-dahalo ireto tao anatin’ny distri­kan’Ambatoboeny. Mitohy ny fanarahan-dia ataon’ny zandary amin’ny fikarohana ireo tafaporitsaka.

J.C

La création, l’art de l’inspiration avec le coco

Notanterahina teny Ando­haranofotsy, omaly, ny antsapaka hahafantarana ireo klioba izay ho mpiray vondrona amin’ ny fifaninanana goavana eto Antananarivo (GTA). Lalao hanomboka ny sabotsy 19 oktobra hatramin’ny 3 no­vam­bra. Nambaran-dRa­kotoari­manana Henintsoa na i Maitre Tôta, filoha mpikarakara ny fifanintsanana, fa toy ny tamin’ ny taon-dasa ihany ny vola azon’ny mpandresy, izay mite­ntina 20 tapitrisa Ariary.

Klioba 16 no mandray anjara. Ahitana ekipa mifanin­tsana amin’ny Pureplay Foot­ball League (PFL) miisa sivy. Anisan’izany ny Disciples Fc, tompondakan’ny PFL sy ny GTA farany teo, ny CFFA Ando­haranofotsy, ny Cosfa, ny Usca­foot, ny Ajesaia, ny As Fana­lamanga, ny Elgeco Plus, tompon’ny amboaran’i Madaga­sikara Telma Coupe 2024 sy ny FC Avenir Ste Anne, laharana voalohany nandritra ny diviziona faharoa nasionaly, ary ny FC Rouge. Nomarihan’ ny mpikarakara fa nisy klioba iray niala an-daharana tamin’ ny ora farany. Mbola misy toerana iray ho an’izay maniry ny handray anjara. Hizara vondrona efatra ireto klioba 16 ireto, amin’ity andiany faharoa ity. Izay roa voalohany isam-bondrona no miakatra eo
amin’ny dingana manaraka. Raha ny fanazavana voaray, hatao eny amin’ny kianja CFFA etsy Iavoloha ny fifanintsa­nana isam-bondrona. Hatao eny amin’ny kianja Elgeco Plus, By Pass, ny ampahe­fa-dalana hatramin’ny famara­nana. Natao hanomanan’ireo klioba ny taom-pilalaovana vaovao ny GTA.

Raha tsy misy ny fiovana, hanomboka ny 10 novambra ho avy io ny fifanintsanana nasionaly PFL.

Fitia Randria

Ireo mpiray vondrona

A : Toulon, Ajesaia, As Fanalamanga, CFFA Espoir
B : CFFA, Disciples Fc, Cosfa, Uscafoot
C : Net Foot, Fc Avenir Ste Anne, Fc Valence, Analamanga U20
D : Disciples Fc 2, Fc Rouge, Elgeco plus, (mbola tsy fantatra)

Tsy afaka milalao i Sony Laiton, mpiandry tsatoby an’ny Barea de M/car, amin’ny andro fahadimy hikatrohana amin’i Tunisie sy ny andro fahenina hifan­donana amin’i Comores. Noho ny karatra mavo indroa azony nandritra ny fihaonana teo aloha ny anton’izany. Mety hisolo ny toerany izany, i Teva na i Nina.

Taorian’ny fahavitan’ny andro fahefatra amin’ ny fiadian-toerana ho an’ny Can 2025, firenena 8 no efa nahazo ny tapakilany hiatrehana izany. Maroc mpampiantrano, ny Liona-n’i Teranga Senegal, i Burkina Faso, Algerie, ny Liona tsy voafolaka Cameroun, ny Faraonan’i Egypte, Angola ary ny RD Congo.

Hotontosaina etsy amin’ny kianja Malacam Antanimena, ny alahady 20 oktobra izao ny dingana am­pahavalon-dalana amin’ny «Top 20», taranja rugby. Anisan’ny lalao goavana ny fifanandrinan’ny JST Ambon­drona sy ny FBM Bemasoandro. Eo koa ny an’ny CRAI Ambalavao sy ny AFA Ankazomanga ary ny FTAT Ano­sibe sy FTAM Mandrangombato.

Hisy ny lalao tenisy «circuit», ho an’ny sokajy zandriny U10 sy U12 lahy sy vavy. Fifaninanana karakarain’ny klioba ACSA ary ny fiaraha-miasa amin’ny Federasiona malagasin’ ny tenisy (FMT). Hatao ny 29 oktobra ka hatramin’ny 1 novambra izany.

Hotanterahina ny alahady 20 oktobra ho avy izao, eny amin’ny “circuit international” Imerintsiatosika ny dingana fahefatra amin’ny fiadiana ny ho tompondakam-pirenena amin’ny karting «4è Grand Prix de Mada 2024». Fifaninanana, karakarain’ny klioba Serana Racing Kart. Misokatra ho an’ireo mpifaninana rehetra manana ny kara-pilalaovana karting FSAM, voamarin’ny federasiona sy ireo mpanamory vahiny izany. Misy sokajy telo ny fifaninanana : ireo efa kalaza «Elite», mihoatra ny 14 taona. Ny «junior», 12 taona mihoatra ary ny «minime», 9 taona mihoatra.
Raha ny fizotry ny fifaninanana, hisy ny andrana fakana fe-potoana, tanterahin’ny mpanamory rehetra ao anatin’ny fe-potoana 10 mn. Io no mamaritra ny filaharan’ireo mpifaninana, amin’ny dingana voalohany. Mihodina im-7 amin’ny halavirana 1300 m ny “minime” raha im-10 ny “junior” sy ny “elite” eo amin’ ny dingana voalohany sy ny famaranana mialoha ary fihodi­nana in-11 sy in-13 kosa izay amin’ny famaranana lehibe.

Torcelin

Hiaro ny voninahi-pirenena amin’ny Road to ball, taranja basikety, manomboka anio ny Gendarmerie Nationale Basket-ball Club (GNBC). Hidona amin’i Tanzanie, mpampiantrano ny mpilalaon’ny zandary, eo amin’ny fanombo­han’ity fifaninanana afrikanina ity.

Hanomboka amin’ity alakamisy ity, ao amin’ny kianja mitafon’i Dar-Es-Salam ao Tanzanie ny Road to ball, taranja basikety. Dingana voalohany amin’ny Basket-ball African League, ho an’ny so­kajy lehilahy. Anisan’ireo mandray anjara ary misolo tena an’i Madagasikara amin’izany ny GNBC (Gendarmerie Natio­nale Basket-ball Club).
Raha ny fandaharam-potoana, hidona voalohany amin’ity ekipa tompondakan’i Madagasikara ity, anio ry zareo JKT Stars, mpampiantrano. Tsy ekipa vaovao amin’ ny zalahy zandary akory ity klioban’i Tanzanie ity fa nifanandrina taminy, ny taona 2019, nandritra ny fifanintsananam-paritra. Hanala vela amin’ny JKT Stars amin’ity ny GNBC.
Hitohy rahampitso ny fifanintsanana ka hifampitana amin’ny Beau Vallon Heat-n’i Seychelles, indray ny GNBC. Fifandonan’ny samy ranomasimbe Indianina izy ity. Heverin’ ny rehetra fa tsy hahatohitra ny zandary ry zareo seiseloà. Manana tombony eo amin’ny fahazarana lalao goavana mantsy ny ekipa malagasy.
Hifanandrina amin’ny Nai­robi Thunder, ekipan’i Kenya ny zandary ny sabotsy ho an’ ny andro fahatelo ary ny lalao farany ny alahady, hikatrohana amin’ny Urunani avy any Burundi.
Marihina fa tafita hiatrika ny “Elite 16” ny roa voalohany isaky ny sokajy, amin’ity Road to ball, ity.
Tsiahivina fa tsy vao izao akory ny GNBC no hiatrika ity fifaninanana ity fa efa nandray anjara tamin’izany ny taona 2020. Izy ireo indray izany no handimby ny COSPN izay nisolo tena an’i Madagasikara tamin’ny taon-dasa. Tafita teo amin’ny “Elite 16” ny ekipan’ny polisy saingy nifarana teo ny diany.

Tompondaka

4 mianadahy ireo Fulbright English Teaching Assistants (Etas) tonga eto Madagasikara. Manampy ireo tanora amerikanina vao nahavita ny fianarany tamin’ny ambaratonga ambony na koa ireo vao miditra amin’ny sehatry ny asa fampianarana ny Etas. Mandritra ny sivy volana no hanatontosany izany amin’ny sekoly sy oniversite samihafa maneran-tany. Miara-miasa amin’ireo mpampianatra sy mpianatra ny teny anglisy amin’ny sekoly miankina sy tsy miankina any amin’ny lycée… eto an-toerana izy ireo.
Maimaimpoana ny fanaovana Mammographie na ny fitiliana ny homamiadan’ny nono, mandritra ity volana oktobra ity, eny amin’ny CHU Andohatapenaka sy ny centre Kintana Ambatomena ho an’ny eto Antananarivo sy ny manodidina. Toraka izany koa ny ao amin’ny CHU Andrainjato ho an’ny any Fianarantsoa.
Tsy ny vehivavy ihany no mety ho lasibatry ny famarinana olombelona, araka ny fanamarihana nataon’ny biraom-pirenena miady amin’ny famarinana olona. Mety iharan’izany koa ny lehilahy amin’ny endriny samihafa. Maro ireo efa lasibatra vokatry ny tsy fifehezana ny fampiasana ny tambazotran-tserasera.
Mikarakara fisoratam-panambadiana faobe ny kaominina ambonivohitr’Ambohidratrimo, ny 22 novambra izao. Misokatra ho an’ireo olona maherin’ny 18 taona izany. Tanjona ny hampanara-dalàna ny tokantrano. Amin’ny 6 novambra izao no fara-fandraisana ny antontan-taratasy ho an’ireo maniry ny hiditra amin’ny tokantrano ara-dalàna.

Anisan’ny nivoitra tamin’ny fananganan-tsaina, teny amin’ny fonjaben’ Antanimora, ny alatsinainy 14 oktobra teo, ny toromarika sy hafatrafatry ny sekretera jeneralin’ny minisiteran’ny Fitsarana, Belalahy Hanitriniaina. Nambarany fa naharay fitarainana ny eo anivon’ny minisitera ka hodinihina ny fahamarinany. “Han­draisana fepetra izy ireny ka tsy hasiana famindram-po amin’ireo tratra manao izany. Efa maromaro ny tomponandraikitra nahantona tamin’ny asany tato ho ato”, hoy izy. Nanteriny fa manana zo tanteraka hitondra ny fitarainany eny anivon’ny fitsarana ny vahoaka ary antony nahatonga ilay andry napetraky ny filohan’ny Repoblika ho fanandratana ny maha olona sy ny andry fahatelo momba ny fitsarana tsara tantana izany. Nohitsiny fa mandray fepetra ny fitsarana mba hitondra fanadiovana. “Tsy ny vitsy anisa no handoto ny fitsarana iray manontolo”, hoy ihany izy.
Etsy andaniny, nitondrany fanazavana koa ny momba ny fifaninanana hidirana amin’ny fitsarana. Nambarany fa tokony handeha amim-pahamarinana ny fitsarana ny fanadinana sy ny laza adina. “Tsy tokony hiseho ny filazana fa olon’ny minisitra na ny sekretera jeneraly, na tomponandraikitra ambony ao amin’ny minisiteran’ny Fitsarana”, hoy ihany izy.

Synèse R.

Miverina indray ny solika mitapoka. Miisa 24 mianadahy ireo ahina ho nanapoka solika anjatony litatra. Maro ireo nametraka fitarainana tato anatin’ny volana vitsy fa simba ny fiara vokatry ny haratsian’ny solika. Fantatra aorian’ny fanamboarana ny fiara fa nandrotsahana solika mitapoka ny fiara na moto iray nisedra olana. Nametraka fitarainana ireo mpandraharaha niharan’ny fahasimban’ny fitaovana amina fiara vokatr’izany. Nanao be midina tao Toamasina ny zandary avy any an-dRenivohitra, nohamafisin’ ny zandary tao an-toerana. Raikitra avy hatrany ny fisavana trano tamin’ ireo efa nahazoana angom-baovao. Fantatra tamin’izany fa miisa 24 mianadahy ireo voasaringotra amin’ ity raharaha ity ka vehivavy ny efatra ary efa nahatratra anjatony litatra ny solika sy ny ranoka fampifangaroana amin’ izany, toy ny solitany, asidra, lasantsy. “Handamina an’ i Toamasina amin’ny zavatra tsy mety maro miseho eto no nanendren’ny fitondram-panjakana ahy ary tsy maintsy fongorina izany, teto no nahalalako izany Rôrô, Cocaïne, Héroïne izany, ny angom-baovao azoko nandritra izay fotoana fohy nahatongavako izay”, hoy ny kaomandim-paritanin’ny zandary, ny Jly Razafialison Cyr. Nohitsiny fa zary lasa vavahadin’ny zava-mahadomelina i Toamasina.

Synèse R.

Andro maneran-tany ho an’ny fanasan-tanana ny 15 oktobra. Nitsidika sady nanentana ny ankizy tezaina ao amin’ny foibe fitaizana ny zaza kamboty Felana Maitso eto Antananarivo, ny alatsinainy teo, ny vondron’ny teratany kameroney eto Madagasikara, nanamarihana izany. Nohazavaina tamin’ny ankizy ny maha zava-dehibe ny fanasana tanana sy ny fomba fanaovana azy.
Fikambanana sosialy sy tompon’andraikitra ny vondrona teratany kameroney eto amintsika, ka nanolotra fanomezana ho an’ny akany Felana Maitso, toy ny vary 100 kilao, menaka 32 litatra, voamaina 20 kilao, paty «spaghetti sy macaroni» 4 baoritra, akanjo 1 gony, bisiky, zava-pisotro mamy, savony, sns.
Nilaza ny filohan’ny fikambanana, Paul Roger Tseumeu, fa «hotohizana any amin’ny sekoly sy ny toerana fanabeazana ankizy ny hetsika toy izao. Tsotra nefa manan-danja amin’ny fisorohana ny aretina, mba hisian’ny fahasalamana ho an’ny daholobe». Nankasitraka ny fikambanana ny tomponandraikitry ny akany, Ramaromandray Lilia Olga, satria mampazoto ny ankizy tezaina ao ny firaisankina nasehony.

Njaka A.

Namoaka fanambarana ny eo anivon’ny Holafitry ny mpanao gazety (OJM), manoloana ny tranga niseho teny Tsimbazaza, omaly. Ahin’izy ireo ho tsy voahaja ny zo fototra eo amin’ny fahahalahan’ny asa fanaovan-gazety.

Nambaran’ny OJM fa ahina ny tsy fanajana ny zo fototra ho an’ny olom-pirenena amin’ny hahazoana vaovao. Nisehoana fanakanana ny ampahany tamin’ny mpanao gazety ny lanonam-panokafana ny fivoriana ara-potoana faharoan’ny Antenimierampirenena, teny Tsimbazaza, omaly. Nisy lisitry ny orinasan-gazety nomena ireo mpiambina teny am-bavahady ka ireo mpanao gazety voarakitra tanatin’ny lisitra ihany no nomena alalana hiiditra. Navela niditra ihany ireo mpanao gazety rehefa nifampiresaka saingy tsy navelan’ireo mpiambina namonjy ny toeram-pivoriana izy ireo. Voalaza ho ny fahateren’ny toerana no antony nanakanana azy ireo. Niravona ny olana taorian’ny fandraisana andraikitra marolafy.
Notsiahivin’ny OJM anefa ny And 77 amin’ny Lalàm­panorenana fa azon’ny daholobe atrehina ny fivoriana ao amin’ny Antenimiera, raha tsy hoe misy ny fangatahan’ny ampahefatr’ireo mpikambana hanao fivoriana mikaton-trano. “Lanonana azon’ny daholobe atrehina ny lanonam-panokafana ny fivoriana ara-potoana. Maro ireo mpanaraka ireo mpikambana ao amin’ny governemanta nahazo nanatrika ny fotoana. Teo ihany koa ireo mpaka sary, tsy mpanao gazety”, hoy ny fanambarana. Nahagaga ny OJM ny fanapahan-kevitra hoe singanina manokana ireo orinasan-gazety mahazo na tsia manatrika ny lanonana eny Tsimbazaza.

Zo fototra ny fahazoana vaovao
Nambaran’ny OJM koa fa voalazan’ny Lalàmpanorena­na ny fahazoan’ny olom-pirenena vaovao. “Zo fototra iza­ny. Antoka isitrahan’ny olom-pirenena izany zo fototra izany ny fahalalahan’ny asa fanaovan-gazety sy ny fahalalahan’ny mpanao gazety mi­trandraka vaovao marina sy marim-pototra”, hoy ihany ny OJM. Nambarany koa fa zon’ny mpanao gazety ny mitrandraka vaovao, tsy azo sakantsakanana, tsy misy fandrahonana, lavitry ny herisetra, ho amin’ny tranga momba ny tombontsoam-bahoaka. Ani­san’izany ireo dinika sy kabary ao amin’ny Antenimieram­pirenena sady iankinan’ny fiainam-pirenena tokoa, araka ny fanambarana hatrany.

Synèse R.

Efa ao anatin’ny fametrahana paikady hiatrehina ny fifidianana ben’ny Tanàna ny kandidà, Ravalomanana Tojo. Anisan’ny efa nametrahana izany sy nanombohana ny fanakaikezana ny vahoaka ny eny Ambohimanarina.
Nialoha izany, nitsodrano ny zanany, Ravalomanana Tojo, sady naraham-bavaka teny Faravohitra, ny sabotsy teo, ny filoha nasionalin’ny Tim, Ravalomanana. Namba-rany tamin’izany fa tsy main­tsy faranana ny fanapotehana ny eto Antananarivo Renivohitra. “Hatomboka ny fanavotana ireo vahoaka… Hatsangantsika ny efa rava fa ampy izay ny fanapotehana ity tanànantsika ity”, hoy izy. Notanisain’ny kandidà Rava­lomanana Tojo kosa ireo olana samihafa sedrain’An­tananarivo sy ny fahasahiran’ny mponina ao aminy. Ma­noloana izany ny nanentanany ny rehetra hiroso ho any amin’ny fanovana. Nanaovany antso avo ny hijoroan’ny rehetra mba hampanjakana ny mazava. Na izany aza, niantsoany ny fahavitrihan’ny olom-pirenena hifidy izany sy handraisana an-tanana ny ho avy ary hitsinjovana ny taranaka ihany koa.

Hiaraka hampandresy
Etsy andaniny, nanome toky ny hiara-kiasa hampan­dresy ny kandidà Ravaloma­nana Tojo sy ireo mpanolo­tsaina miaraka aminy, ireo depiote Tim voafidy tamin’ireo boriborintany eto an-dReni­vohitra. Nambaran’ny depiote, ny Me Razafimanantsoa Hanitra, nisolo tena azy ireo tamin’izany fa nahavelompanantenana izao satria tojo an’i Tojo Ravalomanana Antana­narivo sy ny vahoaka. Nitso­drano ity kandidà ity ireto solombavambahoaka ireto avy eo.

Synèse R.