Tsy mitsahatra ny mivoatra ny Malagasy mpilomano, i Tendrinavalona Idealy, any Thaïlande, ao anatin’ny fisitrahany ny vatsim-pianarana taranja lomano, mandritra ny herintaona. Ankoatra ny fiofanana amin’ny endriny maro, miatrika fifaninanana matetika ihany koa izy any an-toerana. Fifaninanana natrehany, ny alarobia lasa teo, ny “Thaïlande national” ho an’ny dobo filomanosana 50 metatra. Vokatra tena tsara sy nahafa-po no azony nandritra izany. Medaly volamena 1, volafotsy 1 ary alimo 2 no norombahany. Nahavita nanamontsana ny “Record de Madagascar” ihany koa i Tendry, teo amin’ny 200m dos sy 100 m dos. Nahavita ny 200m tamin’ny fe-potoana 2.26.12 s izy, raha toa ka 2.28.13 ny zava-bita tsara indrindra nasionaly farany. Teo amin’ny 100 m kosa, vitany tao anatin’ny fe-potoana 1.07.06 s izany, raha toa ka 1.07.45s izany teo aloha. Fe-potoana tsara indrindra 6 ihany koa no vitan’i Tendrinavalona Idealy nandritra ity fifaninanana ity. Tsy vao izao fa efa nisy ihany koa ny fifaninanana lehibe natrehany tany Thaïlande, ka nahazoany medaly volamena. Tsapan’i Tendry ny fivoarany, tao anatin’izany volana vitsivitsy niatrehany ny fiofanana any Thaïlande izay. Nambarany fa hitondra fahombiazana eo aminy, amin’ny sehatra nasionaly sy iraisam-pirenena izay rehetra rantoviny any an-toerana. Hijery izay lesoka mbola mila harenina izy ary hanatsara izany amin’ny fifaninanana mbola handraisany anjara.
Mi.Raz
Ho fantatra amin’ny faran’ny herinandro izao ireo ekipa valo hiatrika ny lalao ampahefa-dalan’ny fifaninanam-pirenena « Pureplay Football League ». Ny ekipan’ny Asa Diana sy ny Fosa Junior ary ny Disciples FC, izay efa tafita no hiatrika izany. Tsara ny mampahatsiahy fa ny Fosa Junior no tompondaka farany, tamin’ity fifaninanana ity.
Notanterahina teny amin’ny kianja Makis Andohatapenaka ny fampiofanana sy ny fampahafantarana ireo mpilalaon’ny Makis lahy sy vavy, sokajy U18. Hetsika izay nokarakarain’ny Malagasy Rugby. Natao hanomanana ny fifaninanana “AROI 2024” izany fiofananana izany.
Hotontosaina manomboka anio, eny Ambohimangakely, ny fifaninanana “Open de Petanque”, andiany faharoa izay karakarain’ny Ligin’Analamanga. Lelavola 1 tapitrisa sy 8 hetsy Ariary no omena izay ekipa tompondaka amin’ny sokajy “triplette” lehilahy. Tsara ny mampahafantatra fa amin’ny 1 ora no manomboka ny lalaon’ny “senior” lehilahy.
Afaka roa andro, hiditra amin’ny lalao ampahefa-dalana miverina ny fiadiana ny ho tompondakan’i Eoropa « Ligue des Champions (LDC) » indray ny mpakafy baolina kitra rehetra. Anisan’ny fihaonana tena andrasan’ny maro ny fifanandrinan’ny Paris Saint Germain, Frantsay, sy ny FC Barcelone, Espagne.
Araka ny vaovao nampitain’ny Federasiona malagasin’ny taekwondo (FMTKD), ho tonga eto Antananarivo ny Maître Olivier Sicard, teratany Malagasy mizaka ny zom-pirenena frantsay ary mpikatroka taekwondo 7ème dan. Hizara traikefa ho an’ireo Malagasy mpikatroka izy ny 16 sy ny 17 avrily ho avy izao, eny amin’ny ANS Ampefiloha. Tsiahivina fa efa nanomana sy nizara ny fahaizany tany amin’ny
faritr’i Vakinankaratra sy Mahajanga tany ny tenany teo aloha teo.
Ankoatra izay, tsara ny mampahafantatra fa hatao amin’io andro io ihany koa, eny Alarobia, ny fifidianana izay ho filohan’ny FMTKD. Tsiahivina fa tsy mbola fantatra ny isan’ireo ligy hifidy amin’io fotoana io ary tsy mbola mitsangana ny vaomiera misahana ny fifidianana CENI. Tsara ny mampahatsiahy fa miisa sivy ny isan’ny ligy mandrafitra ny federasiona. Anisan’ izany Analamanga, Atsinanana, Vakinankaratra, Matsiatra Ambony, Vatovavy, Fitovinany, Betsiboka, Boeny, Atsimo Andrefana ary Alaotra Mangoro.
Fitia Randria
Hanao izay fara heriny ny Makis Ladies handrombahana ny fandresena amin’ny fiadiana ny ho tompondakan’i Afrika (Can 2024), eo amin’ny rugby lalaovina olona 15. Ankoatra ireo mpilalao eto an-toerana, ho avy i Jeanne Sorin, mpilalaon’ny Racing 92.
Mitohy hatrany ny fanomanantenan’ny Makis Ladies, eo amin’ny fiatrehana ny fiadiana ny ho tompondakan’i Afrika (Can 2024), taranja rugby lalaovina olona 15. Fihaonana hotanterahina eto Madagasikara, ny 4 ka hatramin’ny 12 mey ho avy izao. Fantatra fa anisan’ireo hanatevin-daharana ny Makis Ladies, i Jeanne Sorin. Tsy zoviana amin’ny mpankafy lavalava intsony ny tovovavy satria efa niaraka tamin’ireo mpilalaon’ny Makis, tamin’ny taon-dasa. Toerana roa no misy azy dia ny “pilier” sy ny “3è ligne”. Manana safidy tsara izany ny mpanazatra amin’izay mety hametrahana azy eny ambony kianja. Tsiahivina fa milalao ao amin’ny Racing 92 i Jeanne Sorin.
Miditra ao anatin’ny paikady fanafainganana ny lalao eny ambony kianja ny fanazarantenan’ny Makis, amin’izao fotoana izao. Eo koa ny fanaovana fifaninanana kely mialoha ny tena izy. Hatreto, mbola 30 ireo mpilalao voatazona ary manaraka ny fanazarantena. Raha tsy misy ny fiovana, hivoaka ny 24 avrily ho avy izao, ny anaran’ireo 25 mirahavavy hiatrika ny Can 2024, ary manomboka eo no mihidy tsy mody intsony izy ireo, mandra-pahavita ny fifaninanana.
Raha tsiahivina, hidona voalohany amin’ny Makis i Kenya, ny alahady 4 mey. Hifanandrina amin’i Cameroun, ny alarobia 8 mey, ary hifampitana amin’i Afrika Atsimo, ny alahady 12 mey. Hiatrika ny fiadiana ny ho tompondaka maneran-tany “Mondial 2025”, izay ekipa roa voalohany amin’ity fiadiana ny ho tompondakan’i Afrika ity.
Noho ny fisian’ity Can 2024 ity, miato aloha ny fiadiana ny ho tompondakan’i Madagasikara “Top 12”. Tsy hiverina izany raha tsy ny alahady 19 mey 2024.
Tompondaka
Etre artisan de sa bonne fortune, oui mais qui porte regard à la source de ces créateurs?
Tontosa omaly, teny amin’ny Zone Expo Forello Tanjombato, ny lanonana fanokafana amin’ny fomba ofisialy ny « Salon International des Transports, de la Logistique et de la Manutention» (SITLM), andiany fahatelo. Olo-manankaja sy tomponandraiki-panjakana maro no niatrika izany, anisany ny minisitry ny Asa vaventy, Kly Ndriamihaja Livah Andrianatrehina, izay sady ray mpiahy ity andiany ity. Mandritra ny efatr’andro, nanomboka omaly, ary tsy hifarana raha tsy ny 14 avrily 2024 ny hetsika. Mitana anjara toerana lehibe eo amin’ny ankehitriny sy ny hoavin’ny fitaterana sy ny manodidina ity hetsika ity, araka ny nambaran’ny minisitry ny Fitaterana sy ny famantarana ny toetr’andro, Dr Manambahoaka Valéry Fitzgerald Monjavelo.
Ambohipihaonan’ny fianakaviamben’ny fitaterana, ny eny amin’ny Zone Forello Tanjombato, mandritra ny SITLM. Miisa 108 ireo mpampiranty mandritra izany. Amin’ny maha hetsika iraisam-pirenena azy, tazana eny avokoa ireo fahaiza-manao eo amin’ny lafiny fitaterana manerana ny Nosy ka hatrany ampitan-dranomasina. Manampy be ny fanjakana amin’ny fanatanterahana ny Politika ankapoben’ny fanjakana izao hetsika izao. Eo ihany koa ny an’ny minisiteran’ny Fitaterana, ny amin’ny fanatsarana ny fomba fitaterana amin’ny fomba rehetra, ny fahafahana mandeha amin’ny toerana rehetra ary ny fifandraisana eo amin’ny toerana rehetra.
Lin
Hatsangana ao Ranomafana ny tobim-pamokarana herinaratra avy amin’ny rano. Miaraka amin’ny « Sinohydro » ny tetikasa sady hanana tanjaka 64MW. Hisitraka ny tetikasa ny faritra Analamanga sy Itasy ary ny distrika telo, toa an’i Fenoarivobe, Ankazobe sy Ambohidratrimo miaraka amina kaominina efatra hafa.
Vita ny 85% an’ilay Zone d’emergence piscicole (ZEP) eny amin’ny kaominina Tsiafahy. Ankehitriny, mamarana ireo pitsompitsony isan-karazany ny tomponandraikitra eny an-toerana. Hamokatra zana-trondro ny fotodrafitrasa ka hampiroborobo ny fiharian’ireo mpiompy sy hampitombo ny vokatra ataony.
Miahy sy manohana ireo mpandraharaha ho fampiroboroboana ny fandraharahana ny Madagascar entreprise developpement (MED). Tao anatin’ny 10 taona, nisy ny tolotra isan-karazany sy fanofanana manokana nomeny ny mpandraharaha ao anatin’ny Club des entrepreneurs Aina Vao-MED.
Maro ny lohahevitra ho voaboasana momba ny sehatry ny fitaterana. Mandritra ny efatr’andro ny hetsika Salon international des transports, de la logistique et de la manutention eny amin’ny Hazovato Forello Expo Tanjombato. Hita eny an-toerana avokoa ireo mpisehatra rehetra ao anatin’ny tontolon’ny fitaterana.
20 taona nanofanana momba ny fitantanana ny mpiasa eny amin’ny orinasa ny Ivontoeram-panofanana momba ny fitantanana ny mpiasa (CFRH Institute) Ambaranjana. Hifantohana ny fifehezana ny maha olona, ny fampiharana ny fitsipika sy ny didy aman-dalàna. Nilaza ny tale jeneraly (DG), Rakotonarivo Olivia, fa « 4 monja ny mpianatra tany am-boalohany, ary efa maherin’ny 2 000, ankehitriny. Mpitantana orinasa izy ireo, maka ny mari-pahaizana LMD. Aminy, raha tsy misy ny mpiasa, tsy mandroso ny orinasa ».
Anisan’ireo mpianatra ao Rakotonirainy Malala, mpitantana orinasa lehibe iray eto an-dRenivohitra. Nambarany fa « mety tsara amiko ilay fiofanana ampitain-davitra, satria tonga dia sady mandeha ny fampiharana amin’ny fitantanana ny mpiasa ato amin’ny orinasa ».
Vinan’ny CFRH Institute amin’ny ho avy ny hanitarana ny ivontoeram-panofanana any amin’ny faritany. Eo koa ny fikarohana mpiara-miombon’antoka vahiny, ahafahan’ny mpianatra manohy ny fianarany any ivelany.
Njaka A.
Nikarakara loabary an-dasy indray ny Tetikasa Taratra, volavolain’ny Kaonferansin’ny eveka ao amin’ny Eglizy Katolika, ny 3 avrily 2024 teo. Noresahana ny fitantanana mahomby ny harena ambanin’ny tany mba hitondra tombontsoa ho an’ny rehetra.
Tany Benetsy, kaominina Ankilimalinike, distrika Toliara II, no nanaovana ny fivoriana, mahakasika ny lafiny lalàna mifehy ny harena an-kibon’ny tany, ny zo sy ny fepetra tsy maintsy arahin’ny mpitrandraka sy ny mpandraharaha, ny fanjakana. Eo koa ny andraikitry ny mponina eny ifotony voakasiky ny asa fitrandrahana. Manampy ireo ny anjara biriky entin’ny sehatry ny harena an-kibon’ny tany amin’ny fampandrosoana sy ny ady amin’ny fahantrana. Hita tao amin’ity fihaonana ity avokoa ireo voatanisa ireo, nijerena ny zava-dehibe manan-danja, indrindra ho an’ny tapany atsimon’ny Nosy.
Vovonana iray ahafahan’ny mpisehatra rehetra voakasika hifanakalozan-kevitra, hakam-baovao, hisian’ny fitantanana mahomby ny tetikasa Taratra. Nizara ny heviny ireo mpandray anjara. Nilaza Ralahy Emmanuel, mpandrindra ny tetikasa Taratra, fa tombontsoa tamin’ny fivoriana ny nahafahana namondrona ny hevitra samihafa avy amin’ireo mpisehatra. Hisitraka ny tombontsoa ateraky ny fitrandrahana ambanin’ny tany daholo ny mponina rehetra.
Nahalalana ny tsy fantatra
Mitsinjo ny hialan’ny Malagasy rehetra amin’ny fahantrana ny Eglisy Katolika. Manana ny harena azo trandrahina ny firenena, ka mampahalala ny tombontsoa sy ny fiantraikany tsara tokony hisitrahan’ny mponina izany izy.
Nilaza i Tsivesy Ernest, anisan’ny mpandray anjara, fa « nahalalana izay zavatra tokony ho fantatray ity loabary an- dasy ity, ka ahafahana mandroso. Ohatra, hay mila manatona ahy, raha tompon’ny tany aho, raha misy mitrandraka ny ao ambanin’ny taniko. Ary tsy maintsy manao fifanarahana amiko ny mpitrandraka ».
Hitohy any amin’ny kaominina hafa ny hetsiky ny tetikasa Taratra. Toy ny any Belalanda, Maromiandra, Soalara, St-Augustin ary Toliara.
Njaka Andriantefiarinesy
Trano bongo aux multi talents, quand le savoir faire se trouve dans les maisonnées.
Nouvel épisode demain, à 18h en exclusivité sur NewsMada.
Hotanterahina ny alahady ho avy izao, etsy amin’ny kianjan’Alarobia, ny fifantenana izay hisolotena an’i Madagasikara amin’ny fiadiana ny ho tompondakan’i Afrika, taranja atletisma sokajy «sénior», lahy sy vavy. Fihaonana hotanterahina any Douala Cameroun, ny 15 – 25 jona ho avy izao.
Araka ny tapaka teo anivon’ny Federasiona malagasin’ny atletisma (FMA), ny halaviran-dalana 100 m sy 400 m tsotra no hanaovana io sedra io. Tsy ny rehetra anefa no afaka hiatrika izany fifantenana izany fa ireo izay nahazo ny “minima” nandritra ny fifaninanana ofisialy nokarakarain’ny seksiona sy ny ligy manerana an’i Madagasikara tao anatin’ ny taom-pilalaovana 2024 ihany. Raha tsiahivina, 12 s 08 ny fe-potoana eo amin’ny 100 m ho an’ny vehivavy, raha 10 s 08 ny an’ny lehilahy. 59 s eo amin’ny 400 m ny an’ny vehivavy raha 49 s ny an’ny lehilahy. Ho any Cameroun, izay manana zava-bita tsara indrindra mandritra io fifantenana io. Ankoatra izay, efa ao anaty ekipam-pirenena i Sidonie Fiadanantsoa nahazo ny medaly volafotsy tamin’ny 100 m misy fefy tamin’ny lalao Afrikanina tany Ghana farany teo sy i Claudine Nomenjanahary, hihazakazaka ny 400 m misy fefy.
Izy mirahavavy ireo izay samy mpiofana any Dakar Senegal avokoa.
Tompondaka
Nosokafana tamin’ny fomba ofisialy omaly, teny amin’ny LMA Ampefiloha, ny fifaninanana “All Step” natokana ho an’ny Lycée, karakarain’ny ligin’ Analamanga, taranja basikety. Nitohy ihany koa ny lalao nihaonan’ny LMA sy ny SFXA, vehivavy, ary ny LMA sy ny LAA, lehilahy.
Miatrika fiofanana sy fanazaran-tena matihanina any Budapest, amin’izao fotoana, ny judokas malagasy, Rasoanaivo Razafy Laura. Mpikatroka avolenta maneran-tany 500 mahery no miaraka misitraka aminy ity “training camp” ity.
Nitohy omaly alarobia 10 avrily, teny amin’ny Lapan’ny fanatanjahantena Mahamasina, ny fanazaran-tenan’ny Ankoay QQT 3X3 Senior sy ny ACNOA 3×3 U18 lahy sy vavy. Ho fanomanana ny fifaninanana iraisam-pirenena hatao ny volana mey izao no anton’izany.
Hitety faritra ny fiadiana ny amboaran’i Madagasikara, taranja Volley-ball amin’ity taom-pilalaovana 2024 ity. Any Mahajanga no hisantarana izany, ho an’ny sokajy U16, ny 13 hatramin’ny 16 jolay izao. Hitohy any Toamasina kosa, ho an’ny sokajy U18, ny 1 hatramin’ny 6 aogositra.
Ao anatin’ny fanomanana tanteraka ny lalao olympika amin’izao ny atleta malagasy voakasik’izany. Misy ireo mbola mila miatrika fifaninanana iraisam-pirenena maromaro vao afaka hahazo ny tapakila ho amin’izany. Ho an’ny taranja Judo manokana, handray anjara amin’ny fiadiana ny ho tompondakan’i Afrika, ny 24 avrily izao, ireo judokas malagasy, anisan’ izany, Rasoanaivo Razafy Laura. Tsy misy resaka hatreto ny fangatahana nataon’izy ireo teny anivon’ny minisiteran’ny Tanora sy ny fanatanjahantena kanefa efa hifarana ny fisoratana anarana. Tsiahivina fa manana toerana tsara hiatrehany ny lalao olympika i Laura, izay eo amin’ny laharana faha-37 ary manana isa 1067. Misedra ity olana amin’ny fandehanana any ivelany hiatrika fifaninanana ity ihany koa ny taranja lomano. Mbola miandry izay fandraisana andraikitra ataon’ny minisitera. Tokony hiatrika ny fiadiana ny tompondakan’i Afrika, amin’ny faran’ity volana ity, Raharvel Jonathan sy Rabejaona Holy Antsa saingy mbola baraingo hatreto ny hoenti-manana.
Mi.Raz
Eo am-piandrasana ny valin’ny fitsirihana nataon’ny iraky ny Kaonfederasiona Afrikanin’ny baolina kitra (CAF) ny kianjaben’i Mahamasina ny Federasiona malagasy (FMF). Madagasikara izay hampiantrano an’i Comores sy i Mali, ny volana jona ho avy izao.
Tontosa ny zoma 5 avrily lasa teo, ny fitsirihana ny kianjaben’i Mahamasina nataon’i Josua Andries Hoebeb, «Inspecteur» sady iraka manokan’ny Kaonfederasiona Afrikanin’ny baolina kitra (CAF). Sarotiny ary tena hentitra tamin’ny fidinana ifotony nataony i Josua Andries, ka tsy nisy afaka niditra tao an-kianja ny mpanao gazety sy ny mpikambana teo anivon’ny federasiona FMF.
Ny sekretera jeneraly lefitra ao amin’ny FMF, Sarindra Randrianasolo, sy ireo tomponandraikitra ao amin’ny kianja Barea Mahamasina ihany no olona afaka niaraka taminy nanatontosa izany. Nojereny avokoa ny pitsompitsony rehetra tao amin’io fotodrafitrasa io, na tao anatiny na ny teny ivelany. Ankoatra ny bozaka, teo koa ny kianja annexe, ny gradin sy ny seza, ny tribune, ireo efitrano isan-tokony, toy ny vestiaire, ny an’ny mpitsara, ny efitra fidiovana. Ankoatra izay, nasiany maso koa ny jiro manazava ny kianja, ny fefy anatiny sy ivelan’ny kianja. Teo koa ireo vavahady fidirana rehetra.
Taorian’ny fitsirihany ny kianjaben’i Mahamasina, nihaona tamin’ny filohan’ny federasiona ny tenany saingy tsy nisy nipika ny resaka nifanaovan’izy ireo. Nandao an’i Madagasikara ny sabotsy lasa teo, ity inspecteur-n’ny CAF ity. Hanao ny tatitra momba ny diany teto izy, izay hiandrasana fankatoavana amin’ny hahazoan’io fotodrafitrasa io mandray na tsia ireo fihaonana iraisam-pirenena miandry ny Barea de Madagascar. Tsiahivina fa ny volana jona no handray ny Coelacanthes-n’i Comores sy ny Aigle de Mali ny Barea, eo amin’ny fifanintsanana ho an’ny “Mondial 2026”.
Tompondaka
Nanakoako tatsy Afrika indray ny taranja tenisy malagasy, ny sabotsy lasa teo. Lasan-dRasendra Miotisoa ny amboara teo amin’ny fiadiana ny ho tompondaka amin’ny Tennis Foundation Ghana J30, ho an’olon-tokana, vehivavy. Fihaonana notanterahina tao Accra. Resiny teo amin’ny famaranana ilay anglisy, i Tara Lawal. Seta 2 no ho 1 (6 (5) / 7 ; 6/:4 ; 6/:1) no nahazoan’i Miotisoa ny fandresena.
Niady ny fihaonan’izy mirahavavy teo amin’ireo seta roa. Lasan’i Lawal ny voalohany taorian’ny tie-break. Nifandimbiasana kosa ny fahazoana ny “jeu” teo amin’ny seta faharoa saingy naneho fahavononana handresy i Miotisoa ka lasany izany. Sahala 1 sy 1 teo ny seta azon’izy mirahavavy. Voatery niditra teo amin’ny seta fahatelo, hahalalana izay ho tompondaka. Tsy niady intsony anefa ny lalao satria nitaky ny havizanana ho an’ilay anglisy. Tsy nataon’i Miotisoa, nisotro rano mihitsy satria tsy nahazo afa-tsy “jeu” iray monja.
Tsiahivina fa resy teo amin’ny famaranana i Miotisoa, ho an’olon-droa miaraka, niarahany tamin’ilay Ganeanina, i Tomegah. Resin’ilay britanika, i Ndukwu sy ilay Meksikianina, i Rodriguez-Rizo, tamin’ny seta 2 no ho 0 izy mirahavavy. Tsy mijanona eo fa mbola mitohy ny fifaninanana ho an’i Miotisoa, izay nanambara fa vonona hatrany hitondra avo ny anaran’i Madagasikara.
Tompondaka
Efa tafita any amin’ny dingan’ny ampahefa-dalan’ny fifaninanam-pirenena “Pureplay Football League (PFL)”, taranja baolina kitra, ny ekipan’ny Fosa Junior Boeny. Nahazo fandresena dimy sy faharesena tokana izy ireo nandritra ny lalao enina nataony. Tsiahivina fa ny Fosa Junior no tompondaka farany tamin’ny taona 2023 teo.
Hifanandrina rahampitso, ao anatin’ny fiadiana ny tompondakan’Analamanga,taranja Volley-ball, eo
amin’ny sokajy “1ére division” vehivavy, ny Squad 1 sy ny Squad 2 ary ny Bi’As sy ny ASI 2. Hiditra amin’ny andro faha-12 ny fifaninanana.
Hatao ny 22 hatramin’ny 28 avrily izao, ny fampiofanana ireo mpanazatra eo anivon’ny ligin’Analamanga, taranja basikety. Misokatra hatramin’ny 15 avrily ny fisoratana anarana ho an’izay liana ny hanatrika izany fampiofanana izany.
Hotanterahina manomboka anio ny ampahefa-dalan’ny fiadiana ny ho tompondakan’i Eoropa “Ligue des Champions (LDC)”. Anisan’ireo lalao tena andrasan’ny maro amin’izany ny fihaonan’ny Real Madrid, Espagne sy ny Manchester City, Anglisy. Fifanandrinana izay hatao ao amin’ny kianjan’ny Santiago Bernabeu, Espagne.
Ekipa malagasy anisan’ny andrandraina handray anjara amin’ny lalao olympika hatao any Paris, ny Ankoay 3×3, taranja basikety. Mbola hiatrika fifaninanana hahazoana ny tapakila amin’izany anefa izy ireo. Manoloana izany, manoman-tena mafy ireo mpilalao. Nanomboka ny herinandro lasa teo, nikotrana teny Imerinkasinina ny Ankoay. Niara-nilalao sy nanao fanazaran-tena teny 67ha izy ireo. Nampiavaka ny kotrana nataon’ny Ankoay, ny fahatongavan’ny filohan’ny federasiona malagasin’ny basikety, Ramaroson Jean Michel, niaraka nikotrana tamin’izy ireo teny Imerinkasinina. Nampiseho ity filoha ity fa vonona hanohana azy ireo. Tsiahivina fa ny 16 hatramin’ny 19 mey izao no hiatrika ity fifaninanana fifanintsanana amin’ny lalao olympika ity, any Debrecen Hongrie, ny Ankoay. Nambaran’ireo mpilalao fa na dia mbola mafy aza ny lalao hatrehan’izy ireo, fotoana hanaporofoana ny maha sangany an’i Madagasikara eto Afrika, eo amin’ny taranja basikety 3×3 izao. Vonona, araka izany, izy ireo ny hitady fandresena amin’ny lalao rehetra hatrehana any Hongrie ny volana mey izao.
Mi.Raz
Ny ekipan’Ambohitrimanjaka, Union des boulistes Manjaka (UBM) no nandrombaka ny amboaran’i Madagasikara, taranja tsipy kanetibe, lahy sy vavy, izay natao tany Antsirabe, ny 5 – 7 avrily lasa teo. Solontenan’ny ekipa nasionaly malagasy any Maroc ny UBM.
Nifarana teny amin’ny Avenue de la Gare Antsirabe, afakomaly, ny fiadiana ny amboaran’i Madagasikara, taranja tsipy kanetibe. Norombahin’ny klioban’Ambohitrimanjaka, Union des boulistes Manjaka (UBM) ny amboara teo amin’ny sokajy lahy sy vavy. Raha ho an’ny lehilahy, lavon-dry Hery sy Donald ary Jeannie, mpilalaon’ny UBM, tamin’ny isa 13 no ho 0, ry Ramires sy Balotti ary Havana, solontenan’ny Amical boulistes Mandrosoa Ivato (Abmi). Teo amin’ny vehivavy, resin-dry Felana sy Fenitra ary Tahiana, UBM, tamin’ny moka foy, 13 no ho 12, ry Hanitra, Harisoa, Judicaëlle, solontenan’ny Bic Ambohimahasoa.
Araka izany, ny mpilalaon’ Ambohitrimanjaka no solontenan’i Madagasikara mandritra ny fiadiana ny ho tompondakan’i Afrika, izay hatao any Maroc, ny volana jona ho avy izao. Tsara marihina fa raha miala ny sazin’i Madagasikara vao afaka mandray anjara amin’io fifaninanana afrikanina io ny ekipa malagasy.
Ankoatra izay, nalain-dry Daniel sy Léon ary Solo, Bic, ny teo amin’ny sokajy zokiny “vétérans”. Azon’ny klioban’ny Pétanque club Ampitatafika (Pac), misy an-dry Fiaritsoa sy Elio ary Jo, ny sokajy zandriny “junior”.
Fitia Randria