Vaindohan-draharahan’ny minisiteran’ny Toekarena sy ny fitantanam-bola ny hanatsara ny fitantanana ny raharaham-panjakana. Antony nametrahana ny « comptoir unique » ao amin’ny foibem-pitondrana ankapobeny misahana ny tetibola sy ny fitantanam-bolan’ny minisitera (SGEAE). Notokanana ny alakamisy teo ity sampandraharahana ity ka natao handraisana sy hikarakarana ny antontan-taratasin’ireo mpiasam-panjakana, hatramin’ny fisotroan-dronono. Hampiasana ny haitao ara-kajy mirindra sy ahitana ny rindrambaiko e-tantana sy e-laharana ireo fitaovana misy ao. « Ho vita ao anatin’ny 48 ora ny fikarakarana ny antontan-taratasy rehetra raha toa ka nahatratra hatrany amin’ny 96 ora izany teo aloha. Hampitombo avo roa heny ihany koa ny dosie ho raisina isan’andro ity sampana vaovao ity. Izany hoe, hiakatra 300 isa izany raha toa ka 142 isa teo aloha », hoy ny fanazavana voaray. Mifampitohy sy mifampiankina, ara-kalitao, ny asa rehetra atao. Miantoka ny fiarovana ireo angon-kevitra ny famokarana antontanisa azo antoka.

Henintsoa H.

Manakara au coeur de ses plantations

Nosokafana ny 28 oktobra teo, tetsy amin’ny sampan­draharaha misahana ny fikarohana sy fiofanana (DRFC) Antanimora, ny fampiofanana momba ny ady amin’ny fampijaliana olona. Tafiditra indrindra amin’ny fanohizana ny tetikasa nosoniavin’ny minisiteran’ny Filaminam-bahoaka sy ny Association pour la prévention de la torture (APT) izao fampiofanana omena ny polisy izao. Natao izao mba hanatsarana ny fahaiza-manao eo anivon’ny polisim-pirenena ma­nomboka amin’ny lehiben’ny sampandraharaha tsirairay ka hatramin’ny mpisehatra mi­vantana eny an-kianja. Tan­jona ny hanafoana ny fampijaliana atao na mihatra amin’ny olona iray mandritra ny fisamborana, fanadihadiana na fitazomanana olona anaovana fanadihadiana. Nanokatra izany tamin’ny fomba ofisialy ny Sekretera jeneralin’ny minisiteran’ny Filaminam-bahoaka, ny contrôleur général de police, Randriambelo Mandimbin’Ny Aina. Nizara andiany maro­maro ireo mpiofana ka ny herinandro voalohany, natokana ho an’ireo lehiben’ny sampandraharaha eo anivon’ny polisim-pirenena. Hitohy ao ana­tin’ny telo herinandro izany ka ireo lefitry ny lehiben’ny sampandraharaha isan-tsokajiny no hanaraka ny fiofanana. Hamoaka tari-dalana ny avy ao amin’ny kaomity aorian’ny fampiofanana mba hanenana sy/na hanafoanana mihitsy ireo endrika fampijaliana mandritra ny asa hiantsorohan’ny polisy.

J.C

Nitora-bato ny fokonolona, nanaparitaka tamin’ny baomba mandatsa-dranomaso ny zandary teny Ambohibao Antehiroka, afakomaly. Olona roa naratra.

Nidina an-dalambe, ni­lanja sorabaventy sy nandoro kodiarana ny mponina teny Ambohibao An­tehiroka, ny alin’ny talata 29 oktobra teo. Leo tsy fisian-drano sy fahatapahan-jiro, nanakan-dalana naneho ny hatezerany ny mponina teny an-toerana. Nitsoaka kiririoka sy nikotaba, voatery niditra nandamina ny toe-draharaha teny an-toerana, niezaka na­merina ny fandriampahale­mana ny zandary. Nilanja vato sady nitangorona teo afovoan’ny arabe ireo mpanao fitakiana. Ny famerenana amin’ny laoniny ny jiro sy ny rano no takin’izy ireo. Mandoa ny faktiora ara-dalàna saingy tsy misy ny fisitrahana. Raikitra ny fanapoahana baomba mandatsa-dranomaso nataon’ny zandary. Ny fokonolona tetsy an-kilany izay nitora-bato. Vokany, olon-tsotra roa naratra. Voa mafy teo amin’ny masony ny iray. Samy naneho ny hatezerany nanoloana io tsy fisitrahana hazavana sy rano amin’ny ara-dalàna io ireo mponina. Tsiahivina, nifanesy nanao fihetsiketsehana noho io olan’ny rano sy jiro io ny ankamaroan’ny mponina tamina boriborintany vitsivitsy teto an-dRenivohitra, tao anatin’ny herinandro. Mandoro kodiarana, manapaka lalana hatrany izy ireo ka antony nahatonga ny fifandonana amin’ny mpitandro filaminana.

Tsiferana R.

Resy nanoloana ny tompondakan’ny WFC i Tojo Heriniriana, tao anatin’ny fifaninanana « WFC Championship », izay ataony any Chine, taranja MMA. Voninahitra lehibe ho azy ity ady ity satria niady teo amin’ ny sokajy -61 kg izy, raha toa ka -57 kg ny sokajin-danja misy azy. Mbola mitohy ny fifaninanana ho an’i Tojo.

Mitarika vonjimaika ny GNVB ao amin’ny sokajy lehilahy, anatin’ny fiadiana ny amboaran’i Madaga­si­kara, U23, lahy sy vavy, tanterahina any Fianarantsoa. Eo amin’ny sokajy vehivavy, ny BI’As no mitarika ao
amin’ny vondrona B ary ny GNVB ihany koa no voalo­hany ao amin’ny vondrona A.

Nanomboka omaly, ao Toliara, ny fiadiana ny ho tompondakan’i Madagasikara, taranja karate. Mpikatroka 500 avy amin’ny ligim-paritra 24 no tonga any an-toerana hiatrika ny fifaninanam-pirenena izay hitohy hatramin’ny 3 novambra izao. “Hatao modely ity fifaninanana ity”, hoy ny filohan’ny FKM.

Hotanterahina ny zoma 1 hatramin’ny 3 novambra izao, eny amin’ny Lycée Saint Jean de Matha Moramanga, ny fifaninanana basikety “Inter-etablissement scolaire”, karakarain’ny fikambanana Fivam. Sokajy U13, U15, U17, lahy sy vavy, no hifaninana mandritra izany, mitondra ny anarana “Born to Play”.

Raikitra ny fiadiana iraisam-pirenena momba ny “Fight Cage” karakarain’ny Guerre­ros Team. Fifaninanana hotanterahina rahampitso, ao amin’ ny Kianja mitafon’i Mahama­sina. Nambaran’ny mpikara­kara fa ady iraisam-pirenena
5 no hitranga mandritra io fifaninanana goavana io. Sam­bany no hisy fifaninanana anaty “cage” eto Madagasi­kara. Taranja Jiu-jitsu sy Grap­pling, Pancrace ary K1 no hifaninanana ary ny K1 ihany no tsy hisy ady iraisam-pire­nena, noho ny tsy fahafahan’ ny mpifanandrina avy ao La Réunion, araka ny fanazavan’ ny mpikarakara hatrany. Efa tonga ny talata teo koa ny mpifanandrina renioney iray eo amin’ny taranja pancrace, izay hifandonana amin’ny mpikatroka malagasy, Razafinjato Totiana Rinho, sokajy -80kg. Sambany ho an’i Rinho no hiatrika io ady iraisam-pire­nena, taranja Pancrace, io. “Matoa tonga eto ny mpifanandrina dia vonona ny hiady izy, efa vonona ny hanohitra ihany koa anefa aho”, hoy ny nohamafisin’i Rinho. Ho avy anio kosa ireo vahiny 4 hafa, eo amin’ny Jiu-jitsu sy Grap­pling. Anisan’izany, ny mpifanandrina amin’i Nicky Diallo
(-77kg), taranja Grappling. Nambaran’i Nicky fa ela izy no nanomana ity fifaninanana ity ary vonona tsara. Hanoma­nana sahady ny fiadiana ny ho tompondaka maneran-tany hanomboka amin’ny herinandro ity fifaninanana ity, ho an’ny taranja Jiu-jitsu brezi­liana. Mandray anjara amin’ity avokoa ny ankamaroan’ny solontena malagasy ho any Abu Dhabi ary misy ny ha­nainga amin’io zoma alina io ihany. Mikotrana etsy amin’ny Playbox Analamahitsy izy ireo.

Mi.Raz

Hotanterahina ny sabotsy 16 novambra ho avy izao ny andiany faha-7 amin’ny “Rallye des litchis”, dingana fahadimy, amin’ny fiadiana ny ho tompondakan’i Madagasikara 2024. Fifaninanana, karakarain’ny klioba AC 501. Mahatratra
121, 56 km ny halaviran’ity rallye ity. Misy dingana manokana «ES» miisa 6 mirefy 73, 24 km izy ity.
Hotanterahina ny tapany maraina ny dingana manokana miisa 3 ary ny tapakandro hariva ny 3 ambiny. Hanombohana izany ny eo amin’ny Ermitage, mampitohy an’Ambatolaona 1, misy halavirana 11, 16 km. Ny faharoa, Sambaina sy CEG Ambatomanga 1, mirefy 12, 66 km ary ny fahatelo eo Ambo­hitsimeloka sy Ambalavato 1, misy 12, 80 km. Hanana lanjanisa 1 ity rallye ity.
Marihina fa hamarana ny taom-pilalaovana 2024 izy ity. Tsiahivina, efa fantatra fa ny ekipazy avy amin’ny klioba Asacm no nandrombaka ny ho tompondakan’i Madagasikara, tsy iza fa i Mathieu sy Andry Tahina. Mbola hanana ny lanjany kosa izany ho an’ireo sokajy sy kilasy hafa.

Tompondaka

Hanohana ny fikarohana siantifika sy hanampy amin’ny fampitana izany ho an’ny daholobe ny Telma Mada­gascar sy ny Axian University amin’ny alalan’ny fandaharanasa Masterclass.
« Tanjona ny hampiroboroboana ny seraseran’ireo voka-pikarohana sy hanampiana ireo mpikaroka hampahafantatra izany », hoy ny tomponandraikitry ny Telma, Randrianjatovonarivo Mamy Henintsoa. Noho izany, ma­nao fiofanana mandritra ny roa andro, nanomboka omaly, eny amin’ny Campus Andra­haro, ireo mpikaroka sy mpisehatra samihafa. « Hanampy amin’ny fampitana ny voka-pikarohana sy ahafahan’ny rehetra mahazo azy ny fandaharanasa», hoy ny Pr Andria­maniraka Jaona Harilala, talen’ny fikarohana eo anivon’ny ministeran’ny Fampianarana ambony sy ny fikarohana siantifika (Mesupres), omaly, nandritra ny fampahafantarana ny fandaharanasa teny amin’ny Telma Andraharo. « Lokanady ho anay sy ny firenena ny fanohanana ireo ekipan’ny minisitera mandritra ny fampiofanana azy ireo, mba hahafahany mampita ireo voka-pikarohana mazava sy ho azon’ny rehetra », hoy ny tale jeneralin’ny Axian Univer­sity, i Carolina Meurisse. No­tohizany fa voninahitra ho azy ireo ny hanohana ireo mpikaroka sy hizara ny fahaiza-manaony ary ny traikefany mba hitondra vokatsoa eo amin’ny fikarohana. Anisan’ ireo lohahevitra hovoaboasana mandritra ny atrikasa atao ny serasera, ny fanabeazana. Hitondra fanazavana mahakasika ny fomba hampitana ny voka-pikarohana siantifika ataon’ireo mpiantsehatra iha­ny koa ireo matihanina.

Henintsoa H.

Hiroso amin’ny fampihodinana tsikelikely ny famokarana ataony ny orinasa Ambatovy rehefa niato nandritra ny iray volana mahery, noho ny fahavakisan’ny fantsona mpitatitra akora mampitohy ny fitrandrahana ao Moramanga sy ny orinasa ao Toamasina. Nitaky asa betsaka ireo fanarenana ireo, anisan’izany ny fanamarinana ny hamafisan’ny fantsona. Tsiahivina fa vaky ny 25 septambra ny fantsona.
Ho vita ny volana aogositra 2025 ny RN6 mampitohy an’Ambanja sy Antsiranana izay vatsian’ny Banky eoropeanina vola. Vita amin’ny antsasany ny fotodrafitrasa,ankehitriny, anisan’izany ny tetezana, ny dalot ary ny station de pesage ao Ambanja. Tanjona ny hanatsara ny fifamoivoizana sy hampitombo ny fivezivezen’ny entana. Marihina fa maro ireo fotodrafitrasa efa tafapetraka amin’izao fotoana.
Hanatsara ny vokatr’ireo tantsaha maherin’ny 40 tapitrisa manerana an’i Afrika ny fampiasana ny haitao ara-kajy mirindra sy ny teknolojia. Tanjona ny hampitombo ny vokatra ara-pambolena amin’ny alalan’ny fanomezan-danja ny teknolojia voaporofo ho an’ny tantsaha an-tapitrisany. Eo koa ny hanampy 120 tapitrisa taonina amin’ny sakafo sy hanafaka olona miisa 130 tapitrisa anatin’ny fahantrana.

Hatolotra mialoha ny filankevitry ny minisitra, anio, ny fikasana ho fanaovan-tsonia fifanaraham-piaraha-miasa, ho fampiroboroboana ny fikarohana ny ranomasina sy ny harena ao aminy. Tanjona ny hampandrosoana ny toekarena manga eto amintsika. Mandray anjara 80% amin’ny fifanakalozana ara-barotra maneran-tany ny ranomasina. Fonenan’ny 80% ny zavamananaina eto ambonin’ny tany koa izy ary antoky ny ho avy mamiratra eo amin’ny fifandraisana ara-toekarena. Nilaza ny minisitry ny Jono sy ny toekarena manga, Mahatante Paubert, nandritra ny fivoriana maneran-tany mahakasika ny fampiroboroboana ara-toekarena mifototra amin’ny ranomasimbe, tany Qingdao Sina, ny herinandro teo, fa « rakotra ranomasina ny 71% izao tontolo izao ka miantoka ny toekarena manga ny ranomasina ». Tadindomin-doza nefa ny tontolo ka mila mifanome tanana ny firenena rehetra hampaharitra ny fampiasana azy. Tsiahivina fa efa nisy ny fikarohana nataon’ireo mpikaroka teo aloha niarahana tamin’ny ivontoeram-pikarohana samihafa eto Madagasikara sy tany Sina mahakasika ny tontolon’ny ranomasina.

Henintsoa H.

Hanampy amin’ny famantarana ny tarehimariky ny fambolena sy ny vokatra azo avy aminy ary ny fomba fihinanana izany ny boky mirakitra ny voka-panadihadiana mahakasika ireo sakafo misy eto amintsika, ny taona 2016-2022.

Mitana anjara toerana lehibe eo amin’ny toekarem-pirenena ny sehatry ny fambolena. Ha­treto, mbola miompana amin’ny fambolena mahavelona ny ankamaroan’ny mpamboly, kely ny vokatra azo ka miteraka fatiantoka ao anatin’ny rojom-pamokarana. Noho iza­ny, hanampy amin’ny famantarana ny tarehimarik’ireo sakafo misy eto amintsika ny voka-panadihadihana ny tao­na 2016-2022, nataon’ny minisiteran’ny Fambolena sy ny fiompiana (Minae) niaraka tamin’ny ivontoeram-pirenena momba ny antotanisa (Instat), izay notohanan’ny Banky afrikanina ho an’ny fampandrosoana (Bad). « Hanampy izany indrindra ny fitaovana manapa-kevitra izay tafiditra ao anatin’ny paikadim-pamolavolana ny famokarana hanatrarana ny fahavitan-tena ara-tsakafo», hoy ny mpandrindra ny tetikasa sy mpiara-miombon’antoka amin’ny minisiteran’ny Fambolena sy ny fiompiana, Randrianaivomanana Andritiana, nandritra ny fanorolarna ny tatitra, teny Antani­narenina, omaly. Misongadina ao anatin’ity voka-panadihadiana ity ny mahakasika ny fihinanan’ny Malagasy tsirairay ny protéïne , ny lipida, glosida, ny vitamina ary ny sira mineraly.

Fanodinam-bokatra

“Manampy amin’ny famolavolana ny politikam-panjakana mahomby amin’ny fomba iantohan’ny Malagasy tsirairay ny sakafo isan-karazany sy ara-pahasalamana ary maro loko ity boky ity”, hoy hatrany ny fanazavana voaray. Hita ao anatin’izay ny antsipirihan’ny vokatra sy ny fomba fihinanana azy anatina vanim-potoana iray. Noho izany, fitaovana mahomby hamantarana sy handrafetana ny politikan’ny fahavitan-tena ara-tsakafo ny tatitra natao.
Ankoatra izay, ahafahana manao tombana amin’ny fahatrarana ny fampandrosoana lovainjafy (ODD), toy ny fihanaky ny tsy fahampian-tsakafo sy ny tondro fatiantoka ara-tsakafo ihany koa, ity tatitra momba ny sakafo ity.

Henintsoa Hani

Anjaran’ny mpiasan’ny sera­nam-piaramanidina, ao amin’ny orinasa Ravinala Airports, any Nosy Be no nisitraka ny fampiofanana mahakasika ny ady amin’ny famarinana olombelona, izay nataon’ny BNLTEH.
Nampahafantarina azy ireo ny karazana mari-pamantarana manan-danja izay mety hitarafana trangam-pamarinana olombelona. Amin’ny maha mpisehatra voalohany azy ireo eo amin’ny fifamezivezen’ny olona eny amin’ny seranam-piaramanidina, manana andraikitra lehibe amin’ny fanakanana ny hetsika mampiahiahy sy ny fanairana haingana ireo manampahefana mifandraika amin’izany ireo mpiasa.
Ny fahaizany manavaka ireo toe-javatra mampiahiahy, miendrika famarinana olombelona, dia afaka mamonjy aina sy mampihena ny herin’ ny tambajotran’ireo mpanao trafika. Nitohy ny hetsika fampiofanana ho an’ireo mpiasan’ny Ravinala Airports, misehatra eny anivon’ny seranam-piaramanidina Ivato, tamin’ity herinandro ity.
Vavahady hivezivezen’ny olona avy any ivelany ny seranam-piaramanidina. Mba tsy hisian’ny gaboraraka amin’ny fanondranana olona antsokosoko amin’izy ireny no anton’ny fanofanana.
Manaitra avy hatrany ny tomponandraikitra ireo mpiasa raha mahita tranga mampiahiahy. Manamora sy manafaingana ny sakana hatao tsy hahatanteraka ny fikasan-dratsy izany. Tsy ny vehivavy ihany no iharan’ny famarinana olona fa na ny lehilahy ihany koa aza ka ilana fahamailoana avok

Tatiana A

Tsy maintsy vahana anatin’ny fotoana fohy ny resaka delestazy satria tena manimba fiainana ilay izy. Tsy andrasana hikorontana ny olona vao hitady vahaolana fa mila vahana haingana ny fikatsoan’ny famatsiana jiro ary hanairana ny tomponandraikitra rehetra izany, hoy izy.
Tokony hamarinina raha tena misy migafy tokoa ao amin’ny Jirama ary handraisana fepetra hentitra. Jerena ny fototry ny olana ao amin’ny Jirama ary samy mandray ny andraikiny ny rehetra mba tsy hiteraka any amin’ny fipoahana ara-tsosialy ny krizy ateraky ny delestazy.
Tsy ny fitokonan’ny olona mitaraina noho ny tsy fisian’ny jiro tsy hahafahan’izy ireo miasa sy mivelona ara-dalàna no ezahina ravana fa ny vahaolana mihitsy no tokony haroso, hoy hatrany ny governoran’ny faritra Analamanga.
Niseholany rahateo ny fitokonana teto Antananarivo sy ny manodidina vokatry ny fahatapahan-jiro isaky ny ora 4 ary miteraka fahatezerana ho an’ny mponina izany.
Nanamafy ny governora Rasoamaromaka Hery ny amin’ny fisian’ny mpiasan’ny orinasa Jirama tsy mandoa vidin-jiro sy vidin-drano kanefa mivarotra malalaka amin’ireo tokantrano marobe manodidina azy. Fokontany iray ma­nontolo mihitsy no vatsiany jiro sy rano ary tsy misy fahatapahana ny azy ireo. Gabo­raraka tanteraka izany ka mila handraisana fepetra.
Tokony hisy ny ekipa manokana misava ireny mpiasan’ny Jirama manao gaboraraka ireny. Efa sahirana ny Jirama ka tokony handoa vola amin’izay ireo mpiasan’ny jirama satria efa tena latsaka lalina ilay orinasa.
Momba ny famatsiana ra­no ho an’ny faritra Anala­ma­nga, hisy ny forage hatao hi­sian’ny famatsian-drano ma­haritra amin’ireo toerana sa­san­tsasany. Ny fanjakana koa efa nametraka ireo siniben-drano maromaro mamaha amin’ny ampahany ny olana. Toraka izany ireo lavadrano amboarina.

Tatiana A

Tontosa omaly, teny An­doharanofotsy, ny fivoriana mahakasika ny tohin’ny fifaninanana “Grand Tournoi An­tananarivo (GTA)”. Tapaka ary fa hatao ny sabotsy sy alahady ho avy izao, etsy amin’ ny Kianjan’ny CFFA Iavoloha, ny ampahefa-dalan’ny fifanintsanana. Anisan’ireo fifanandrinana tena andrasan’ny maro, ny lalao hihaonan’ny AS Fanalamanga sy ny Avenir Ste Anne. Fihaonana izay hatao ny sabotsy ho avy izao.
Tsara marihina fa ny klioban’ny AS Fanalamanga, mifanintsana amin’ny «Pure­play Football League (PFL)» ary efa tompondaka lefitra, ny taona 2023. Ny AS Avenir Ste Anne kosa, klioba iray vao niakatra ao amin’ity fifaninanam-pirenena PFL ity ary voahosotra ho tompondakan’ny D2 Nasionaly farany teo.
Raha ny vaovao voaray, tsy mbola nahazo kianja tao amin’ny Elgeco Plus By-pass, ny mpikarakara ny fifanintsanana ny GTA ka voatery hatao eny Iavoloha ihany ity ampahefa-dalana ity. Nohamafisin-dRakotoarimanana Henin­tsoa, na Maire Tôta, filoha mpikarakara ny GTA, omaly, fa hotolorana lelavola 20 tapitrisa Ariary izay voalohany amin’ity GTA andiany faharoa ity.

Fitia Randria

Ireo fandaharan-dalaon’ny ampahefa-dalana:

Kianja CFFA Iavoloha :
Sabotsy 2/11/2024
12 ora : Ajesaia vs FC Valence
2 ora : AS Fanalamanga vs Avenir Ste Anne
Alahady :
12 ora : AS Ste Anne Espoir vs Cosfa
2 ora : CFFA vs Disciples Espoir
Firafitry ny manasa-dalana
“Izay tafavoaka amin’ny AS Fanalamanga sy Avenir Ste Anne no manao manasa-dalana amin’ny CFFA na ny Disciples Espoir. Ary izay tafita amin’ny Ajesaia sy ny FC Valence no hifandona amin’ny AS Ste Anne Espoir sy ny Cosfa”.

Nosokafana tamin’ny fomba ofisialy, omaly, tetsy amin’ny Kianja mitafo Mahamasina, ny fiadiana ny ho tompondakan’i Madagasikara, taranja baolina kitra anaty efi-trano «Futsal 2024». Tsara fanombohana ny ekipan’ny Tac Pro Kids, U13, sy ny CUA ,U15.Tsiahivina fa misy lalao ihany koa eny Ankorondrano.

Voahosotra ho tompondakan’ny “Tournoi Intercall”, andiany faharoa, taranja basikety, ny ekipan’ ny Boost, sokajy vehivavy, sy ny FFI, sokajy lehilahy. Fifaninanana natao teny amin’ny Lapan’ny fanatanjahantena, ny faran’ny herinandro teo.

Tontosa, omaly, ny antsapaka ho an’ny fifaninanana “Alley Hoop”, taranja basikety, andiany faha-6. Fifaninanana izay hatao ny 2 sy 3 novambra izao, eny amin’ny Lapan’ny fanatanjahantena Mahamasina.

Araka ny fikarohana natao omaly, noroahan’ny tomponandraikitra tao amin’ny klioban’ny Man­chester United FC, Angleterre, ny mpanazatra, i Eric Ten Hag. Tsiahivina fa noho ny vokatra ratsy azon’ity klioba anglisy ity matetika no nahatonga izany fanapahan-kevitra izany.

Hiditra amin’ny andro fahatelo, anio, ny fiadiana ny amboaran’i Madagasikara, taranja volley-ball, ho an’ny sokajy latsaky ny 23 taona, lahy sy vavy. Fifaninanana nanomboka ny 27 oktobra teo ary hitohy hatramin’ny 3 novambra izao, any Fianarantsoa, tohanan’ny Telma Madagascar. Ho an’ny ekipan’ny GNVB, manana solontena avokoa ny sokajy lahy sy vavy. Fandresena avy hatrany no azon’izy ireo, ny alahady lasa teo ary nitohy omaly izany. Samy nilalao ary samy nahazo fandresena, na ny lahy na ny vavy, ho an’ity ekipan’ny Zandarimariam-pirenena ity. Teo amin’ny sokajy vehivavy, nandavo ny ekipan’ ny CVBF Atsimo Atsinanana ny GNVB Analamanga, tamin’ny seta 3 no ho 0 (25-14/25-19/25-15). Teo amin’ny lehilahy kosa, tsara fanombohana ihany koa ny GNVB lehilahy, izay nandavo ny GSVBC, tamin’ny seta 3 no ho 0 (25-18/25-12/25-18) ary nahazo fandresena nanoloana ny Squad X, omaly.
Ekipa nahazo vokatra tsara ihany koa, tao anatin’izay 2 andro izay, ny EVBI Ihorombe, nandresy ny MVBC, tamin’ny seta 3 no ho 2 (15-25/25-21/28-25/25-23/15-8), teo amin’ny sokajy vehivavy. Seta 3 no ho 0 (25/18, 25/13, 25/16) kosa no nanilihan’ny EVBI ny VBLC, teo amin’ny sokajy lehilahy.

Mi.Raz

Tapitra teo amin’ny fifanintsanana isam-bondrona ny dian’ny Barea de Madagascar, sokajy vehivavy, ho an’ny fiadiana ny ho tompondakan’ireo firenena aty amin’ny tapany atsimon’i Afrika “Cosafa cup 2024”.

Faharesena iray, ady sahala iray ary fandresena iray. Io no vokatra azon’ny Barea de Mada­gascar, sokajy vehivavy, teo amin’ny fiadiana ny ho tompondaka ho an’ireo firenena aty amin’ny tapany atsimon’i Afrika “Cosafa cup 2024”, taranja baolina kitra. Isa 4 ihany no azon’ny Barea, tao anatin’ny sokajy “B” ary nametraka azy ireo teo amin’ny laharana fahatelo.

Nifarana teo, araka izany, ny lalan’ny Barea de Mada­gascar. Raha ny lalao farany nataon’ny tovovavy malagasy, omaly, nisaraka ady sahala samy tsy nisy nitoko tamin’i Botswana izy ireo. Fihaonana notanterahina tao amin’ny kianja Isaac Wolfson Stadium. Niady ny lalaon’ny roa tonta ary tena nanohitra hatramin’ny farany ny Barea de Mada­gascar, notarihin-dry Christina sy i Edoxie ary Ny Kanto.
Betsaka ny baolina tokony ho tafiditra fa mikoropaka na mitavozavoza rehefa eo am-pototry ny tsatoby ireo lohalaharana malagasy.
Vao niditra ny fizaram-potoana faharoa, nilalao 10 ny Barea de Madagascar. Na­hazo karatra mena i Sarah. Na teo aza izany, tsy nampihemotra ny tovovavy mala­gasy fa nanafika hatrany saingy tsy nety nikobana mihitsy ny haraton-dry zareo Bo­tsoaney.
Tetsy ankilany, niezaka nanafika ihany koa ny Bo­tsoaney, saingy tsara rafitra ny fiarovantenan’ny Barea ka tsy afa-nandingana izy ireo.

Hisolo tena ny sokajy “B” any amin’ny manasa-dalana i Malawi, izay nanamontsana ny Maorisianina, tamin’ny isa mavesatra 9 no ho 0.

Anisan’ny efa tafita amin’ ny manasa-dalana ihany koa ry zareo Afrikanina Tatsimo. Hotanterahina ny alakamisy 31 oktobra ho avy izao ny ankatoky ny famaranana roa.

Tompondaka

Nifarana omaly, teny amin’ ny Kianjan’ny Kanto Maha­ma­sina, ny fampisehoan’ny tarika Rossy. Fampisehoana natao nandritra ny telo andro, na­nomboka ny zoma 25 oktobra 2024 hatramin’ny omaly. Tan­jon’ny fampisehoana ny fampahafantarana ny rakikiran’ny tarika, izay azo jifaina eo anivon’ny Moozik. Tonga maro niaraka nitapolaka tamin’ny tarika Rossy ny mpankafy azy. Seho goavana rahateo no natolotry ny tarika ho an’ireo mpankafy.
«Zoma manifika», «Sabo­tsy mifankahita» ary «Alaha­din’ny fianakaviana» no nentin’ ny tarika Rossy nanome fahafaham-po ireo mpankafy azy. Tonga maro nihanoka izany ny mpankafy ny tarika ny alin’ny zoma sy ny andron’ny alahady, raha somary vitsy kosa no niatrika ny fampisehoana ny alin’ny sabotsy. Hira sy gadona maroloko no nokaloina nandritra ireo telo andro ireo. Anisan’izany ny hira mihetsiketsika nahafantarana ny tarika hatramin’izay. Teo ihany koa anefa ireo hira milamindamina sy hira fiderana. Ankoa­tra izay, anisan’ny nanome endrika ny seho ihany koa ny fiakarana an-tsehatr’ireo handimby an’i Rossy, araka ny nambarany. Anisan’izany i Tinoh sy Jarina, Malagasy tanora tena mana-talenta, izay nandresy nandritra ny fifaninanana nokarakarain’ny tarika.

Lin

Notanana am-ponja ireo telo lahy anaty tambajotra mpangalatra moto tao Antsirabe, ny zoma 25 oktobra teo. Naharay fitarainana avy amin’ny olon-tsotra ny mpitandro filaminana momba ny fisiana tranga halatra moto miseholany ao an-toerana. Nanao fikarohana ny mpitandro filaminana eo anivon’ny UIR. Fantatra tamin’ny alalan’ ny fanadihadiana ny toerana misy ireo olon-dratsy, ahina amin’io halatra io. Nosam­borina ny lehilahy iray. Natao famotorana, nitoroka ny mpiara-miombon’antoka aminy izy. Lehilahy roa hafa tra-tehaka rehefa natao ny vela-pandrika. Mpanamboatra moto ny iray. Mpandray ny entana halatra kosa ny iray izay sady mpanafina ireo moto halatra. Na­hatrarana moto roa teny amin’ ireo olon-dratsy.
Natolotra ny fampanoavana taorian’ny famotorana lalina teny anivon’ ny kaomisaria Centrale ireo mpangalatra moto ireo.

Tsiferana R.